1 Luvutudila Yave matondo bila niandi widi wumboti ;

Luzolo luandi lunzingila mu zithangu zioso.

2 Bika bobo bakulu kuidi Yave batuba buawu ;

bobo kakula mu koko ku batu bobo babalenda,

3 bobo kakutikisa tona ku mintoto,

tona ku esite ayi ku wesite ; tona ku node ayi ku sude.

4 Bankaka baba diengilanga mu dikanga, buangu bikambulu batu ;

basia baka ko nzila yikotila mu divula diodi balenda vuandila.

5 Bamona nzala ayi phuila ;

ayi luzingu luawu luba nduka mu suka.

6 Buna bayamikina kuidi Yave mu ziphasi ziawu

ayi niandi wuba kula mu kiadi kiawu.

7 Niandi wuba diatisa mu nzila yisonga

mu diambu di kuenda ku divula diodi balenda baka bu vuandila.

8 Bika bavutudila Yave matondo mu diambu di luzolo luandi lu ngolo

ayi mu diambu di mavanga mandi matsiminanga momo kavangila batu.

9 Bila wumanisa phuila

ayi wuyukutisa mutu wuba nzala mu bima bi mboti.

10 Bankaka baba vuandanga mu tombi ayi ku tsi tombi ki nkobo ;

baba bakangama mu ziphasi zisieni zi sengo.

11 Bila batinguna mambu ma Nzambi,

ayi balenza zindongi zi Nzambi Yizangama.

12 Diawu kaba yekudila ku tsi kisalu ki ngolo ;

babumina thutu ayi kuisi ba ko kadi mutu mu ku basadisa.

13 Buna bayamikina kuidi Yave mu ziphasi ziawu

ayi niandi wuba vukisa mu kiadi kiawu.

14 Wuba totula mu tombi ayi ku tsi tombi ki nkobo

ayi wukelula zisieni ziawu.

15 Bika bavutudila Yave matondo mu diambu di luzolo luandi lu ngolo

ayi mu diambu di mavanga mandi matsiminanga momo kavangila batu

16 Bila wutiolumuna mielo mi palata

ayi wukesumuna bisengo binzibukulungu mielo.

17 Bankaka bakituka bivungisi mu zinzila ziawu zi matingu

ayi ziphasi mu diambu di mambimbi mawu.

18 Bakakumukina bidia bioso

ayi bafikama mielo mi lufua.

19 Buna bayamikina kuidi Yave mu ziphasi ziawu

ayi niandi wuba vukisa mu kiadi kiawu.

20 Wufidisa mambu mandi ayi wuba belusa,

wuba kula mu tsi bafua.

21 Bika bavutudila Yave matondo mu diambu di luzolo luandi lu ngolo

ayi mu diambu di mavanga mandi matsiminanga momo kavangila batu.

22 Bika batambika makaba ma phutudulu matondo

ayi bayolukila bisalu biandi mu minkunga mi khini.

23 Bankaka bayendila va mbu mu masuwa,

baba minkiti mu minlangu minneni,

24 bamona bisalu bi Yave,

mavanga mandi matsiminanga va ngingi nlangu.

25 Bila wuyoluka ayi wutotula vuka kingolo,

kioki kivumuna mayo.

26 Bakuma ku yilu ayi bakuluka ti kuna tsi ;

mu mabienga mawu, bukhafi buawu buzimbala.

27 Balembo balumuka ayi bulangana mu diata banga batu bakololo malavu

diela diawu dimanisa.

28 Buna bayamikina kuidi Yave mu ziphasi ziawu

ayi niandi wuba vukisa mu kiadi kiawu.

29 Wudigimisa vuka kingolo mu manuinguta,

mayo ma mbu madingalala.

30 Bamona khini thangu ndembama yivutuka

ayi Yave wuba nata ku disimu dibazola kuenda.

31 Bika bavutudila Yave matondo mu diambu di luzolo luandi lu ngolo

ayi mu diambu di mavanga mandi matsiminanga momo kavangila batu.

32 Bika banyayisa mu lukutukunu lu batu

ayi bika banzitisa mu dikabu di bakulutu.

33 Wukitula minlangu minneni makanga

ayi zitho zinkumba mintoto mi yuma ;

34 ayi ntoto widi mbozi mu ntoto widi tsalu

mu diambu di mambimbi ma bobo bazingila muna.

35 Wukitula dikanga mu bibuindi bi nlangu

ayi ntoto wuyuma mu zitho zinkumba ;

36 Kuna kanata nzala muingi yizingila

ayi batunga divula diodi balenda vuanda ;

37 Bakuna zitsola ayi zindima zi vinu

ziozi zieti buta mimbutu mimbozi.

38 Wuba sakumuna ayi thalu awu yiwombo yi buelama

ayi kasia tala ko ti bibulu biawu bidekuka.

39 Buna thalu awu yidekuka ayi bafua tsoni

mu diambu di khuamusu, mabienga ayi maniongo.

40 Niandi wulembo lenzi batu banneni,

wulembo badiengisa mu dikanga mu kambulu nzila.

41 Vayi weti totula nsukami mu ziphasi ziandi

ayi weti wokisa makanda mawu banga minkangu mi mamemi.

42 Batu balulama mu mintima balembo moni ayi balembo yangalala

vayi batu boso bambimbi bazibikidi miunu miawu.

43 Woso mutu widi nduenga bika kakeba mambu mama

ayi kasudika luzolo lunneni lu Yave.