1 युसुफ लागअ लेरा लांदअ, संघा दैनी तेऊ आपणैं बाब याकबा प्रैंदै च़ुंज़ी-माख्खी अर मल़्हैची।

2 युसुफै किअ तिधी बैईदा लै हुकम कि इज़राईले देही दी मल़ा खुशबूदार च़िज़ा।

3 च़ाल़्ही धैल़ै तैणीं रहै तिंयां खुशबूदार च़िज़ा भरदै-मल़दै लागी। सोभी मिसर देशे लोगै किअ सत्तर धैल़ै तैणीं याकबा लै शोग।

4 ज़ांऊं शोग करने धैल़ै पूरै हुऐ, युसुफै बोलअ मिसर देशे सरकारी बज़ीरा का, "तम्हां का आसा मेरी अरज़ कि तम्हैं खोज़ा मेरी अरज़ मिसर देशे माहा राज़ै का एही कि 5 ‘मेरै बाबै आसा मरनै का आजी हाम्हां का एही ज़बान मांगी दी कि तेऊ दाबै कनान देशै एकी घोरी दी। ज़ै राज़अ मुल्है ज़ाज़त दैए, तै एछूं एऊ कामां पूरै करी फिरी।’"✝

6 मिसर देशे माहा राज़ै बोलअ इहअ, "डेऊ अर कनान डेऊई कर आपणैं बाबा लै दैनी दी ज़बाना पूरी।"

7-9 ज़ांऊं युसुफ आपणैं सोभी भरैरा संघी गोशेन मुल्खा का कनान डेऊणा लै निखल़अ, तेऊ संघै डेऊऐ तेऊए आपणैं सारै रिश्तैदार अर याकबे सारै रिश्तैदार, मिसर देशे माहा राज़ेए बडी पदबी दी सरकारी काम करनै आल़ै लोग, मिसर देशे कई सैणैं अर इधी तैणीं कि सैने दलपति बी डेऊऐ तेऊ संघै। इज़राईली मणछ रहै पिछ़ू सिधै लान्हैं-सुन्हैं अर भेडा-बाकरी, गाऊई-बल्द, गाधै-गाधी, ऊँट अर चैणें हेल़्ही।

10 ज़ांऊं तिंयां जरदण नदी पार निखल़ी आतादे खहल़ै पुजै, युसुफै किअ तिधी साता धैल़ी आपणैं बाबा लै लेरा लाई-लाई शोग।

11 कनानी लोगै बोलअ आतादे खहल़ै शोग भाल़ी इहअ, "मिसर देशे मणछ आसा घणैं दुखा दी पल़ै दै।"

तेखअ डाहअ तिन्‍नैं तैहा ज़ैगा नाअं, "मिसर देशे मणछा लै घणअ दुख।" *

12 तेखअ किअ याकबे सोभी शोहरू तिहअ ई ज़िहअ तेऊ तिन्‍नां का खोज़ी बोली थिअ डाहअ द।

13 तिन्‍नैं पजैल़अ सह कनान देशै ममरे नगरी नेल़ संघा डाहअ सह तैहा ज़ैगा मकपेला नाओंए घोरी दी दाबी ज़ुंण आबरामै एप्रोन हित्ती का मुल्दै दाबणा लै मोलै थिई लई डाही दी।✝

14 याकबे क्रिया-कर्म करी आऐ युसुफ, तेऊए भाई अर बाकी सोभै लोग मिसर देशा लै फिरी।

15 याकबे मरनै का बाद लागै युसुफे होर भाई आप्पू मांझ़ै गल्‍ला करदै, "किधी इहअ निं होए कि युसुफै अज़ी बी हाम्हां लै ज़ीद होए डाही दी, अर ज़िहै बूरै हाल हाम्हैं तेऊए किऐ, सह तेतो बदल़अ लए।"

16 तिन्‍नैं दैनअ युसुफा लै समाद, "बाबै आसा हाम्हां लै मरनै का आजी इहअ खोज़ी डाहअ द, 17 ‘तम्हैं किअ युसुफा लै बूरअ अर तेऊए किऐ तम्हैं बूरै हाल, पर तम्हैं मांगै तेऊ का माफी।’

"ऐबै आसा ज़ीबाण करी म्हारी ताखा एही अरज़ कि ज़ुंण हाम्हैं कशूर किअ, तेऊ पापा लै छ़ाड ऐबै हाम्हां लै माफी। हाम्हैं सोभै आसा भाल़ तेऊ ई एकी बिधाते दास ज़सरी च़ाकरी म्हारअ बाब करा त।"

ज़ांऊं युसुफै ईंयां गल्‍ला शूणीं, तेऊ का छ़ुटी लेरा। 18 तेखअ आऐ आप्पू बी युसुफे सोभै भाई तेभी युसुफा सेटा लै संघा बोलअ तेऊ सेटा उटी बाखा माथअ टेक्‍की करै इहअ, "हाम्हैं आसा तेरै गलाम।"

19 पर युसुफै बोलअ तिन्‍नां लै, "तम्हैं निं डरा आथी! बिधाता ज़िहअ करने बेठी गई, तेता निं हुंह बदल़ी सकदअ।

20 "तम्हैं सोठअ मुल्है कबल्‍लअ बूरअ करनअ, पर बिधाता बदल़अ सह भलाई दी, ताकि सह सोभी लोगा बच़ाऊई सके, ज़िहअ आझ़ हाम्हैं म्हारी आपणीं आछी भाल़अ।

21 "ऐबै निं तम्हैं डरदै लागा! हुंह करूं तम्हां अर थारै लान्हैं-सुन्हें हेर-सभाल़।" युसुफे इना गल्‍ला शूणीं आऐ तिंयां हल़कै शाहै बापस फिरी।

22 युसुफ रहअ आपणैं भाई-बंधा संघै मिसर देशै ज़ांऊं तैणीं सह एकी शौआ दसा साले अमरा ज़ांऐं निं गअ।

23 युसुफे अमर हुई मिसर देशै खास्सी, तेऊ भाल़ै एप्रैमे पोचै अर तेखअ पल़पोचै बी। तेऊ भाल़ै माकीरे शोहरू बी ज़ुंण मनिश्शे पोचै थिऐ अर तेऊ खलैऊऐ तिंयां आपणैं भोसल़ै।

24 युसुफै बोलअ मरनै का आजी आपणैं भाई का, "हुंह निं ऐबै खास्सअ ज़िऊंदअ। पर बिधाता डाहणअ थारअ धैन-खैल आप्पै, तेऊ हेरनै तम्हैं एऊ देशा का काढी तेऊ देशै पजैल़ी ज़िधा लै निंणे करार तेऊ म्हारै दाद-बाब आबराम, इसहाक अर याकबा का आसा किई दी। 25 तम्हैं दैआ मुल्है ज़बान कि ज़ेभै तम्हां बिधाता एऊ देशा का काढी तेऊ देशा लै निंए, तेभै निंयैं मेरै हस्तू बी आप्पू संघा।"✝

26 इहअ करै गअ युसुफ एकी शौआ दसा साले अमरा ज़ांऐं। तिन्‍नैं होरी डाही तेऊए ल्हास खुशबूदार च़िज़ा जैंदरी मिसर देशै एकी सदूका भितरी।