1 Wuphutudila mvutu bu ndilembo kutedi, a Nzambi ama yisonga

ayi wutsadisa bu ndidi mu phasi ;

wumboni kiadi, wa lusambulu luama.

2 Nate thangu mbi luela,

tatamana fuisa nkembo ama tsoni e ?

Nate thangu mbi luela tatamana zodilanga vanga mambu ma phamba

ayi tombanga zinzambi zi luvunu e ?

3 Luzaba mboti ti Yave wukisobudidi mutu wumosi

wunkinzikanga mambu mandi.

Yave wela wa mu thangu ndiela kuntela.

4 Ku tsi nganzi eno, kadi vola masumu.

Mu thangu luidi mu zimbuka zieno, lufiongunina mintima mieno

bosi luba dio sui.

5 Lutambika makaba ma busonga,

ayi lutula diana dieno mu Yave.

6 Bawombo balembo tubi :

"Nani wulenda kutumonisa mamboti e ?"

Bika kiezila ki zizi kiaku kitukienzula, a Yave !

7 Wuwesidi khini yiwombo mu ntimꞌama,

viokila yoyi yiba yawu mu thangu baba ble yiwombo

ayi vinu kiwombo

8 Ndiela lambadala ayi ndiela leka tulu mu ndembama

bila ngeyo veka kaka, a Yave

bila ngeyo veka kaka wukuphuandisanga mu luvovomo.