1 Wa, a Yave, ayi wuphani mvutu

bila ndidi nkua kiadi ayi ndidi nsukami.

2 Keba luzingu luama bila ndikiyekula kuidi ngeyo.

Ngeyo Nzambi ama, vukisa kisadi kiaku

kikusilanga diana.

3 Bika wumbona kiadi, a Yave,

Bila ngeyo ndieti tela mu lumbu kimvimba.

4 Nata khini kuidi kisadi kiaku.

Bila kuidi ngeyo, a Yave

ndieti vumuna muelꞌama.

5 Ngeyo widi wumboti ayi weti lemvukilanga ;

ayi widi wufuluka mu mamboti

kuidi bobo beti kutela.

6 Wa lusambulu luama, a Yave ;

wa bumboti yamikina kuama mu diambu di kiadi.

7 Mu lumbu ki ziphasi ziama ngeyo ndiela tela,

bila ngeyo wela kuphana mvutu.

8 A Va khatitsika zinzambi,

kuisi ko yoyi yidedikini banga ngeyo, a Yave

ayi kuisi ko mavanga madedakani banga maku.

9 Makanda moso momo wuvanga

mela kuiza ayi mela buongama va ntualꞌaku, a Yave,

ayi mela nata nkembo kuidi dizina diaku.

10 Bila ngeyo widi wunneni ayi ngeyo wumvanganga

mavanga matsiminanga ;

ngeyo kaka Nzambi.

11 Wundongi nzilꞌaku, a Yave

ayi ndiela diatila mu bukiedika buaku ;

bika wuphana ntima wukambu vasuka

muingi ndikinzikanga dizina diaku.

12 Ndiela kuzitisa, a Yave Nzambi ama,

mu ntimꞌama wumvimba

ayi ndiela kembisanga dizina diaku

mu zithangu zioso.

13 Bila luzolo luaku luidi lunneni kuidi minu

ngeyo wukhula mu zithipula zi tsi bafua.

14 Batu baluniemo balembo nduanisa, a Nzambi ;

ayi nkangu wu batu ba makhemi

balembo tombi luzingu luama ;

batu bakambulu thalu mu ngeyo.

15 Vayi ngeyo, a Yave, weti mona kiadi ;

yimonisanga nlemvo,

wuvika fuemanga ko ; fulukidi mu luzolo ayi mu kikhuikizi.

16 Baluka kuidi minu ayi wumboni kiadi ;

vana zingolo ziaku kuidi kisadi kiaku

ayi vukisa muana kisadi kiaku ki nketo.

17 Bika wuphana dimbu ki mamboti maku

muingi bambeni ziama zimona kiawu

ayi bafua tsoni

bila ngeyo Yave wutsadisidi ayi wumbombidi.