JOB 38

4 "?Taem we mi mi mekem wol ya,

yu yu stap wea?

Sipos yu save, yu talem long mi.

5 ?Hu i makemaot wol ya,

se bambae i bigwan olsem wanem?

?Hu i pulum teplaen antap long hem

blong makem saes blong hem?

?Yu save ansa long ol kwestin ya?

6,7 Long moning blong dei ya

we mi mi stanemap ol pos we oli holem wol ya,

mo mi putum fandesen blong hem,

ol sta oli harem gud tumas,

oli stap singsing wanples,

mo ol enjel long heven oli glad tumas,

oli stap singsingaot,

be mi no luk yu long taem ya.

?Ol pos ya oli stanap long wanem?

?Mo hu i putum fas ston

long kona blong fandesen ya,

we ol narafala ston blong hem

oli stap laenap long hem?

8 ✝ 38.8: Jer 5.22 "?Long taem ya we solwota i sut,

i kamaot long graon fastaem,

olsem we pikinini i bon, i kamaot

long bel blong mama blong hem,

be hu i satem doa blong blokem solwota ya

i stap long ples blong hem?

9 Long taem ya,

mi nao mi tekem klaod,

mi kavremap solwota ya long hem,

mo mi mekem tudak i kam

olsem klos blong hem.

10 Mo mi mi putum mak

we solwota bambae i go finis long hem,

olsem we mi putum stonwol i goraon long hem

blong blokemgud hem.

11 Mi talem long hem se,

‘Bambae yu go kasem ples ya,

yu no bitim i go moa.

Paoa blong yu bambae i finis

long ples ya.’