João 11

Ñkpa Lasarọs

1 Owo kiet emi ekekerede Lasarọs ama ọdọñọ. Enye okoto Betani, obio iñwañ emi Meri ye eyen eka esie Mata eketode. 2 Meri emi eyen eka esie ọkọdọñọde, ekedi enye emi ọkọduọkde Ọbọñ enem ufuọñ aran okonyuñ adade idet esie ọkwọhọrede ikpat Jisọs. 3 Nditọ eka Lasarọs iba ema enọ etop esọk Jisọs ete, "Ọbọñ, ufan emi Afo amade kọdọñọ."

4 Ke ini Jisọs okokopde etop emi, Enye ama ọdọhọ ete, "Udọñọ emi idisuñọke ke ñkpa. Edi ndida ubọñ nnọ Abasi man otodo Enye Abasi ọbọ ubọñ oto ke esit."

5 Jisọs ama ama Mata ye eyen eka esie añwan ye Lasarọs eti eti. 6 Ke ini Enye okokopde ete ke Lasarọs kọdọñọ, Enye ama osuk etie ke ebiet emi Enye okoduñde ke ñkpọ nte usen iba efen. 7 Do ke Enye ọkọdọhọ mme mbet Esie ete, "Eyak ñnyin ifiak ika Judia."

8 Mme mbet ema edọhọ Enye ete, "Andikpep, ibighike bighi mme Ju ekeyom nditọñọ Fi ke itiat, ndien Afo onyuñ oyom ndifiak ñka Judia?"

9 Jisọs ama obup ete, "Nte idighe awa ñkanika duopeba odu ke uwemeyo? Owo emi asañade ke uwemeyo isituakke ukot, koro enye okutde usuñ oto uñwana ererimbot emi. 10 Edi ke enye ama asaña isañ ke okoneyo ke enye edituak ukot koro enye minyeneke uñwana." 11 Ke Enye ama eketiñ mme ikọ emi ama, Enye ama aka iso etiñ ọnọ mmọ ete, "Ufan ñnyin Lasarọs ede idap, edi Ami ke ñka do ndidemede enye."

12 Mme mbet Esie ema ebọrọ ete, "Ọbọñ edieke enye edede, idem eyesọñ enye." 13 Jisọs eketiñ abaña ñkpa esie, edi mme mbet Esie ekekere ete mme Enye etiñ abaña ikpuikpu idap.

14 Do ndien ke Enye akasian mmọ añwa añwa ete, "Lasarọs akpa, 15 ndien ke ntak mbufo man otodo mbufo enim ke akpanikọ, Ami mmokop inemesit sia Ami mme ñkeduhọ do. Edi eyak ñnyin ika ibine enye."

16 Ndien Tọmọs emi ekotde Amanamba, ama ọdọhọ mme mbet eken ete, "Eyak ñnyin ñko ika, man ikakpa ye Enye."

17 Ke ini mmọ ema ekesim Betani, Jisọs ama ayarade ọfiọk ete ke ema ebebuk Lasarọs ke usen inañ emi ekebede. 18 Betani ekedi ñkpọ nte itiat iba ye Jerusalem. 19 Ndien ediwak ikpọ owo mme Ju ema edu ndidọñ Mata ye Meri esit ke ñkpa eyen eka mmọ. 20 Ke ini Mata okokopde ete ke Jisọs ke edi, ama ọwọrọ ebine Enye, edi Meri ama ọsuhọ ke ufọk.

21 Mata ama ọdọhọ Jisọs, ete, "Ọbọñ mi, edieke Afo okpokodude mi, eyen eka mi ikpikpaha. 22 Edi ami mmọfiọk nte kpa ke idem idahaemi, Abasi eyenọ fi sededi emi Afo edibupde."

23 Jisọs ama ọdọhọ enye ete, "Eyen eka fo eyefiak odu uwem."

24 Mata ama ọbọrọ ete, "Ami mmọfiọk nte ke enye eyedahada onyuñ enyene uwem ke akpatre usen."

25 Jisọs ama ọdọhọ enye ete, "Ami ndi ediset ke ñkpa ye uwem. Owo emi enimde Mi ke akpanikọ eyedu uwem, okposuk edi nte enye ama akakpa, 26 ndien owo ekededi emi odude uwem ndien enim Mi ke akpanikọ, idikpaha. Nte afo emenim emi ke akpanikọ?"

27 Enye ama ọbọrọ Jisọs, ete, "Ih Ọbọñ, Ami mmonim ke akpanikọ nte, ke Afo edi Andinyaña (Kraist) oro, Eyen Abasi, emi akanade nte edi ke ererimbot."

28 Ke Mata ama eketiñ mme ikọ emi ama, enye ama afiak edem aka ufọk ndien okokot eyen eka esie Meri esik ada, onyuñ ọdọhọ enye, ete, "Andikpep edi, ndien Enye koyom fi." 29 Ke ini Meri okokopde ikọ emi, enye ama adaha ada ke usọp onyuñ ebine Jisọs.

Jisọs Emenede Lasarọs

30 Jisọs ikedukke kaña obio iñwañ oro edi okosuk odu ke ebiet emi Mata okosobode Enye. 31 Ke ini mme Ju emi ekedude ke ufọk ndidọñ Meri esit ekekutde nte enye akadahade usọp usọp ọwọrọ anwa, mmọ ema etiene enye, ekere ete ke enye oyom ndika udi ñkatua eyen eka esie.

32 Ke ini Meri ama ekesim ebiet emi Jisọs okodude onyuñ okut Enye, enye ama ọduọ Enye ke ukot onyuñ ọdọhọ ete, "Ọbọñ, edieke Afo okpokodude mi, eyen eka mi ikpikpaha."

33 Ke ini Jisọs okokutde nte enye atuade eyet, ye nte ikpọ owo mme Ju emi esañade ye enye etuañade, esit ama ọbuñọ Enye eti eti. 34 Jisọs ama obup ete, "Ekebuk enye ke mmọñ?" Mmọ ema ebọrọ Enye Ete, "Di dise Ọbọñ." 35 Jisọs ama atua eyet.

36 Do ke mme Ju ekedọhọ ete, "Sese nte Enye akamade enye!"

37 Edi ubak mmọ ema edọhọ, ete, "Nte Enye emi akatatde mme nnan enyin ikpekemeke ndibiọñọ owo emi ndikpa?" 38 Ama otuk Jisọs ini kiet efen, ndien Enye ama asaña aka ke udi, ekedi aba emi eketibide ke itiat enyuñ eda itiat eberi ke nsañanduk esie.

39 Jisọs ama ọdọhọ ete, "Ekpat itiat emi efep." Edi Mata eyen eka akpa ñkpa ama ọdọhọ ete, "Edi Ọbọñ, ke utọ ini emi idiọk utebe eyedu, koro ekebuk enye ke ñkpọ nte usen inañ emi ekebede."

40 Jisọs ama ọdọhọ enye ete, "Nte Ami ñkọdọhọke fi nte edieke afo udunimde ke akpanikọ, afo eyekut ubọñ Abasi?"

41 Do ke mmọ ekekpat itiat esio. Ndien Jisọs emenerede enyin ese enyọñ onyuñ ọdọhọ ete, "Ete, sọsọño koro Afo omokop Mi. 42 Ami mmọdiọñọ nte ke Afo emesikop Mi kpukpru ini, edi Ami ñketiñ emi ke ntak ufọn mme mmọ emi edade mi, man otodo mmọ enim ke akpanikọ nte ke edi Afo ọkọdọñ Mi." 43 Ke Enye ama eketiñ mme ikọ emi ama, Jisọs ama okot ke ọkpọsọñ uyo, ete, "Lasarọs, wọrọ di."

44 Ndien akpa ñkpa ama ọwọrọ edi ye mbọbọ ọfọñ udi ye ọfọñ ke iso esie. Jisọs ama ọdọhọ ete "Etat enye mme mbọbọ udi oro, enyuñ enam enye enyọñ ufọk."