1 Benɛ gidigidi ɔ nya ma si ɔ, Paulo tsɛ kaseli ɔmɛ kɛ kpe nɛ e fiɛ kɛ tsɔɔ mɛ, nɛ e kɛ mɛ ye sɛ, nɛ e si mɛ kɛ ho Akaia ya. 2 Se loko ji Paulo ya su Akaia a, e fiɛ ngɛ mahi nɛ ngɛ blɔ nɔ ɔ a mi. 3 E hi Akaia nyɔhiɔ etɛ, se akɛnɛ Yuda bi ɔmɛ to e he ga nɛ a maa gbe lɛ benɛ e ngɛ hlae nɛ e ya Siria a, e tsake blɔ ɔ kɛ ya gu Makedonia yi nɔ.

4 Nɛ nihi fuu piɛ e he kɛ ba su Asia. Nimli nɛ ɔmɛ ji Sopatre nɛ je Beroia nɛ e tsɛ ji Pirho ɔ, kɛ Tesalonika bi enyɔ nɛ a tsɛɛ mɛ ke Aristarko kɛ Sekundo, kɛ Gaio nɛ je Derbe, kɛ Timoteo, kɛ Tihiko kɛ Trofimo nɛ a ji Asia bi nɛ kpale kɛ yaa a je ngɛ Turkia a. 5 Nimli nɛ ɔmɛ sɛ wa hlami nɛ a ya ngɛ wɔ mlɛe ngɛ Troia. 6 Se benɛ a gbe Hebemi gbijlɔ ɔ nya a, wa sɛ lɛ ngɛ Filipi ngɛ Hela zugba a yi nɔ blɔ. Nɛ wa ye ligbi enuɔ ngɛ wo ɔ nɔ loko ji wa ya su Troia ngɛ Turkia, nɛ wa hi lejɛ ɔ otsi.

7 Benɛ Hɔgba su nɛ wa kpe ngɛ Nutsɔ Niye ni he ɔ, Paulo tu munyu kɛ tsɔɔ mɛ kɛ ya si nyɔ mi kpɛti, ejakaa e maa hia blɔ e nɔ jena. 8 A su kanehi fuu ngɛ hiɔwe tsu ɔ nɔ he nɛ wa kpe ngɛ ɔ, nɛ lejɛ ɔ tsuo tsɔ. 9 Nɛ e ba mi kaa benɛ Paulo ngɛ munyu ɔ tue ɔ, mahe nɔ niheyo ko nɛ a tsɛɛ lɛ ke Eutiko ɔ nɔ. E hii si ngɛ siaudo etɛ ɔ saflɛ ɔ nya. Kɛkɛ nɛ e je lejɛ ɔ ba nɔ si nɛ e gbo.

10 Amlɔ ɔ nɔuu nɛ Paulo kple si nɛ e ya bu e nɔ, nɛ e fua lɛ kɛ wo e gugue mi nɛ e de asafo ɔ ke, "Nyɛ ko ye tsui, wami ngɛ e mi." 11 Kɛkɛ nɛ a kpale kɛ ho sãu ɔ nɔ ya nɛ a ya ye Nutsɔ Niye ni ɔ. Nɛ Paulo tsa e fiɛmi ɔ nɔ kɛ ya si makɛ he loko ji e si mɛ. 12 A wo niheyo ɔ kɛ ho nɛ e ngɛ hɛ ngmle, nɛ a bua jɔ a he saminya.

13 Wa sɛ lɛ kɛ sɛ hlami nɛ waa kɛ Paulo ya kpe ngɛ Aso, ejakaa lɛɛ e gu nane. 14 Benɛ Paulo ba na wɔ ngɛ Aso ɔ, waa kɛ lɛ tsuo wo lɛ kɛ ba Mitilene. 15 Wa hia kɛ je Mitilene nɛ e nɔ jena a, wa ba su Kio. Nɛ e nɔ jena ekohu ɔ, wa ba su Samo, nɛ e nɔ je nɛ pa na a, wa ba Mileto.

16 Jehanɛ ɔ, Paulo pee e juɛmi kaa e be wae ngɛ Efeso, ejakaa e ngɛ esɔ yee nɛ e ya su Yerusalem mla ngɛ Pentekoste ligbi ɔ he je. 17 Se benɛ wa ba su Mileto ɔ, e ha nɛ a ya tsɛ Efeso asafo nikɔtɔma amɛ nɛ a kɛ lɛ ba kpe.

18 Nɛ e de mɛ ke, "Nyɛ tsuo nyɛ le kaa kɛ je benɛ ye nane ma Asia zugba a nɔ́ kɛ ba si piɔ ɔ, 19 i tsu Nutsɔ ɔ ni tsumi ɔ kɛ he si bami kɛ dengme gbomi. I na amanehluhi kɛ gu klamahi nɛ Yuda bi ɔmɛ tsɔ nɛ a kɛ gbe mi ɔmɛ a mi. 20 Se kɛ ɔ, i hyɛ we ye se, nɛ i laa we nyɛ nɔ́ ko hulɔ, se mohu i de nyɛ nɔ́ nɛ ji anɔkuale ɔ ngɛ ma nɔ kɛ nyɛ wehi a mi. 21 Nɛ sɛ kake too ji nɔ́ nɛ i hɛɛ kɛ ha Yuda bi ɔmɛ kɛ ma je li tsuo, kaa mɛ kulaa a kpale ngɛ a yayami ɔmɛ a se, nɛ a he Nutsɔ Yesu Kristo nɔ nɛ a ye, konɛ a ba Mawu ngɔ.

22 Amlɔ nɛ ɔ, Mumi Klɔuklɔu ɔ ngɛ mi blɔ tsɔɔe kɛ yaa Yerusalem, nɛ i li nɔ́ nɛ ma ya ba ye nɔ ngɛ lejɛ ɔ. 23 Se mohu Mumi Klɔuklɔu ɔ ha nɛ i nu sisi kaa ngɛ ma fɛɛ ma mi ɔ, nɔ́ nɛ fɔɔ si ha mi ji tsu womi kɛ nɔ́ nami. 24 Se nami ko be ye wami he ke ji i kɛ tsu we ni tsumi nɛ Nutsɔ Yesu to kɛ ha mi ɔ, kaa ma fiɛ Mawu mi jɔmi kɛ e suɔmi Manye Munyu ɔ kɛ tsɔɔ ni kpahi ɔ.

25 Amlɔ nɛ ɔ hu i le kaa nyɛ nihi nɛ i nyɛɛ nyɛ kpɛti kɛ fiɛ Mawu Matsɛyemi ɔ he sane ɔ, nyɛ be ye hɛ mi nae hu. 26 Nɛ i ngɛ nyɛ dee ke i be nyɛ ti nɔ́ ko muɔ he tue gblami tlooe, 27 ejakaa i laa we nyɛ nɔ́ ko. I de nyɛ Mawu sɛ ɔ tsuo pɛpɛɛpɛ.

28 Lɔ ɔ he je ɔ, nyɛɛ hyɛ saminya; nɛ nyɛ kpaka Mawu to ɔmɛ nɛ ji asafo ɔ nɛ e he kɛ e muɔ nɛ he jua wa a, ejakaa Mumi Klɔuklɔu ɔ ma bi a ti nɔ nɛ maa laa a si ngɛ nyɛ de. 29 Nɛ i le pɛpɛɛpɛ kaa ke i si nyɛ se ɔ, lakpa tsɔɔli maa ba nyɛ ngɔ kaa ogbetee awi yeli nɛ a be nyɛ ti nɔ ko mɔbɔ nae. 30 Nyɛ ti ni komɛ tete ma plɛ anɔkuale ɔ hɛ mi ngɔ bu si bɔ nɛ pee nɛ a na se nyɛɛli. 31 Lɔ ɔ he je ɔ, nyɛɛ pee klaalo, nɛ nyɛ kai kaa jeha etɛ sɔuu nɛ i kɛ nyɛ ba hi si, nɛ i gbo nyɛ he dengme nyɔ kɛ pia, kɛ e mi amanehlu slɔɔtohi nɛ i na ngɛ nyɛ he.

32 Nɛ jehanɛ ɔ, i ngɛ nyɛ toe kɛ ngɛ Mawu kɛ e dloomi munyu ɔ nɛ haa nɛ nɔ hemi kɛ yemi pii si ɔ dɛ woe, konɛ e ha nyɛ gbosi níhi nɛ e to kɛ ha nihi nɛ e hla kɛ ha e he ɔmɛ.

33 Sika loo tade nɛ ngɛ fɛu ko he hia we mi hyɛ gblee, 34 nɛ nyɛ nitsɛmɛ nyɛ le kaa ye nine nɛ ɔ nɔuu nɛ i kɛ tsu ni kɛ lɛ ye he kɛ nihi nɛ piɛ ye he ɔ tete. 35 Nɛ i kɛ nɔ́ nɛ ɔmɛ tsɔɔ nyɛ kaa ja a nɛ e sa nɛ a tsu ni nɛ a kɛ ye kɛ bua ohiafohi, ejakaa i kai Nutsɔ Yesu munyu nɛ e tu ɔ ke, ‘Jɔɔmi ngɛ nɔ́ hami mi pe e hemi.’ "

36 Benɛ Paulo nya nɔ si ɔ, e kpla si nɛ e kɛ mɛ sɔle, 37 nɛ a fo ya saminya. A fua lɛ nɛ a kɛ lɛ ye se. 38 Nɛ aywilɛho nu mɛ nɛ a hao, ejakaa e de mɛ ke a be lɛ nae hu. Kɛkɛ nɛ a ya je lɛ blɔ ngɛ lɛ ɔ mi.