1 Ndi tane lɛ biŋ ta tei zǝ Gu te gar Italiya, Bulus bene abɛ kur ne jaru anuŋ ne bǝn iner ngɔŋ nuŋ ne tyak kum ndi a zhɔu te Yuliyas, abɛ biŋ atu kɛ Augustas. 2 Tane vuŋ gu rɛ Adaramitiya, keŋ di te lu te gar igbu nuŋ ne gar kɛ Asiya, ta ne yir nek ngɔŋ te vuŋ tsin. Aristakus, awɔ ne Tasolɔnika ne gar kɛ Makidɔniya, ne bǝn bɛ ta.

3 Ne bǝn yi yaa tane yir sidon, Yuliyas ne na Bulus ki didik, te duŋu agar ben akpa amaa te bɛ lɔk Bulus te nǝgu iki wɔb maa. 4 Ne muɔ tane na yir nek ngɔŋ te ne zi gɔŋ kɛ Kuburus ndi ŋguŋgu ne tǝ goŋ. 5 Ndi tane glɔ gar kɛ ntun yi Kilikiya bene kɛ Bamfiliya, ta ne yir Mira ndi ayi ntun ŋɔk yi Likiya. 6 Ne muɔ ngɔŋ ne tyak kum ne yik Gu kɛ Iskandariya ndi gar Italiya te shur ta ne Gu mɔ. 7 Tane tsin bwebwee bɛr tetɛk tane te na yik iyah te shi yir Kinidas. Ndi nguŋgu bane duŋ ta tsin ba, ta ne kam zi ŋɔk kɛ Karita gbahir ne salmɔni. 8 Ta ne zi kɔnsa kɛ nek ne ŋɔk mla te yik iyah ne tsin teshe yir amkpa nuŋ ndi azhɔu te amkpa ne sɔŋ sik, gbahir ne ntun ngɔŋ yi Lasiya.

9 Tane klɛ kpaŋ tetɛk, itsin mɔrɔ ikɛ yik iyah ndi bǝn yi kpa anu neka gar gayir. Ankyak Bulus ne gbaŋ aneshir abɛ yine gumɔ atɔŋ te di, 10 <<Aneshir abaŋa, me ne yik tsin kǝŋe yi kɛ iyah te duŋ kiki cɔkla tetɛk, ba kiki bǝn Gu akyak ba, te vuŋ asusun mɔr.>> 11 Ankyak ngɔŋ ne tyak kum, ne wɔ kiyiŋ ndi Bulus adi, tabǝ zi lɛ keŋ ndi ne den Gu bene akiki ne Gu abla ne duŋ iyiŋɛ ibǝ rɛ te Gu bɛ gbur kli ne kpaŋ tetɛk ba ne kɔnsa ba, Aner tetɛk adi ta bɛ vuŋ tsin, ne zhɔk susun ta te yir Finikiya ne amkpa ne sɔŋ sik ne karita, atɔ gar kɛ anzaŋ ne gar kɛ ŋɔk li bǝn gar kɛ amgbalu kɛ ŋɔk mla. 12 Ndi ngugumɔ iyar ta tsin, aneshir tetɛk adi ta bɛ nak vuŋ tsin te gar fonoki te gburkli amɔ. Ntuno iyi ne gar kɛ amblimblɛ ben amgbalu.

13 Ndi ŋguŋgu ne fuk watsɔb te rɛ gar kɛ amgbalu, tane yik mkpaŋ kɛ tsin: Fe ne zuk gu mɔ te zi gar Karita gbahir ne ŋɔk abɛm. 14 Bane tsin gar gbagbaŋ ba, ŋguŋgu ngɔŋ ne fuk rɛ ŋɔk nek. 15 Ŋguŋgu ne fuk te yar Gumɔ tsin anenen, ta duŋ kɛ zi ŋguŋgu mɔ. 16 Ndi tane zi kɔnsa te yik ya teshe yir kauda, tane na yik iyah te shi vuŋ gu vǝtsɔb. 17 Ndi aneshir ne vuŋ igu vǝtsɔb ne min kɛ ngɔŋ abiŋ. Ne te sisik te kpa gumɔ te kǝr bǝ tyak ba hrie ne ablubluk ayi Libiya, ndi a mli kɔte ni, ne zuk gumɔ te duŋ kɛ tsǝntsem ma. 18 Tane sɔŋ te duŋ nguŋgu zǝn fuk ta ndi bɛr ne ŋan aneshir avu kiki yiŋ ndi igu ne vui atuk atyak ahrie. 19 Ne bɛr yi tar, ne tyak ki yi duŋ gumɔ luk atyak hrie ne ŋɔk amen. 20 Ndi ba ne yik arik bǝn cinces ne ru kli ba ne bɛr tetɛk ŋguŋgu mɔ bane duŋ tǝ mɛ ba. Tane di ne susun mɔr tedi bɔbɔk mɔrɔ inuŋ ba te lii ru ba.

21 Ndi aneshir ne kpa anu bane li kili ba, Bulus alu akli ne atsutsu amen te di ba: <<Aneshir, abɛ di izhin ne wɔ lɛ muŋ ba zhin bɛ lu te duŋ karita ba; ba zhin bɛ yir ya yiŋɛ ba. 22 Ne azizaŋ me blaa zhin kɔte ŋɔwa bɛ zhɔk susun ma, Ba nuŋ ne min mɔr ndi ate ku. gumɔ kɛ akyak te cɔkla. 23 Ne bu yi laŋ ne shar ayou Arik ndi me ye amaa waŋ ndi me zǝu ne ru kli bene bɛm 24 te di, <Bulus duŋ te sisik ba utǝ kli ne ti kɛ kaisar Itum ne Roma; Ne tu mi Arik ne lɔ susun aner abaŋ ndi izhin tsin bene abɛba inuŋ ba te ku ba.> 25 Amɛ Gli klik susun min, aneshir, me ne tanyɛmɛ ne Arik te itei yi amɛ ndi ne tanyɛmɛ ne Arik ite yi ndi ne blama. 26 Ne me, ta klu te ŋɔr ne ŋɔk abɛm kɛ amashir.>>

27 Ne bu yi wur ne nas ta tsin te gar nek ne Adariya, Ne tsutsu bu ne duŋ gumɔ ne yik te tane yir gbahir ne goŋ abɛm. 28 Ne baŋ ki tsar amashir te tsar amashire te yik kli min kɛ amashir teyi aza sɔk wur ane yaa ne sɔk yaa. Ne mkpaŋ watsɔb ne na tsara tɔ te yik kli min kɛ amashire yi aza sɔk teres. 29 Abɛ den gumɔ ne te sisik te yik tedi ta te ŋɔr ne kpaŋ, fe azuk igu mɔtsɔtsɔb me nas shur ne tiŋ gumɔ te ben Arik gar ŋan bɛr. 30 Ne te te ba bɛ ru ne min gumɔ, abɛ den gumɔ a zuk igu vǝtsɔb zhɔk ne Nek, te yik ndi aba te duŋ gumɔ ba tei na luk ba. 31 Fe Bulus adi ngɔŋ ne tyak kum bene anki abɛ tyak kumɔ, <<Sei abɛ den gu abaŋ ne sɔŋ ne gumɔ mba mɛ ba ba zhin tei li ru ba.>> 32 Fe abɛ tyak kum a yak riri keŋ ndi Gli vǝvǝn gumɔ kluk te duŋ kɛ kɔmɔ.

33 Ndi bɛr ne ŋan Bulus adi ba bɛ li kili. <<Ne bɛr wur ne nas,>> Adi, izhin bane zhɔk susun ba ta ne tsin yaŋ ila izhin bane li kinuŋ ba. 34 Bulus adi azizaŋ mbla zhin izhin bɛ li kili. Te zhin bɛ yi ne mgbyamgbyaŋ. Ba nuŋ ne miŋ min mfumfuk tu maa te kyaŋ ba. 35 Ndi ne bla me, ne baŋ mplipla la te nyer Arik ne ti men bɔbɔk. Fe amlik kɛ te li. 36 Bɔbɔk men ne zhɔk susun te li kili ne kpa men. 37 Bɔbɔk mɔr te yi aneshir ankplik aya ne sɔk taŋgba ne tani (276) ne gumɔ. 38 Ndi kɔte ŋɔwa ne lii hri ne vuu kiki nuŋ ben kpu atyak ahrie ne mashir ne nek ngɔŋ.

39 Ndi bɛr ne ŋan, bane zhi amkpa waŋ ndi aba yime ba, ne yik ablubluk ne goŋ abɛm, ne lɛ te tanyɛme aba te tur gumɔ te gar ablubluk. 40 Ne zuk gu mɔtsɔtsɔb a shur ne mashir, te rik ririk keŋ ndi a Gli ki kam gumɔ, fe te lɛk ti gumɔ gar amkpa waŋ ndi ŋguŋgu tǝ te gar goŋ abɛm. 41 Ankyak gumɔ ne tar ne blubluk te fir yir mimi. Fe iki duŋ gu tsǝne ifuk andanda te duŋ gumɔ gburkli.

42 Abɛ tyak kum ate te te ba abɛ ŋlɔk aner abaŋ ndi ne ku ba te kǝr inuŋ abɛ tuk akyaŋ aku tɛ dɛn te ru adɔ ba. 43 Neme ngɔŋ ne abɛ tyak kumɔ ne te tǝ wa abɛ ta Bulus azhɔk te yar ba nena kiyiŋ ndi ne di aba atei nai ma. Ne di waŋ ndi ate den ayir abɛ tuk akyaŋ aku te den ru. 44 Anki aneshir bɛ ayuŋ mplɛ kuŋkun te ru kɔ abɛ zǝ mgbalak gu nuŋ te ru. Neme bɔbɔk mǝne ne ru keke.