1 Yave weti yala, bika ntoto wuyangalala.

Bika bisanga biobi bidi thama bimona nkini.

2 Matuti ayi tombi kinkobo binzungididi.

Busonga ayi bufuana biawu

fundasio yi kundu kiandi ki kipfumu.

3 Mbazu yeti kuenda ku ntualꞌandi

ayi yeti zinisa batu bobo beti kunlenda ku kadika ndambu

4 Zitsiemo ziandi zieti kienzula nza,

ntoto weti mona ayi weti tita.

5 Miongo misiuta banga mafuta momo beti vinda mu bikundu va ntuala Yave,

va ntuala Yave wu ntoto wumvimba.

6 Diyilu dieti yamikina busonga buandi

ayi batu boso beti mona nkembo andi.

7 Babo bobo bambuongiminanga zimfikula beti fua tsoni ;

bobo beti kukiniemisa mu diambu di bitumba.

Lumbuongimina, beno zinzambi zioso.

8 Sioni weti wa ayi weti mona khini

ayi bana ba baketo ba Yuda beti yangalala

mu diambu di zinzengolo ziaku, a Yave.

9 Bila ngeyo Yave, widi Nzambi yizangama va ntoto wumvimba.

Ngeyo widi wuyayusu ngolo

va yilu zinzambi zioso.

10 Bika babo beti zola Yave, balenda mambimbi.

Bila weti keba luzingu lu banlongo bandi.

Niandi wukubakulanga mu mioko mi batu bambimbi.

11 Kiezila kieti totuka mu diambu di batu basonga

ayi khini mu diambu di bobo

badi lulama mu mintima.

12 Bika lumona khini mu Yave, beno luidi basonga

ayi luzitisa dizina diandi di nlongo.