1 Ndi bɛr tuŋ ne gayir Ananiya ngɔŋ nena ndum ne Akabaŋkɔŋ ne gar Kaseriya ben angɔŋgɔŋ aneshire anuŋ ben ine te ambuk nuŋ ndi azhɔu te Tatulus te gli ambuk amen anyɛ bǝn gomna netu yi Bulus. 2 Ndi ne zhɔ Bulus ayire, Tartulus ne bla ilɛ kɛ te ambuk amaa ne ti kɛ Felik tedi, <<tane baŋ mkpaŋ tetɛk te yik sik susun ne angus ami, ine te zor ben abɔu nɛ Gli kiki yi sen atu aneshir anyɛ nǝ ntun yiŋɛ. 3 kɔte kpaŋ takɛ ben kɔte ankɔŋ atawa ngɔŋ Felik, tane ta iyiŋɛ ne nyɛr. 4 Ama bam te sagu iyah ba, mbenu ubǝ shur atɔŋ te wɔ ilɛ kǝŋe.

5 Ta ne yik iner waŋa azǝn wɔb akla, azǝn shɔk mgbu nemin kɛ Yahudawa kɔte mɛ ne gɔŋmimi, ayi wa ayi ngɔŋ nena ikiki yiŋɛ ne Nazara 6 tɛ awɔb tǝ wa abɛ var akabaŋkɔŋ ŋɔ, fe ta ne vuŋu. 7 Ama ngɔŋ Lisiya ne tau azhɔk ne aŋɔk amɔr ne mgbyamgbyaŋ. 8 Utǝ tɔ iyiŋɛ ne tu mi utei zhi izub o netu ayi ambuk ayiŋ ndi mne gli nyɛmɛ netu maa.>>

9 Yahudawa ne di ngɔŋ, tedi ikime iyi amɛ.

10 Ndi gomna ne di Bulus a bɛ lɛ, fe adi: <<Me ne zhi une te ase tetɛk te zen te aner baŋa ambuk ne nyɛr mi te bla lɛ muŋ. 11 Ndi utei wɔb zhi nǝ tu mi, bane kam bɛr wur ane yaa ndi Mnǝ ngar ben Arik ne Urshelima. 12 Bane yik me mgaaŋa ben inuŋ ba, kɔ Mne lɛk mgbu te mbiŋ aneshir ne min akabaŋkɔŋ kɔte min ntun ba. 13 Aba menyi ba tei ya blau kiyiŋ ndi ne duŋ ba ne gli ambuk netu amuŋ anyɛ ayaŋa ba. 14 Ama mǝne tanyɛme te ndi, ne ankɔŋ awaŋ ndi azhɔu te <<Derika>> Mǝ zǝ Arik ane atsintsim amɔr, ayi wa me ne tanyɛme ne kiyiŋ ndi nɛ lɛ ne min kɛ icɛr iyi Musa ben lɛ kɛ abɛ bla ishar yi Arik, 15 mǝne zhɔk susun ben Arik, ir keŋ ndi abaŋa ana zhɔk asusun, ndi atei lɛk abɛ ku, abɛ na didik ben abɛ na mimin. 16 Ne me, kɔte mkpaŋ takɛ me nǝk tu tem yine susun didik te kǝr bɛ laa Arik ilɛ ben aneshir.

17 Ne min kɛ amɔ se, mǝne ŋur nkam kɔmɔ ne Urshelima te nek aneshir iki yiŋ ndi me yime neyi ne miŋ kɛ iyah muŋ. 18 Mǝyi ne miŋ kǝ na mɛ ne nyɛ yik me ne akabaŋkɔŋ Me yi tsetser, ba aneshir nuŋ ne kpam ba, bata ne gaaŋa ba, anaga yi ane Yahudawa abaŋ ndi are ntun iyi Asiya. 19 Ayi aba ne ne gli ambuk netu muŋ anyɛ me. 20 Aneshir abaŋa ne tu men abɛ bla iki mimin yiŋ ndi mǝne nai ndi me ne kli ne akabaŋkɔŋ. 21 Anaga yi lɛ zhiin keŋ ndi me ne lɛk kɔr, te lɛ kɛ ne ti: <M tei yik ku te nlu ndi azǝn tem ambuk ne ti min aliŋe.>>>

22 Filikus ndi ayi ne zhi ki ne ankɔŋɔ waŋa ne tsiba aŋyak, te di. <<Ate yi ndi Lisiyas ngɔŋ ate nyɛ, M tei ka zhi iki yiŋ ndi M tei nai ne lɛ kǝŋe.>> 23 Ne di ngɔŋɔ mǝne tedi abɛ gli Bulus, tedi abɛ duŋ asagu iyah ba abɛ duŋ yar aner amaa nyɛ bene bɔu te nyɛ tɔu ba.

24 Ndi iber ne gayir Filikus ne nyɛ iwa bǝn iwa maa Duruda, ayi vǝŋɔ ane Yahudawa. Fe a kɔ shar abɛ kɔte Gli Bulus agli nyɛmɛ, ne wɔ lɛ maa ne ana tanyɛ ne lɛ kɛ Almasihu Yesɔ. 25 Bulus ayi ne min kɛ zǝn lɛ ne atu yi na ki didik, ben vuŋ kpa, ben iyah yi nyɛ, Filibus afa anu tedi, <<Ŋurkam kɔmɔ Mte yik mkpaŋ M tei nka zhɔu.>> 26 Ne yik tedi te Bulus atei nǝk wa azɔb, waŋa kiyiŋ ndi azǝn zhɔu amkpamkpaŋ te zen lɛ bene bɔu.

27 Ndi ase yaa ne gayir Borkiya Festas ne yuŋ mben yi Filikus. Filikus awɔb te Yahudawa abɛ tanyɛme ben abɔu ne duŋ Bulus ne jaru.