Mateus 23

Kristo tu Farisi bi ɔmɛ a tɔmihi a he munyu

1 Jehanɛ ɔ, Yesu de asafo ɔ kɛ e kaseli ɔmɛ ke, 2 "Nyɛ ma susu kaa mlaa tsɔɔli ɔmɛ kɛ Farisi bi ɔmɛ ɔ, Mose we bi ji mɛ ngɛ mlaahi nɛ a ngɛ woe ɔ he je. 3 E sa kaa nyɛɛ ye nɔ́ tsuaa nɔ nɛ a ma de nyɛ ɔ nɔ mohu, se nyɛ ko pee a ni peemi ni ɔmɛ, ejakaa a deɔ mohu se a pee we. 4 A biɔ nyɛ nɛ nyɛɛ pee níhi nɛ mɛ nitsɛmɛ a be nyɛe maa pee.

5 A suɔ nɛ nɔ́ tsuaa nɔ nɛ a maa pee ɔ nihi nɛ na mɛ. A kplaa Ngmami Klɔuklɔu ɔ mi munyuhi, nɛ a peeɔ a tade ɔmɛ a nya gagaaga. 6 Nɛ be fɛɛ be ke a tsɛ mɛ niye ni ɔ a suɔ nɛ a hi okplɔɔ yi kɛ nikɔtɔmahi a sihi hehi ngɛ kpe he ɔmɛ. 7 Nɛ a suɔ jua nɔ kɛ gbɛjegbɛ nɔ ngami ɔmɛ kɛ tsɛmi nɛ a tsɛɛ mɛ ‘Tsɔɔlɔ’, kɛ ‘Nutsɔ’ ɔ. 8 Se nyɛɛ lɛɛ nyɛ ko ha nɛ a tsɛ nyɛ ja, ejakaa Mawu nɔ kake pɛ ji nyɛ Tsɔɔlɔ, se nyɛ tsuo lɛɛ nyɛmimɛ ji nyɛ. 9 Nyɛ ko tsɛ nɔ ko ngɛ zugba nɛ ɔ nɔ ke, ‘Tsaatsɛ,’ ejakaa Mawu nɛ ngɛ hiɔwe ɔ ji nyɛ tsɛ, nɛ lɛ pɛ e sa nɛ a tsɛ ja. 10 Jehanɛ ɔ hu a ko tsɛ nyɛ ‘Nutsɔ,’ ejakaa nɔ kake pɛ ji nyɛ nutsɔ, nɛ lɛ ji Kristo.

11 Nɔ nɛ sɔmɔɔ ni kpahi kɛ he si bami ji ngua. Lɔ ɔ he je ɔ, nɔ nɛ suɔ kaa e pee ngua pe kulaa ngɛ nyɛ kpɛti ɔ, e plɛ nyɛ sɔmɔlɔ. 12 Nɛ nɔ tsuaa nɔ nɛ ma wo e he nɔ ɔ, a maa ba lɛ si, nɛ nɔ tsuaa nɔ nɛ maa ba e he si ɔ, a ma wo e nɔ gojoo.

13 Kpoo ha nyɛ, Farisi bi kɛ mlaa tsɔɔli, osatotsɛmɛ! Ejakaa nyɛ ha we ni ɔmɛ he blɔ nɛ a sɛ Hiɔwe Matsɛyemi ɔ mi, nɛ nyɛ nitsɛmɛ hu nyɛ sɛ we mi. 14 Osatotsɛmɛ! Nyɛ peeɔ nyɛ he kaa nihi nɛ a he tsɔ, nyɛ sɔleɔ gagaaga ngɛ ma hɛ mi ngɛ gbɛjegbɛ ɔmɛ a nɔ, se nyɛ fieɔ yalɔyihi kɛ jee a wehi a mi. 15 I ngɛ dee ke kpoo ha nyɛ, Farisi bi kɛ mlaa tsɔɔli, osatotsɛmɛ! Nyɛ gboɔ dengme bɔ nɛ sa kɛ tsakee nɔ ko, se ke nɔ ɔ tsake pɛ nyɛ kpaleɔ peeɔ lɛ Abosiami bi ngwɔ he enyɔ pe bɔ nɛ nyɛ nitsɛmɛ nyɛ ngɛ ɔ. 16 Due ha nyɛ, blɔ tsɔɔli hɛ ngmɛ kokoetsɛmɛ! Nyɛ nihi nɛ nyɛ deɔ ke, ke a kɛ ‘Mawu We ɔ’ ka kita nɛ e pi nɔ ko, se ke a kɛ ‘Sɔlemi We ɔ mi sika tsu ɔ’ ka kita lɛɛ due ɔ! 17 Kuasiahi nɛ hyɛ we nɔ, te nɔ́ nɛ kle nɛɛ, sika tsu ɔ loo Sɔlemi We ɔ nɛ tsukɔɔ sika tsu ɔ he ɔ? 18 Nɛ nyɛ deɔ hu ke, ke nɔ ko kɛ ‘Bɔ sami la tɛ ɔ’ ka kita nɛ e pi nɔ ko, se ke e kɛ ‘Nike ni nɛ ngɛ bɔ sami la tɛ ɔ nɔ’ ka kita lɛɛ due! 19 Hɛ ngmɛ kokoetsɛmɛ, te nɔ nɛ kle nɛɛ, bɔ ɔ loo bɔ sami la tɛ ɔ nɛ haa bɔ ɔ he tsɔɔ ɔ? 20 Ke o kɛ ‘Bɔ sami la tɛ ɔ’ ka kita a, e tsɔɔ kaa o kɛ la tɛ ɔ kɛ nɔ tsuaa nɔ nɛ ngɛ la tɛ ɔ nɔ ɔ ka kita, 21 nɛ ke o kɛ ‘Sɔlemi We ɔ’ ka kita a, e tsɔɔ kaa o kɛ Sɔlemi We ɔ kɛ Mawu nɛ hii mi ɔ ka kita. 22 Nɛ ke o kɛ ‘Hiɔwe’ ka kita a, e tsɔɔ kaa o kɛ Mawu Matsɛ Sɛ ɔ kɛ Mawu nitsɛ ka kita.

23 I ngɛ nyɛ dee ke kpoo ha nyɛ Farisi bi kɛ mlaa tsɔɔli, osatotsɛmɛ! Nyɛ haa mi dlami nyɔngma a ngɛ nyɛ ngmɔ mi nɔ fɛɛ nɔ nɔ pɛpɛɛpɛ, se nyɛ siɔ níhi nɛ a he hia pe kulaa a mohu, nɛ ji dami sane yemi, mɔbɔ nami kɛ hemi kɛ yemi ɔ. E sa kaa nyɛ ha mi dlami nyɔngma a, se nyɛ ko si ni nɛ ɔmɛ nɛ a he hia a hu fa. 24 Blɔ tsɔɔli nɛ hyɛ we nɔ, nyɛ tsleɔ anunu ngɛ nɔ nɔ, se nyɛ mii afukpɔngɔ!

25 Kpoo ha nyɛ, Farisi bi kɛ mlaa tsɔɔli, osatotsɛmɛ! Nyɛ kpo nɔ blɔ ngɛ falefale, se nyɛ mi blɔ hyi gbagbaagba kɛ ojo fiami kɛ hɛ kɔ. 26 Farisi bi nɛ nyɛ hɛ yu, nyɛɛ tsu nyɛ mi blɔ he nɛ e je kekle loko ji nyɛ he tsuo maa je.

27 Kpoo ha nyɛ, Farisi bi kɛ mlaa tsɔɔli, osatotsɛmɛ! Nyɛ ngɛ kaa yɔkɔhi nɛ a he ngɛ fɛu se a mi hyi tɔ kɛ ni gbogboehi a wuhi kɛ mu níhi slɔɔtohi. 28 Ja a nɔuu nyɛ hu nyɛ peeɔ nyɛ he kaa dali se osato kɛ yayami sɔuu nɛ hyi nyɛ tsui mi tɔ.

29 Kpoo ha nyɛ, Farisi bi kɛ mlaa tsɔɔli, osatotsɛmɛ!Nyɛ maa gbali ɔmɛ a yɔkɔ ɔmɛ, nɛ nyɛ dlaa dali ɔmɛ nɛ nyɛ tsɛmɛ ɔmɛ kpata a hɛ mi ɔ a yɔkɔ ɔmɛ a he kɛ mɔmɔhi, 30 nɛ nyɛ deɔ ke, ‘E ji wa tsɛmɛ a yi nɔ nɛ a fɔ wɔ ngɛ jinɛ wa ko piɛ we a he nɛ a tane gbali ɔmɛ a yi.’

31 Enɛ ɔ tsɔɔ kaa nyɛ ngɛ nyɛ nitsɛmɛ nyɛ he odase yee kaa yi kpɛti wali a bimɛ ji nyɛ. 32 Nɛ nyɛ ngɛ a ni peemi ni ɔmɛ pee, ejakaa nyɛ ngɛ a yayami ɔmɛ a nɔ tsae. 33 Sinɔhi a bimɛ! Kɛ nyɛ maa pee kɛ tu Abosiami a je kojomi ɔ nya fɔ kɛɛ?

34 Ma tsɔ gbali kɛ ni leli kɛ mlaa tsɔɔli kɛ ba nyɛ ngɔ, nyɛ maa gbe a ti nihi, nɛ nyɛ maa sɛu ni komɛ. Nɛ ni komɛ hu nyɛ maa fiaa a se mi kpa ngɛ nyɛ kpe he ɔmɛ, nɛ nyɛ maa fie mɛ kɛ je nyɛ ma amɛ a mi, 35 konɛ nyɛɛ ye dali ɔmɛ tsuo nɛ nyɛ gbe kɛ je Habel nɔ kɛ ba si Zakaria nɛ ji Barakia bi ɔ nɛ nyɛ gbe ngɛ Sɔlemi We ɔ kɛ bɔ sami la tɛ ɔ kpɛti ɔ, a muɔ yi fɔ. 36 Anɔkuale, i ngɛ nyɛ dee ke fɔ bumi nɛ ɔmɛ tsuo maa ba yi nɔ bi nɛ ɔmɛ a nɔ.

37 Oo Yerusalem, Yerusalem, mo ma nɛ o gbee gbali ɔmɛ nɛ o fiaa nihi tsuo nɛ Mawu tsɔ mɛ o ngɔ tɛ ɔ. Si nyɛmɛ nɛ i hla we kaa ma bua o bimɛ a nya kaa bɔ nɛ kungwɔ buaa e bimɛ a nya kɛ woɔ e pɛlihi a sisi nɛ o kplɛɛ we. 38 Lɔ ɔ he je ɔ, amlɔ nɛ ɔ, a si o we ɔ we doku ha mo. 39 Nɛ i ngɛ mo dee ke, kɛ je be nɛ ɔ mi kɛ yaa a, o be mi nae hu kɛ yaa si be nɛ o ma de kɛ, ‘A gbaa nɔ nɛ ma ngɛ Nutsɔ ɔ biɛ mi ɔ.’ "