1 Nkua lulendo ; Nzambi, Yave

tubidi ayi kutikisidi ntoto

tonina ku ntotukilanga thangu nate buangu keti diamina.

2 Tona ku Sioni, wufuana mu kitoko ;

Nzambi weti kienzuka.

3 Nzambi eto wulembo yizi,

ayi kalendi ba dio sui ko ;

mbazu yilembo zinisa ku ntualꞌandi

ayi vuka kingolo kinzungididi.

4 Niandi wunkutikisanga diyilu ku yilu

ayi ntoto mu diambu kasambisa batu bandi :

5 Lukhutikisila batu bama bobo ndibieka,

bobo bavanga yama Nguizani mu nzila yi makaba.

6 Ayi diyilu dilembo yamikisa busonga buandi,

bila Nzambi niandi veka zuzi.

7 Luwa, beno batu bama ;

Ndiela tuba :

A Iseli, ayi ndieka ntelama kimbangi mu diambu diaku :

Minu ndidi Nzambi ; Nzambi aku.

8 Ndilendi kutemina ko mu diambu di makaba maku

voti makaba maku mayoko ;

momo madi thangu ka thangu va ntualꞌama,

9 Ndisi mfunu wu ngombi yi mbakala yi luphangu luaku ko,

voti zikhombo zi ziphaka ziaku ko.

10 Bila minu phuidi bibulu bioso bi nsitu

ayi bibulu bioso binkalanga mu miongo.

11 Nzebi zinuni zioso zi miongo,

ayi minu phuidi bivangu bidi mu zitsola,

12 Enati nzala ndimona, buna ndilendi kukamba buawu ko

bila minu phuidi nza ayi bibioso bidi muawu.

13 Minu minsuni mi zingombi zimbakala ndiela dia

voti ndieka nua menga ma zikhombo e ?

14 Tambika makaba ma phutudulu matondo kuidi Nzambi

ayi dukisanga zitsila ziaku kuidi Nzambi yizangama.

15 Ayi wuthela mu lumbu ki ziphasi,

ndiela ku kula ayi ngeyo wela kunzitisa.

16 Vayi Nzambi wulembo kambi mutu wumbimbi :

"Mu minsua mbi wulembo tangilanga mina miama e ?

Voti bila mbi weti natina Nguizani yama mu bididi biaku e ?

17 Ngeyo wunlendanga zindongi ziama

ayi wuloza mambu mama ku manima maku.

18 Ngeyo bu mueni muivi,

buna weti bundana yandi.

Bosi ngeyo wumvuandanga va kimosi ayi mitsuza.

19 Wunsadilanga munuꞌaku mu diambu di mambimbi,

ayi wunsadilanga ludimi luaku mu diambu di luvunu.

20 Ngeyo wuntubidilanga khombꞌaku

ku ndambu mu zithangu zioso ;

Ngeyo wuvuezanga muana bakala wubuta ngudi aku.

21 Mambu mana mawu wuvanga

vayi ndiba dio sui.

Ngeyo wubanzila ti minu ndedikini banga ngeyo

Vayi minu ndiela kutubidila ayi kufunda va zizi kiaku

ku ntuala meso maku.

22 Luyindula diambu diadi : beno lunzimbakananga Nzambi ;

nganu ndilenda kulukanzuna mu bitini,

ayi mutu wulenda kula kalendi monika ko.

23 Woso wuntambikanga makaba ma phutudulu matondo

buna wukunzitisa, ayi weti kubika nzila

muingi ndimmonisa phulusu yi Nzambi."