Atos 13

Barnaba ben Shaulu ne shar ba

1 Ne akabaŋkɔŋ ne Antiyok aner abɛ tɔ bla lɛ kɛ Arik ben abɛ tsar: Barnaba, Simiyon ndi azhɔu te Ner shishir, Lusio ine Siren, Manem (waŋ ndi ane agben bǝn Hiridus ne Tetrak) bǝn Shaulu. 2 Ndi ayi ne min kɛ nek Arik ngɔŋ te na kpaanu, Izhu tsetser adi, <<Na Barnaba ben Shaulu nyak me zhin ne ndum kɛŋ ndim ne zhɔ ba.>> 3 Ndi neka kpaanu te ben Arik, a sak ba aŋɔk te duŋ ba tsǝn.

Nǝ Sipro

4 Ane Barnaba ben Shaulu ne vuŋ igu kɛ kɔmɔ ne tsǝn Izhu Tsetser aye Arik, aduŋ ba azǝ igu te kɔmɔ ne Selusiya ne zǝ amɔ te kɔmɔ ne Sipro. 5 Ndi Barnaba ben Shaulu ne yir Salami, adu lɛ kɛ Arik ne akaba anǝ kwɔyi ayou Yahudawa. Yɔɔna ayi ne min mǝne te zok bama.

6 Ne tsǝn ne ntun yi amashir se ndi ne yir ntun yi Pafos. Amɔ ne te yik ine tɔ nuŋ awɔnǝ Yahudawa ine tii mu te wa ayi ine tɔ bla lɛ kɛ Arik ndi a zhɔu te ba Yesɔ, 7 Waŋ ndi ayi ikpa maa Prokɔsol, Sagiyus Poulɔs. Iprokɔsol ayi mgbemgbeb ner, ashar azho Barnaba ben Shaulu te adi wai wɔ lɛ kɛ Arik bene beba. 8 Fena Elimas ine tɔ (waŋai ndi sak maa yime) akyak lɛ mǝne tena te tǝ wa abɛ duŋ Prokɔsol akyak ta lɛ kɛ tanyɛme. 9 Fena Shaulu, waŋ ndi ana zhɔu te Bulus, Izhu Tsetser aye Arik ne shak susun maa, a lɛk ayi atɔ Elimasa anenen te di, 10 <<Uyi zu ne njunju te nayi ne kyak kɔte nii ndi iyi anenen! Iki mimin iyi yaŋ rɛ iyi ne atu ami tena na iyik ayi. Tǝ di bau duŋ wɔb akla ne ki didik ye Ŋgɔŋ kai? 11 Azizaŋa ŋɔk kɛ Ŋgɔŋ iyi ne atu ami. Utei yi amfik, gar mkpaŋ nuŋ bau tei na yik laŋ ari ba.>>

Andanda Elimas awɔ ikinuŋ bǝn bu ikwɔ ayi amaa, akɔ ŋam, te wɔb nuŋ ndi atei gliu ne ŋɔk. 12 Ndi Prokɔsol ne yik ki ndi nenai, mtanyeme, ikime ne nǝgu yaŋ lɛ ne tsar lɛ kɛ Ŋgɔŋ.

Nǝ Bisidiya Antiyok

13 Ire Bafos, Bulus ben abɛ tsǝn amaa ne kama zǝ gwu te yar Ferga ne ntun yi Bamfiliya, amɔ Yɔɔna ne duŋ ba te ŋuro kam aŋyak Urshelima. 14 Ne lu ne Ferga te kɔmɔ ne Bisidiya Antiyok. Nǝ bɛr yi sɔŋ sik ne yir akaba te zǝ sɔŋ. 15 Ndi ne bla nkenlɛ yi abɛ bla lɛ kɛ Arik, abɛ Gli akaba ma a shar ba ne nkenlɛ, te di, <<Amunya, izhin te yine ki bla neshir, ta ben izhin bǝ lɛ.>>

16 Bulus alɔ klɛ adidik te nab ŋɔk tedi: <<Anere abɛ Isrela bene abaŋ ndi ba ayi Isrelawa ba te zǝ Arik, wɔm azhin! 17 Arik aner abɛ Isrela ne hria atetɛ mɔr; ne duŋ aneshir aŋli ashak du ne mkpaŋ keŋ ndi ne yi ne Masar, ne kiki ngɔngɔŋ iyi na Arik te Gli ba rumɔ ne ntuno, 18 Ne vuŋ susun ne yaŋ wɔ mǝne ne ase sɔknas ne ahwaŋ, 19 Arik ne zǝr ntun mei taŋgba ne Kanana te baŋ ahwaŋa asak ne aŋɔk aye aneshir amaa te bɛ yi amen. 20 Iyiŋɛ iyi ndi ne baŋ ba ase sɔkwur me nas ne sɔk tuŋ (450). <<Ndi yiŋɛ ne gayir, Arik ne nek ba abɛ te ambuk baŋ tǝ tar ne mkpaŋ kɛ Samula ine bla lɛ kɛ Arik. 21 Ankyak aneshire ne wɔb te bɛ nek ba Itum, fena akɔ nek ba Sɔl izu Kish, ne nga kǝ Banyami, waŋ ndi ne gli Itu mɔ ase sɔknas. 22 Ndi Arik ne tun Sɔl, ne suu Doda Itu mɔ. Ne ta nyɛmɛ bene bɔu: <Mniyik Doda izu Jese neshir waŋ ndi ne yir miŋ susun; atei na kɔte nii ndi mte ndiu abɛ nai.>

23 <<Ibaŋ rɛ nga kɛ neshir, Arik ne glii Isrela Yesɔ ine taba zhɔk, ndi ne kpai aŋyak. 24 Kamin nyɛ Yesɔ, Yɔɔna ne du lɛ tedi te aner abɛ duŋ na ki mimin te bɛ su aner Isrela bɔbɔk. 25 Ndi Yɔɔna ana ndum maa ayar klɛ, adi; <Izhin ndi ŋgam yi ŋɔwa? Bam yi Iyuŋɔ ba. Ba ye me ba, ama waŋ ndi anyɛ ne goŋ muŋ, waŋ ndi nga bam ne mla ne zuk akpaza amaa ba.>

26 <<Amunya, amumun abɛ Ibrai, te vuŋ izhineba abɛ klu sǝsǝk Arik ndi bai ŋli Yahudawa ba, iyi mɔr te lɛ kɛ ta zhɔk ndi ne shara ne kǝ. 27 Aneshir abɛ Urushelima, ben atum amen bane zhi Yesɔ ba, bane tɔu ashak ayi ba te duŋ ba ne gun lɛ kɛ bla aner abɛ Arik keŋ ndi abla kɛ kɔte bɛr sɔŋ sik iyaŋ sɔŋ sik. 28 Ne me bane vuŋ kinuŋ yi luk ndi iduŋ aŋunu ba, ne rib Bilatus te abɛ teu ambuk ayi ŋun. 29 Ndi ne zǝb te wɔb bla yiŋ ndi ne cɛrǝ ne tu amaa bɔbɔk, ne gliu azime ne tu kuŋkun kɛ gen te baŋu azhɔk ne bɛ. 30 Fe Arik ne lɛgu ne kumɔ, 31 ne bɛr tetɛk abaŋ ndi ne tsǝn bene bɔu are Galili te gar Urshelima ne yigu. Aye ba ne yik Yesɔ atei ya gli lɛ maa yir ben aneshir.

32 <<Ta bla zhin ilɛ didik: Iki ndi Arik ne kpai aŋyak atetɛ mɔr 33 ne duŋǝ klɛ ne atu amɔr, amumun amene, ndi ne lɛk Yesɔ. Ndi ne cɛr ne ŋa Zabura kɛ yaa:

<<<Uyi zumuŋ; aliŋe miyi Tetɛɛ mi.> 34 Ai ilɛmɛ kɛ ndi Arik ne lɛgu ne ku, batei na ku ba, ne duŋ ilɛmɛ amɛ:

<<<M tei nǝgu tsetser te nzhi anu adidik akɛ kpa nyak iyi kɛ Doda.> 35 Ndi amɛ ne bla kɛ kɔte me: <<<Bau tei duŋ ne tsetser ami abɛ ayik ku ba.>

36 Ndi Doda ane naa Arik ki ndi ne ta nyɛmɛ ne kpaŋ kɛ mben ŋli maa, ne kurna; ane baŋu aru ben atetɛ maa fe kpa maa ne bɔ. 37 Fena iwaŋ ndi Arik ne lɛgu ne ku ba ne bɔ ba.

38 <<Ndi yeme, amunyamɔr, mte ntǝ te zhin bǝ zhi te Yesɔ ne zuk izhu abɛ lalɛ zhɔk ai yi ablaa zhin. 39 Ize bene bɔu waŋ ndi ate ta nyɛmɛ ne lieru ne nkenlɛ yi Musa. 40 Izhin bǝ na bwe te kǝr bla ye aner abɛ na ndum kɛ Arik bǝ shaga ne atu amin ba:

41 <<<Tɔ, izhin

Abɛ yir mvlǝ, lɛ nten bǝn naŋ dɔ,

Tǝ M tei na kinuŋ ne mkpaŋ min,

Ndi ba zhin tei ta nyɛmɛ, te vuŋ waŋ ndi ate bla zhin.>

42 Ndi Bulus ben Barnaba aduŋ ki kɛ akaba, aneshir azhɔ ba te bɛ na te bla ilɛmɛ ne bɛr yi sɔŋ sik yi nyɛ. 43 Ndi ne duŋ aneshire aŋar, Yahudawa tetɛk ben abaŋ ndi ne nǝk tu te ta ize Arik ane Yahudawa azǝ Bulus ben Barnaba, abaŋ ndi ne lɛ bene ba te di ba abɛ tsi klɛ ne lɛ kɛ Arik.

44 Nǝ bɛr Sɔŋ sik iyi yaa ma aner tetɛk ne bin te wɔ lɛ kɛ Arik. 45 Ndi Yahudawa ne yik aneshir tetɛk, akɔ te ankiŋki te bene yen ntuk ne ki ndi Bulus adi.

46 Ankyak Bulus ben Barnaba adi ba ne yaŋ klu sǝsǝk: <<Ta tei bla lɛ kɛ Arik baliŋ. Ndi izhin ne kyak kɛ te kyak yik atu amin ne mla te zhin bǝ yi ne susun kɛ yaŋ ku, ta kam gar ben abaŋ ndi ba yi ŋli Yahudawa ba. 47 Tǝ waŋai ki ndi Ŋgɔŋ ne di ta:

<<<Mni duŋu bǝ yi laŋ ben abaŋ ndi ba yi ŋli

Yahudawa ba, te ubǝ Gli ta zhɔk

Mla ne klɛtu ne gɔŋmimi.>>>

48 Abaŋ ndi bayi ŋli Yahudawa ba ndi ne wɔ me, anyɛr te nek ngɔŋ ne lɛ kɛ Ŋgɔŋ; bɔbɔk abaŋ ndi ne hria ba ne susun kɛ yaŋ ku ne ta nyɛmɛ.

49 Ilɛ kɛ Ŋgɔŋ ne wɔ kɛ ngɔŋ ne gar yuŋɔ. 50 Ndi amɛ Yahudawa ne hria amba abɛ klu sǝsǝk Arik ndi atɔ ba shaga yi ben alulum abaŋ ndi awɔ ba ne ntun. Te duŋ ba lɛk iyaŋ sɔŋ kyekye iyi ntun te bɛ nek Bulus ben Barnaba iyah, tena yar ba ne ntuno. 51 Fe Bulus ben Barnaba akɔ klu mgbumgbuk ye aza men ashur ba te lɔ kɔmɔ ne Ikɔniya. 52 Ankyak abɛ zǝ Arik ne Antiyok anyɛr tetɛk tena yini Izhu tsetser.