1 Benɛ Apolo ngɛ fiɛe ngɛ Korinto ɔ, Paulo ya kpa mahi a nɔ kɛ gu Turkia kɛ ba je Efeso he nɛ e ba na kaseli fuu ngɛ. 2 Nɛ e bi mɛ ke, "Anɛ nyɛ na Mumi Klɔuklɔu ɔ benɛ nyɛ he Manye Munyu ɔ ye ɔ lo?" A ha heto ke, "Wa li nɔ́ nɛ o ngɛ tsɔɔe ɔ. Mɛni ji Mumi Klɔuklɔu ɔ?"

3 Paulo bi mɛ ekohu ke, "Lɛɛ mɛni nyɛ ke nyɛ he ye, be mi nɛ a ngɛ nyɛ baptisie ɔ?" Nɛ a de lɛ ke, "Nɔ nɛ Yohane Baptisilɔ ɔ tsɔɔ ɔ." 4 Paulo ya nɔ nɛ e de mɛ ke, Yohane Baptisilɔ ɔ fiɛ tsui tsakemi, nɛ lɔ ɔ se ɔ, nihi nɛ a baptisi mɛ ɔ, a he Yesu, nɔ nɛ Yohane wo si kaa e maa ba ngɛ e se ɔ nɔ nɛ a ye.

5 Benɛ a nu munyu nɛ ɔ nɔuu nɛ a ha nɛ a baptisi mɛ kɛ wo Nutsɔ Yesu biɛ mi. 6 Kɛkɛ nɛ Paulo kɛ e nine pue a nɔ, nɛ Mumi Klɔuklɔu ɔ ba a nɔ, nɛ a tu gbi slɔɔtohi nɛ a gba. 7 Nɛ nyumu ɔmɛ tsuo a hiɛmi maa pee nyɔngma kɛ enyɔ.

8 Kɛkɛ nɛ Paulo je kɛ ho kpe he ɔ ya nɛ e ya fiɛ Manye Munyu ɔ paa nyɔhiɔ etɛ sɔuu. E tsɔɔ mɛ níhi nɛ kɔɔ Mawu Matsɛyemi ɔ he. Nɛ e slɔ mɛ kaa a he Yesu nɔ nɛ a ye. 9 Se a ti ni komɛ bui lɛ tue, nɛ a tu munyu yayahi kɛ si Kristo. Lɔ ɔ he je ɔ, Paulo kpa fiɛmi ɔ ngɛ lejɛ ɔ. Nɛ e kɛ e kaseli ɔmɛ si mɛ kɛ ho kaselɔ ko nɛ a tsɛɛ lɛ ke Tirano ɔ ngɔ ya nɛ e ya fiɛɛ ngɛ e ni tsɔɔmi he ɔ daa ligbi. 10 Paulo fiɛ ngɛ Tirano ni tsɔɔmi he ɔ jeha enyɔ sɔuu. Nɛ nɔ tsuaa nɔ ngɛ Turkia zugba a nɔ, Yuda bi ɔmɛ kɛ Hela bi ɔmɛ tsuo nu Mawu Munyu ɔ. 11 Nɛ Mawu ha Paulo he wami nɛ e kɛ tsu nyakpɛ nihi fuu. 12 E ba mi kaa ke a ngɔ e klala duku loo e tade hɛ mi hami bo tete kɛ fɔ hiɔtsɛ loo nɔ ko nɛ mumi yayami ngɛ e mi nɔ ɔ, e naa he wami aloo mumi yayami ɔ jeɔ e mi.

13 Jamɛ a be ɔ mi ɔ, Yuda bi wɔtsɛ komɛ hu ngɛ si kpae nɛ a ngɛ mumi yayamihi hiae ngɛ nihi a mi. Nɛ a pee a juɛmi kaa a maa ngɔ Yesu biɛ kɛ ka mumi yayami ɔmɛ hiami nɛ a hyɛ ha. Nɔ́ nɛ a susu nɛ a ma de ji, "I ngɛ mo fae ngɛ Yesu, nɔ nɛ he munyu nɛ Paulo ngɛ fiɛe ɔ biɛ mi kaa o je kpo!" 14 Yuda no osɔfo Sikeva bihi kpaago ji nihi nɛ ngɛ kikɛmɛ a ni nɛ ɔ tsue. 15 Se benɛ a ka mumi yayami hiami ngɛ nyumu ko mi ɔ, mumi yayami ɔ de mɛ ke, "I le Yesu, nɛ i le Paulo hulɔ. Se nyɛɛ lɛɛ mɛnɔmɛ ji nyɛ?" 16 Kɛkɛ nɛ mumi yayamitsɛ ɔ tu ma a ti nihi enyɔ a nɔ nɛ e plaa mɛ nɛ e pee mɛ butuu. Kɛkɛ nɛ a tu fo kɛ a he gu kɛ je kpo ngɛ we ɔ mi.

17 Munyu nɛ ɔ gbɛ fia ngɛ Efeso zugba a nɔ tsuo nɛ Yuda bi ɔmɛ kɛ Hela bi ɔmɛ tsuo nu he, nɛ a ye gbeye, nɛ a wo Nutsɔ Yesu biɛ ɔ hɛ mi nyami babauu.

18,19 Enɛ ɔ ha nɛ kunya tsuli ɔmɛ nɛ ba bɔni Mawu jami ɔ ba nɛ a ba jaje a ni peemi ni ɔmɛ kɛ tsɔɔ. Nɛ a ngɔ a womi ɔmɛ kɛ a sɛbɛ ɔmɛ kɛ ba nɛ a sa mɛ kɛ la ngɛ ma nɔ. Benɛ a bu womi ɔmɛ a nya a, a na kaa a maa su sidi akpe nyɔngma. 20 Enɛ ɔ tsɔɔ bɔ nɛ Mawu Munyu ɔ ye kunimi ngɛ Turkia zugba a nɔ ha.

21 Benɛ a pee nɔ́ nɛ ɔmɛ se ɔ, Paulo to e yi mi ngɛ Mumi Klɔuklɔu ɔ demi nya kaa e sa nɛ e ya gu Makedonia kɛ Akaia kɛ ba Yerusalem. Nɛ e de ke, "Enɛ ɔ se ɔ, e sa nɛ ma ya Roma." 22 E tsɔ Timoteo kɛ Erasto nɛ ji e he piɛli enyɔ ɔmɛ nɛ a sɛ e hlami kɛ ho Makedonia ya, nɛ lɛ nitsɛ lɛɛ e hi Asia be bɔɔ ko.

23 Jamɛ a be ɔ mi nɔuu ɔ, pɛ agbo ko ba Efeso kaseli ɔmɛ a kpɛti. 24 Ejakaa Demetrio, sika hiɔ he galɔ ko bɔ gali apaa nɛ a ngɔ sika hiɔ kɛ pee wɔ tsuhi kɛ ha Hela bi a wɔ nɛ a tsɛɛ ke Diana a. 25 Nɛ Demetrio tsɛ e ni tsuli ɔmɛ kɛ ni kpahi nɛ tsuɔ jamɛ a ni tsumi ɔ eko ɔ kpe nɛ e de mɛ ke, "Anyɛmimɛ, nyɛ le kaa wa ga ni tsumi nɛ ɔ mi nɛ wa naa sika kɛ jee. 26 Se kaa bɔ nɛ nyɛ le momo ɔ, kikɛmɛ a Paulo nɛ ɔ puɛ nihi fuu a tue ke amagahi nɛ a kɛ nine pee ɔ, a pi mawuhi. Enɛ ɔ ha nɛ wa ni tsumi ɔ ngɛ si gbee, tsa pi ngɛ Efeso hiɛ ɔ kɛkɛ, se ngɛ zugba a nɔ tsuo. 27 Tsa pi wa ni tsumi ɔ nɛ ngɛ si gbee ɔ kɛkɛ nɛ he wa ha mi, se mohu be maa su nɛ Diana we ɔ kɛ Diana biɛ tete maa laa kulaa ngɛ Asia zugba nɔ kɛ je ɔ he fɛɛ he nɛ a jaa lɛ ngɛ ɔ."

28 Benɛ a nu kikɛmɛ a munyu nɛ ɔ, a na abofu nɛ a de kɛ ngmlaa ke, "Efeso bi a Diana a ngɛ he wami agbo!"

29 Amlɔ ɔ nɔuu nɛ ma a mi pee gidigidi, nɛ ma asafo nɛ bua a he nya a nu Paulo he piɛli nɛ je Makedonia nɛ a tsɛɛ mɛ ke Gaio kɛ Aristarko ɔ kɛ ho nɔ́ hyɛmi he ɔ ya konɛ a ya kojo mɛ. 30 Kɛkɛ nɛ Paulo hla kaa e maa sɛ nɔ́ hyɛmi he ɔ ngɛ ni ɔmɛ a kpɛti, se kaseli ɔmɛ kplɛɛ we lɛ. 31 Nɛ ja a nɔuu nɛ e huɛ Roma nikɔtɔma komɛ hu tsɔ kɛ ba slɔ lɛ ke e kó ya asafo ɔ kpɛti, ejakaa e ma sake e he lo kɛ fɔ he.

32 Jehanɛ ɔ ni ɔmɛ bɔni ngmlaa kpami kɛkɛ, nɛ a kpɛti nɔ ko li nɔ́ nɛ e nyɛmi ngɛ dee. Lejɛ ɔ kulaa pee basabasa, nɛ a ti nihi hiɛhiɛɛ li nɔ́ nɛ he je tete nɛ a ba lejɛ ɔ ngɛ.

33 Kɛkɛ nɛ Yuda bi komɛ yo Aleksandro ngɛ asafo ɔ kpɛti nɛ a tsitsɛɛ e yi se kɛ ba ni ɔmɛ a hɛ mi. Aleksandro wo e nine nɔ nɛ e ka kaa e maa tu munyu; 34 se benɛ asafo ɔ na le kaa Yuda no ji lɛ ɔ, a kpa ngmlaa ngmlɛfia enyɔ sɔuu nɛ a de ke, "Efeso bi a Diana a ngɛ he wami agbo!"

35 Benɛ ma womi ngmalɔ ɔ ha nɛ a pee dii ɔ, e de mɛ ke, "Anyɛmimɛ Efeso bi, nyɛ ti nɔ tsuaa nɔ le kaa Efeso ji ma nɔ he nɛ a jaa Diana nɛ e foni je hiɔwe kɛ ba wa ngɔ ɔ ngɛ. 36 Nɛ akɛnɛ nɔ tsuaa nɔ le enɛ ɔ he je ɔ, nɔ́ ko nɛ ko dɔ nyɛ, nɛ nyɛɛ pee gidigidi ke nɔ ko tu munyu ko kɛ si lɛ. 37 Se nimli nɛ ɔmɛ nɛ nyɛ nu kɛ ba hiɛ ɔ, a jui nɔ́ ko ngɛ Diana we ɔ, nɛ a pee we musu bɔmi nɔ́ ko hu kɛ si we lɛ. 38 Nɛ ke ji Demetrio kɛ gali ɔmɛ a kɛ nimli nɛ ɔmɛ na sane ko tete ɔ, lɛɛ kojomi he ɔmɛ ngɛ ni tsue amlɔ nɛ ɔ. Nɛ e sa kaa nyɛɛ kɛ mɛ nɛ ya konɛ a ya kojo mɛ ngɛ mlaa nya nɔuu. 39 Se ke munyu kpa komɛ a he i ɔ, lɛɛ Ma Kpe ɔ ma nyɛ maa hyɛ mi nɛ a dla. 40 Ejakaa wa ma na sane agbo ke Roma amlaalo ɔ ma tsɛ wɔ ke wa ba je wa nya ngɛ mwɔnɛ ɔ gidigidi nɛ ba nɛ ɔ he ɔ, i li bɔ nɛ ma je nya kɛ ha. Ejakaa e sɛ kaa kikɛmɛ a gidigidi nɛ ɔ baa."

41 Kɛkɛ nɛ e gbɛ kpe ɔ nɛ e wo mɛ blɔ.