Mateus 12

Arik ane bɛr yi sɔŋ sik (Markus 2:23-28; Luka 6:1-5)

1 Ne mkpaŋ yuŋɔ Yesɔ ne gayir ne min ahwaŋ ane alikama ne bɛr yi sɔŋ sik. Abɛ tsene maa izhɔŋ ne vuŋ ba ankyak a ŋɔr alikama ata 2 Ndi Ferisawa ayik amɛ akɔ diu abɛ tɔ abɛ tsene maa ana ki yiŋ ndi ba ne rɛ ka ne bɛr yi sɔŋ sik.

3 Asak bama, <<Ba zhin ne zin tɔ bla cɛr yiŋ ndi Doda ne cɛrǝ iwa ben abɛ tsin amaa ndi izhɔŋ ne vuŋ ba kai? 4 Ne yir akabakɔŋ ayou Arik, te li ki yiŋ ndi ba ne rɛ ka, kɔ aner abɛ tsǝn amaa abɛ li ba, iyi kɛ abɛ na ndum kǝ Arik ankyak. 5 Ka ba zhin ne zin bla ki ndi Atɔra ne di bɛr yi sɔŋ sik abɛ na ndum kǝ Arik ne min akabakɔŋ ne caŋ bǝn te bane la lɛ kai? 6 Mbla zhin te waŋ ndi ne naŋ Akabakɔŋ aye yaŋa. 7 Abɛ di zhin ne zhi ndi ilɛ kǝŋe di, <M wɔb lɔ susun min, bam wɔb tsik me ibaŋ ba,> ba zhin bǝ yik la lɛ abɛ yaŋ lalɛ ba. 8 Tǝ izu neshir wa ayi ŋgɔŋ ne bɛr yi sɔŋ sik.>>

9 Akɔ duŋ amɔ, te yir min akabakɔŋ mǝne, 10 Fe neshir nuŋ ne shen ŋɔk aye amuɔ. Awɔb ankɔŋ ne yen Yesɔ ne na ki yiŋ ndi ba ne rɛ ka, a rib bu, <<Nǝ rɛ te abe na neshir te duŋu arɛ ne bɛr yi sɔŋ sik yi?>>

11 Adi ba, <<Ndi neshir nuŋ ne miŋ mine ate yi ne wanta, te ne zhaku ne dudu ne bɛr yi sɔŋ sik, ba tei baŋu a gli rumɔ kai? 12 Itayi tei naŋ te neshir abɛ naŋ wanta! Ndi amɛ, ba ne rɛ ka te abɛ na ki yiŋ ndi ba rɛ ba te be lɔk ner nuŋ ne bɛr yi sɔŋ sik.>>

13 Fe adi neshire, <<Nab ŋɔk mi.>> Fe anab kɛ, fe iku kam nyak anenen ndi kɛ yaa ma. 14 Ankyak Ferisawa aru abɛm te kɔte kpa anu ne atɔ maa te wɔb ankɔŋ awaŋ ndi aba tei ŋun Yesɔ.

Igen ne hria Arik

15 Ndi Yesɔ awɔ amɛ, akɔ duŋ amkpama. Aneshir tetɛk ne zeu, ne na ba rɛ ne lɔ mǝne, 16 a nek ba lɛ kǝr abɛ duŋ bla nuŋ te wa ayi ŋɔwa. 17 Waŋa ayi ki ndi ne shaga ne lɛ kɛ shaya ine bla shar yi Arik ndi azhɔu te Ishaya:

18 <<Tɔ zhin igen amuŋ waŋ ndi mene hriau,

Ayi waŋ ndi me nyeru, Izu muŋ waŋ ndi M ne tanyɛmɛ newu;

M tei zhɔk Izhu yi Arik ne miŋ susun maa,

Fe atei na bla aneshir abaŋ ndi ba yi ŋli kɛ Yahudawa ba ne samariya lɛ didik ne ntuntun.

19 Ba tei te antam kɔ ŋar tɔ ba;

Bai waŋ ndi atei wɔ kɔr maa ne kuŋkɔŋ ba.

20 Ikyuru keŋ ndi ne ce ba tei ka kɛ amlik ba,

Bai na rim ilu kɛ laŋ watsɔb ba,

A tei duŋ lɛ didik bǝ li ru.

21 Nǝ sak maa ntuntun ye Samariya atei shur ayi.>>

Yesɔ ben ŋgɔŋ ne ki tuk

22 Ankyak ne gliu ner ne yi ne anerim waŋ ndi ayi amfik ba na lɛ ba, fe Yesɔ duŋu rɛ, te abɛ lɛ te na yik. 23 Aneshire bɔbɔk ne vuŋ anu ne ki yiŋ ndi Yesɔ ne na, arib te di <<Ka waŋa alɔ yi lǝla Doda ini?>>

24 Fe ndi Ferisawa ne wɔ amɛ, akɔ di, <<Waŋa yi ndum ngɔŋ kɛ shetan ankyak, ngɔŋ anerim ayi wa gli anerim arumɔ.>>

25 Yesɔ ne zhi ilɛ susun mǝne, tedi, <<kɔte ntun ngɔŋ tayi ndi te ŋar tu maa ba tei klɛ mgbamgbaŋ ba, fe ikɔb maa kɛ gbarshu keŋ ndi te ŋar tu maa ba tei klɛ ba. 26 Ate yi ndi shetan igli shetan rumɔ, ne gab kpa maa ne tu maa. Ikɔb maa tei na kikin te klɛ? 27 Ate yi ndi Mǝ gli anerim gli rumɔ ne sak kɛ ngɔŋ anerim, te aner amin agli ba rumɔ ne sak kɛ ŋɔwai? Ne me aba atei te zhin ambuk. 28 Ba yi amɛ ba, Belzebu bai Izhu iyi Arik ba, waŋ ndi ne nǝm mgbyamgbyaŋ kɛ gli anerim igli rumɔ, fe ikɔb kǝ gbarshu kɛ Arik ne kam nyɛ zhin.

29 <<Inuŋ ba atei ŋur ankɔŋ iner ne klik agbɔŋa aŋa te avu kiki maa ba, se ne kuti avuŋ nɛr ne klik waŋa akpa neliŋ; te ashe vu kiki iyi kɔb maa.

30 <<Waŋ ndi ba ayi bene bɛm ba ate zor ben abɛm; neme waŋ ndi ba ate zok me biŋ ba avar. 31 Ne yiŋɛ Mbla zhin, kɔte zumimin tayi bǝn te antam atei zuk zhin zhɔk, ama waŋ ndi ne tun zhi Izhu iyi Arik ba tei zu gu azhɔk ba. 32 Waŋ ndi ate bla nkanlɛ ne tu Izu Neshir atai zugu zhɔk, waŋ ndi ne tun zhi Izhu iyi Tsetser ba tei zugu zhɔk ba, ne kab kǝŋe kɔ ne kab kɛ nyɛ.

33 <<Duŋ tiŋ nkunkun didik bǝ gli dɔ didik, kɔ kuŋkun mimin bɛ gli dɔ mimin, azhi tiŋ kuŋkun ne dɔ maa. 34 Izhin ane wa abɛ tus, izhin tei na kikin tǝ bla kiki didik te izhin yi amimin? Anu abla ki yiŋ ndi iyi ne min susun. 35 Ineshir didik agli kiki didik agli arumɔ ne min kǝ yak ki didik, iner mimin agli ki mimin aglɛ rumɔ ne min kɛ iki kǝ yak ki mimin. 36 Fe mbla zhin nkan lɛ te aneshir atɛi bla kiyi na mɛn ne bɛr te ambuk ne mɔ lǝlɛ yi sha ndi neshir ablai atɛi vui te tɔi. 37 Ilɛ mi kɛ tei teu ambuk kɔ ibǝ zugu zhɔk, kɔ ibǝ kpau.>>

Ŋgir kɛ Yonana

38 Ankyak Ferisawa anuŋ bǝn abɛ tsar nken lɛ yi icɛr Musa adi Yesɔ, <<Ine Tsar, ta wɔb te ta bǝ yik ikinuŋ yi vuŋ anu.>>

39 Asaga, <<Abɛ na ki mimin bǝn anere abɛ mkpaŋ kǝŋe aba wɔb te aba abɛ yik iki ngɔŋ yi sak aŋɔk ne nu! Ba waŋ ndi atei nugu ikinuŋ yi vuŋ anu ine bla shar yi Arik ndi azhɔu te Yunana. 40 Ndi Yunana nɛ te bɛr tar bǝn ibu tar ne min ine kɛ ambɛ angɔŋ, iyeme Izu neshir atei na te bɛr atar bǝn bu tar ne min gɔnmimi. 41 Aneshir abɛ Neneba a tei lu klɛ ne bɛr yi te ambuk bǝn aneshir abɛ mkpaŋ kǝŋe atei yaŋ zhin lɛ, ndi ne duŋ na zumimin men ne wɔ ilɛ kɛ Arik ndi Yunana ne du kɛ; mbla zhin ikinuŋ ngɔŋ iyime naŋ Yɔnana! 42 Iwa itum ine shin atei lu te ambuk bǝn kab kǝ ŋa tena ŋun kɛ; te ne nyɛ ne klɛ tu yi gɔnmimi tǝ bɛ wɔ mgbemgbebɛ kɛ Solɔmɔn, fe azizaŋ nuŋ ndi anaŋ Solɔmɔn aye yaŋa.

43 <<Ndi izhu yi shetan ne ru ne kpa kɛ neshire, te kɔmɔ ne zizik gbagbaŋ te duŋ neshire ne wɔb sik bane na yik kɛ ba. 44 Fe adi itu maa, <M tei ŋur kam kɔmɔ ne kɔb kɛŋ ndi mǝne rurɛ me.> Ndi ne yir kɛ, ne yik nuŋ ba yi ne kɔbɔ ba, ne kun te yis kɔbɔ zhɔk tsetser. 45 Fe ikɔte vu anerim ataŋgba ndi anaŋu ne zumimin, a shur ne mine fe ayir te sɔŋ amɔ. Ankyak iklɛ tu yi inere ne iyi mimin naŋ yi kuti me. Waŋa ki yiŋ ndi itei yi me ne kab mimin kǝŋe.>>

Yaa maa Yesɔ ben amun zumen

46 Ndi Yesɔ ayi ne min kɛ zen lɛ ben ntsan aneshir, Iya maa ben amunzumen akɛ kli ne abɛm, te aba bɛ lɛ ben abɔu. 47 Inuŋ ablau te di, <<Iya mi ben amunzumin akɛkli ne bɛm, te ba abɛ lɛ bene bɔu.>>

48 Yesɔ adiu, <<Ŋɔwa ayi yaa muŋ, ane ŋɔ aba ayi amunzumɔr?>> 49 A nab ŋɔk ben abɛ tsene maa, tedi, <<Tɔ! waŋa aye ane yaa muŋ ben amunzumɔr. 50 Iwaŋ ndi a te na kiyiŋ ndi Tetɛɛ muŋ ne gbarshu ne tanyɛme, ai zumɔr bǝn vamɔr bǝn yaa muŋ.>>