10 Ndin amọ emaenam ntom. Ammọ emaeben umanenañ iba etobo ke ukpadñkpọ enyʌñ ediañña nditọ ammọ ekesịn ke afe. 11 Ammọ emaedot akebe edioomo Abọọñ ke ukpadñkpọ, enyʌñ edot akebe a-asịneke ubobod ekpu kold mme ekpu ye ubobodñkpọ ndufuud. 12 Ndin mme enañ ado emaedọọk ekaa ke usʌñ a-akaaha Bed Semes, ammọ emaesaña ke akpọusʌñ, esaña emai; ammọ ikiwakkake ufiin me nnasia. Mme andikara ke Filistia emaekeene ammọ tutu ekewuọ adaña Bed Semes.

13 Idaha ntoro, nditọ Bed Semes ekesʌk edọk abakpa ke itịkke, ndin ke ammọ edịppeke anyen ekịt akebe edioomo ado ammọ emaekop inemesịd adikịt. 14 Ukpadñkpọ ado akedʌk inwañ Yọsua ke Bed Semes, ndin do anye aketre ke mben ekamba itiad. Mme awo emaekpok eto ukpadñkpọ ado enyʌñ ekama enañ ado enam ufọfọb uwa enọ Abọọñ. 15 Mme mbon Lifai emaedooro akebe edioomo Abọọñ ye ekamba akʌbọ ukʌb akebe se ikidọñọ mme kold enyʌñ edot ammọ ke anyọñ ekamba itiad. Ke usen ado mme mbon Bed Semes emaewa ufọfọb uwa enyʌñ enam mme uwa enọ Abọọñ