1 तेखअ हेरअ इज़राईली भिई तिहअ ई पाप करी ज़ेता का बिधाता नफरत करा। बिधाता दैनअ तिन्‍नां साता साला तैणीं मिद्यानी लोगे गलामी दी डेऊणैं। 2 मिद्यानी तै इज़राईली का खास्सै बलबान, इज़राईली लागै तिन्‍नां डरै जुहल़ी अर धारा बडै-बडै डुआरै लुक्‍की रहंदै।✝6:2 1 शमू. 13:6 3 इज़राईली ज़ेभै बी आप्पू लै साल-फसल बऊआ तै, मिद्यानी, अमोलकी अर होर पुर्बा बाखे लोग गोटा तै तिन्‍नां फेरा-फेर। 4 तिंयां डाहा तै डेरै पाई संघा करा तै तेऊ देशे सारी साल-फसल दखण गाज़ा तैणीं पठी बरैबाद। तिंयां लुटा तै इज़राईलीए भेडा-बाकरी, गाअ-बाछ़ू अर गाधै-गाधी पठी अर तिन्‍नां लै निं खाणां लै किछ़ै रहंदअ त। 5 तिंयां एछा तै तिन्‍नें डेरै अर डागै-धणा संघी, तिन्‍नां लुटदै एतरै खास्सै ज़िहै रैट्टै छ़ुंढ। तिंयां अर तिन्‍नें ऊँट हआ तै खास्सै ज़ेता कुंण गणी निं सकदै तै। तिंयां करा तै तेऊ देशा पठ बरैबाद। 6 इना मिद्यानी करै ती इज़राईलीए बूरी दशा हुई दी। तेखअ लागै इज़राईली खिरी बिधाता सेटा लेर-पकार पाई मज़त मांगदै।

7 मिद्यानी छ़ेक्‍की ती इज़राईलीए सोभै गल्‍ला लुटी, ज़ांऊं इज़राईली बिधाता का मज़त मांगी, 8,9 बिधाता छ़ाडअ आपणअ एक गूर इज़राईली सेटा अर तेऊ का दैनअ इज़राईली लै इहअ समाद, "हुंह आसा इज़राईलो परमेशर बिधाता, शूणां कि हुंह किज़ै बोला। तम्हैं तै मिसर देशै गलाम, मंऐं किऐ तम्हैं आज़ाद संघा पजैल़ै इधी एऊ देशै। इधी एऊ देशै बी ज़ुंणी देशै थारअ ज़िऊंणअ कठण किअ थिअ, मंऐं बच़ाऊऐ तम्हैं तिन्‍नां का बी, संघा किई तिन्‍नां एऊ देशा का बागै काढणा लै थारी मज़त। 10 हुंह बिधाता आसा थारअ परमेशर, मंऐं त तम्हां लै बोली डाहअ द कि इना अमोरी लोगे देअआ पूज़दै निं लागी ज़सरी ज़ैगा एभै तम्हैं आसा बस्सै दै। पर तम्हैं किई मेरी गल्‍ला शूणीं नां शूणीं।"

11 तेखअ हुअ एकी धैल़ै इहअ कि बिधातो स्वर्ग दूत आअ संघा बेठअ ओफरा नगरी एकी बडै महरूए बूटा गोधै ज़ुंण एबीएजेर टोलीए जोआश नाओंए मणछो थिअ। तेऊओ शोहरू गिदोन त मिद्यानी डरै लुक्‍की करै दाखे कोल्हू दी कणका फल़ाक्‍कदअ लागअ द।✝6:11 ज़ैह. 17:2 12 बिधातो सह स्वर्ग दूत आअ तिधी तेऊ सेटा संघा बोलअ तेऊ लै इहअ, "शूरबीर जोधैआ, ताह संघै आसा बिधाता।"

13 गिदोने दैनअ ज़बाब, "मेरै मालक, ज़ीबाण, तूह निं भाल़ै मेरी गल्‍लो बूरअ मनी, ज़ै बिधाता हाम्हां संघै आसा, तै किल्है आसा हाम्हां लै ईंयां आफ़ता पल़ी दी? हाम्हैं आसा प्रोढै का गल्‍ला शूणीं दी कि बिधाता म्हारै दाद-बाब किहै आणै महान च़मत्कार रहैऊई मिसर देशा का काढी। पर ईंयां आसा पराणैं ज़मानें गल्‍ला। ऐबै आसा बिधाता हाम्हैं पठी छ़ाडी हेरै दै अर मिद्यानीए डरै मस्सा ज़िऊंदै लागै दै।"

14 तेखअ बोलअ बिधाता आप्पै, "गिदोन, एऊ ई महान ज़ोरा संघै डेऊ तूह संघा कर इज़राईली मिद्यानी का आज़ाद। मंऐं छ़ाडअ भाल़ तूह आप्पै।"✝6:14 लुआ. 3:10-12

15 गिदोने दैनअ इहअ ज़बाब, "पर हे मेरै मालक, हुंह किहअ करै सका इज़राईली मिद्यानी का छ़ड़ैऊई? मनिश्शे गोत्रा दी सोभी टोली का होछ़ी आसा मेरी टोली अर मेरै टबरा मांझ़ै बी आसा हुंह इहअ ज़ुंण सोभी का पिछ़ू हआ।"

16 बिधाता दैनअ इहअ ज़बाब, "तूह सका एऊ कामां करी, हुंह रहणअ ताह संघै आप्पै। ताह मारनै मिद्यानी एकी मामुल्‍ली मणछा ज़िहै।"

17 गिदोने दैनअ बिधाता लै ज़बाब, "ज़ै तेरअ जश मुल्है आसा, तै रहैऊ मेरै बैहम दूर करना लै किज़ै नछ़ैण कि हुंह आसा असली दी ताह बिधाता संघै गल्‍ला करदअ लागअ द। 18 ज़ीबाण, हुंह लऊं ताल्है शकन-भोज़न भैंट आणी तेभै तैणीं निं तूह इधा का डेऊई आथी।"✝6:18 लुआ. 4:1

बिधाता बोलअ इहअ, "हुंह रहूं ताह फिरी एछणैं तैणीं इधी न्हैल़अ लागी।"

19 गिदोन डेऊअ तेऊए डेरै लै। तेऊ सटेऊई छ़ेल्हूए शिखा, संघा बणाऐं एक मण पिठे आखरै रोट-लुच़ी। शिखा पाई तेऊ च़ठै दी अर नेऊल़अ पाअ डबरै भितरी, संघा आअ दैनै तिंयां तेऊ बडै महरूए बूटा गोधै बिधाते स्वर्ग दूता लै।

20 स्वर्ग दूतै बोलअ तेऊ लै इहअ, "शिखा अर एऊ भोज़ना डाह इधी टोल्हा प्रैंदै संघा तरैल़ एथ प्रैंदै एऊ नेऊल़ै।" ज़िहअ स्वर्ग दूतै बोलअ गिदोने किअ तिहअ ई। 21 बिधाते स्वर्ग दूतै छ़ुंहीं तिंयां शिखा अर भोज़न आपणैं हाथे शोठी करै अर नढैऊऐ निखल़ी टोल्हा का आग अर तिंयां शिखा अर तेऊ भोज़नो हुअ दझ़ी करै छ़ार अर तेखअ निं गिदोना का सह स्वर्ग दूत तिधी शुझुअ।

22 तेखअ हेरअ गिदोने ज़ाणीं कि सह थिअ बिधातो स्वर्ग दूत अर तेऊ का छ़ुटी एही, "ओह! आझ़ भाल़अ मंऐं मेरै मालक बिधातो स्वर्ग दूत आछी सम्हनै स्मुखअ, ऐबै झ़ाणीं मेरी मौत होए!"

23 पर बिधाता बोलअ गिदोना लै इहअ, "तूह डाह निहंचअ, एता लै निं तूह डरै आथी, तूह निं मरनअ आथी।" 24 गिदोने च़िणीं तिधी बिधाता लै एक बेदी अर तैहा बेदी नाअं डाहअ तेऊ, "शालोम।" अह बेदी आसा आझ़ तैणीं बी ओफरा नाओंए ज़ैगा ज़ेथ एबीएजेर टोलीए लोग आसा बस्सै दै।

25 तैहा राची बोलअ बिधाता गिदोना लै इहअ, "तेरै बाबे गाऊईओ ज़ुंण दुजै सोओ बाछ़ू साता सालो आसा, तेऊ निंऊं संघा पा तैहा बाल देअए बेदी ढोल़ी ज़ुंण तेरै बाबै आसा बणाईं दी अर अशेरा देबीए तेऊ काठे डौंडा बी फाल़ ज़ुंण तैहा बेदी संघै आसा।✝6:25 लुआ. 34:13 26 तेखअ बणाऐं तैहा धारठीए मडाथरू दी आपणैं परमेशर बिधाता लै बधिया च़िणीं करै बेदी। तेखअ करै तूह तेऊ बाछ़ूओ बल़ीदान संघा करै तेता अशेरा देबीए डौंडे काठा करै पठी हूम।"

27 गिदोने निंयैं आपणैं दस दास आप्पू संघै, तेऊ किअ तिहअ ई ज़िहअ बिधाता तेऊ का खोज़अ त। पर तेऊ ती आपणैं टांडै-टबर अर नगरी होरी लोगे डअर बी, तैही निं तेऊ सह काम धैल़ी किअ अर सह डेऊअ तेता लै राची।

28 ज़ांऊं दुजै धैल़ै दोत्ती-दोत्थी नगरीए लोग सुत्ती उझ़ुऐ, तिन्‍नैं भाल़ी बाल देअए बेदी ढोल़ी दी अर तेता नेल़ अशेरा देबीओ डौंड धरनीं लाम्मअ फाल़ी डाहअ द। तिधी भाल़ी तिन्‍नैं एक होर बेदी च़िणीं दी अर हूम बल़ी किऐ दै बाछ़ूए हाड-मूंड पल़ै दै। 29 तिंयां लागै आप्पू मांझ़ै बोल्दै, "अह इहअ काम कुंणी किअ?" ओर्ही-पोर्ही पुछ़-ज़ाच़ करी लागअ तिन्‍नां का थोघ कि अह इहअ काम किअ जोआशे शोहरू गिदोने।

30 नगरीए लोग लागै गिदोने बाब जोआशा लै इहअ बोल्दै, "आपणैं शोहरू काढ ओर्ही बागै, हाम्हां करनअ सह मारी हक्‍क! तेऊ पाई बाल देअए बेदी ढोल़ी अर अशेरा देबीओ डौंड फाल़ी।"

31 पर जोआशे दैनअ तिन्‍नां मणछा लै इहअ ज़बाब ज़ुंण तेऊ बाखा तै एछदै लागै दै, "तम्हैं बाल देअआ पिछ़ू आसा झ़घलगदै लागै दै? तम्हैं बाल देअआ बच़ाऊंदै आसा आऐ दै? ज़ुंण तेऊ बाल देअआ पिछ़ू झ़गल़अ करे सह पाणअ राच भैणै का आजी मारी। ज़ै बाल देअ असली दी परमेशर होए, तै दैआ तेऊ आपणअ बदल़अ तेऊ का आप्पै लणैं ज़ुंणी तेऊए बेदी ढोल़ी।"✝6:31 1 राज़. 18:27 32 तधा बाद पल़अ गिदोना नाअं जरुबाल*6:32 जरुबाल मतलब बाल देअआ दै आपणअ बच़ाअ आप्पै करनै किल्हैकि जोआशे बोलअ त, "बाल देअआ दैआ आपणअ बदल़अ तेऊ का आप्पै लणैं ज़ुंणी तेऊए बेदी ढोल़ी।"

33 तेखअ किअ सारै मिद्यानी, अमोलकी अर पुर्बा बाखे लोगै आप्पू मांझ़ै एक्‍कअ संघा पाऐ तिन्‍नैं जरदण नदी आर टपी जज्रेल नाओंए खागै आपणैं डेरै।

34 बिधाते आत्मां बस्सी गिदोना दी, ज़ांऊं तेऊ नर्शिंगअ बाज़अ, एबीएजेर टोलीए लोग झाल़्हुऐ तेऊ सेटा लै शूणैं कि सह किज़ै बोला। 35 तेखअ दैनअ तेऊ मनिश्शे गोत्रे दुही मुल्खे लोगा लै आपणैं दूता का समाद अर तिंयां बी हुऐ तेऊ सेटा कठा। तेखअ दैनअ तेऊ आशेर, ज़बलून, नप्ताली गोत्रे इज़राईली लै समाद अर तिंयां बी पुजै तिधी तेऊ सेटा।

36 तेखअ लागअ गिदोन बिधाता पुछ़दअ, "हे बिधाता, तूह बोला इहअ कि ताह छ़ड़ैऊंणैं इज़राईली मुंह करै, 37 ज़ै इहअ ई थिऐ, तै लाई मंऐं धख ज़ेही ऊन इधी खहल़ै डाही, काल्‍ला दोत्ती लोल़ी ऐहा ऊना दी ओश पल़ी दी हुई अर बाकी लोल़ी धरनीं सारै दी शुक्‍कअ हुअ। तै ज़ाणूं हुंह कि ताह हेरनै मुंह करै इज़राईली छ़ड़ैऊई ज़ेही तंऐं ज़बान दैनी।"

38 सह हुअ ज़िहअ तेऊ बोलअ त तिहअ ई, ज़ांऊं दुजै धैल़ै दोत्ती-दोत्थी गिदोन सुत्ती उझ़ुअ तेऊ भाल़ी सह ऊन मठिल्‍ली करै अर तेता का निखल़अ थाल़ू भर पाणीं। 39 तेखअ बोलअ गिदोने बिधाता लै इहअ, "हे बिधाता, ज़ीबाण, तूह निं मुखा रुश्शी आथी, मंऐं लाई भिई एक गल्‍ल बोली। मुंह दै एकी बारी भिई परखी आपणअ बैहम दूर करनै। ऐबै लोल़ी मुंह काल्‍ला दोत्ती अह ऊन शुक्‍की भेटी अर फेर लोल़ी सारै दी ओश हुई पल़ी दी।"

40 तैहा राची बी किअ बिधाता तिहअ ई ज़िहअ गिदोने बोलअ त। ज़ांऊं गिदोन दुजै धैल़ै उझ़ुअ, तेऊ भाल़ी ऊन आसा शुक्‍की अर धरनीं आसा सारै दी ओश पल़ी दी।