1 Luzitisa Yave !

A phila mboti yidi mu yimbila minzitusu kuidi Nzambi eto.

A phila khini ayi fuana kuidi mu kunzitisa.

2 Yave weti tunga Yelusalemi,

weti kutikisa bana ba Iseli bayenda mu kivika.

3 Niandi weti belusa mintima mi kosakana

ayi wunkanganga ziphasima mu ziphuta ziawu.

4 Niandi weti zenga thalu yi zimbuetete

ayi weti kuzitedila kadika mbuetete mu dizina diandi.

5 Pfumu eto widi wunneni

ayi lulendo luandi luidi lunneni ;

diela diandi disi kadi ndilu ko.

6 Yave weti kindisa woso mutu weti kukikululanga

ayi weti lumba batu bambimbi va tsi.

7 Luyimbidila Yave mu kumvutudilanga matondo ;

Lusikila Nzambi eto miziki mu ngitala.

8 Niandi wufukidilanga diyilu mu matuti ;

wunkubikanga mvula mu diambu di ntoto

ayi niandi wummenisanga biti va mbata miongo mi fioti.

9 Niandi wumvananga bidia kuidi bibulu bi fioti

ayi kuidi bana ba ngonyi-ngonyi bu beti tela.

10 Khini andi yisi ko mu zingolo zi phunda

ayi yangalala kuandi kuisi ko mu malu ma mutu.

11 Yave weti yangalala mu batu bobo beti kunkinzika,

bobo bantulanga diana diawu mu luzolo luandi lungolo.

12 Yayisa Yave, a Yelusalemi ;

zitisa Nzambi aku, a Sioni ;

13 bila niandi wunkindisanga zitunga zi mielo miaku ;

ayi weti sakumuna batu baku badi mu ngeyo.

14 Niandi wuntulanga ndembama mu zindilu ziaku

ayi wukuyukutisanga mu ble yilutidi kitoko.

15 Niandi wumfidisanga zithumunu ziandi ku ntoto ;

mambu mandi meti tembakana mu thinu nsualu.

16 Niandi wumvananga mvula yi matadi banga mika mi dimemi ;

ayi wuntembikisanga disala banga dibombi.

17 Niandi wunlonzanga mvulꞌandi yi matadi banga matadi ma fioti

Nani wulenda telama va ntuala phemo andi yi kiozi e ?

18 Weti fidisa mambu mandi ayi weti kumasiutisa ;

weti vemuna phemo yi ngolo andi

ayi minlangu mieti kumba.

19 Niandi wuzabikisa mambu mandi kuidi Yakobi ;

mina miandi ayi zinzengolo ziandi kuidi Iseli.

20 Kasia bu vangila kadi kuidi dikanda dinkaka ko

basia zaba ko mina miandi.

Luzitisa Yave.