1 Ntimꞌama widi wukinda, a Nzambi.

Ndiela yimbila ayi ndiela bula miziki mu muelꞌama woso.

2 Kotukanu beno ngitala ayi Lila ;

ndiela kotula khiesa buisa.

3 Ndiela kuzitisa, a Yave, va khatitsika makanda,

ndiela kuyimbidila va khatitsika batu

4 Bila luzolo luaku luidi lunneni, luidi luzangama viokila diyilu

kikhuikizi kiaku kieti tula nate ku matuti.

5 Yayusu kuaku, a Nzambi, ku yilu diyilu

ayi bika nkembo aku wuba va ntoto wumvimba ;

6 Wutuvukisa ayi wutusadisa mu koko kuaku ku lubakala

muingi bobo weti zola bakulu.

7 Nzambi wutuba tona ku buangu kiandi kinlongo :

"mu ndungunu, ndiela vasa Sikemi

ayi ndiela teza ndimba wu Sikoti.

8 Minu phuidi Galadi, minu phuidi Manase ;

Efalayimi wawu nkaku wu ntu ama

Yuda nkawꞌama wu kipfumu.

9 Mowabi diawu dibola diodi ndieti yobidila.

Va yilu Edomi ndiloza zisandale ziama,

ndiela yamikina mu diambu di ndungunu ama mu basi Filisiti."

10 Nani wela kundata ku divula dikindusu ngolo e ?

Nani wela kuthuadisa ku Edomi e ?

11 Keti ngeyo, a Nzambi, ngeyo wutuloza,

ngeyo wunkambu buela totukanga ayi minkangu mi masodi meto e ?

12 Wutuvana lusadusu va ntuala mbeni

bila lusadusu lu mutu luidi lu phamba.

13 Va kimosi ayi Nzambi, tuela tunga

ayi wela kosikisa bambeni zieto.