1 Be mi nɛ Yesu kɛ e fɔli ɔmɛ ngɛ Nazaret ɔ, Yohane Baptisilɔ ɔ ngɛ fiɛe ngɛ Yudea nga a nɔ ke, 2 "Nyɛɛ kpale ngɛ nyɛ yayami ɔmɛ a se, nyɛɛ ba Mawu ngɔ, ejakaa Hiɔwe Matsɛyemi ɔ su si ta." 3 Gbalɔ Yesaia tu Yohane Mawu Munyu fiɛmi nɛ ɔ he munyu momoomo nɛ e ngma ngɛ he ke,

"I nu nɛ nɔ ko ngɛ ngmlaa kpae ngɛ nga a nɔ ke,

‘Nyɛɛ je blɔ kɛ ha Nutsɔ ɔ.

Nyɛ dla blɔ nɛ Nutsɔ ɔ maa nyɛɛ nɔ ɔ nɛ e da tlɔmɔɔ!’ "

4 Yohane ɔ, afukpɔngɔ he bwɔmi nɛ a kɛ lo e tade ɔ, nɛ e wo lohwe he womi ngɔ pee kpa nɛ e kɛ fi e mlɛ mi; nɛ e niye ni ji baalɛ kɛ nga nɔ hwo.

5 Nihi fuu je Yerusalem kɛ Yordan Dɔ ɔ mi kɛ Yudea zugba a nɔ he fɛɛ he kɛ ba e ngɔ ngɛ nga a nɔ ba bu e fiɛmi ɔ tue, 6 nɛ e baptisi nihi nɛ nu a he sisi kaa yayami peeli ji mɛ ɔmɛ ngɛ Yordan Pa a mi.

7 Se benɛ Yohane na kaa Farisi bi ɔmɛ kɛ Saduki bi ɔmɛ hu a ti nihi fuu ma e ngɔ nɛ e baptisi mɛ ɔ, e de mɛ ke, "Sinɔhi a bimɛ, mɛnɔ slɔ nyɛ ke nyɛɛ ma Mawu abofu nɛ ma a nya fo? 8 Loko ma baptisi nyɛ ɔ, nyɛɛ pee níhi nɛ maa tsɔɔ kaa nyɛ kpale ngɛ nyɛ yayami ɔmɛ a se. 9 Nyɛ ko susu nɛ nyɛ de ke, wɔɔ lɛɛ wa ye wa he, ejakaa Abraham bimɛ ji wɔ. Se i ngɛ nyɛ dee ke Mawu ma nyɛ tsake tɛ nɛ ɔmɛ ngɛ hiɛ ɔ ngɔ pee bimɛ kɛ ha Abraham.

10 Amlɔ nɛ ɔ Mawu gbiɛ ɔ fɔɔ si ngɛ tso ɔmɛ a sisi, nɛ a maa po tso fɛɛ tso nɛ wui yiblii kpakpa a, nɛ a maa tsɔ lɛ la.

11 Ami lɛɛ nyu nɛ i ngɔ kɛ ngɛ nihi nɛ tsake a tsui ɔ baptisie; se nɔ ko ma nɛ kle pe mi; Jamɛ a nɔ ɔ kle hluu tsɔ pe mi bɔ nɛ i sɛ nɔ nɛ tlooɔ e tokotahi pohu! Lɛ ji nɔ nɛ ma ba baptisi nyɛ kɛ Mumi Klɔuklɔu ɔ kɛ la. 12 E maa hla blɛfo ɔ ngɛ dudusa a mi nɛ e ma wo blɛfo ɔ ngɔ to blɛfo gba nɔ, nɛ e maa ngɔ dudusa a kɛ wo la nɛ be gboe gbleegbleegblee ɔ mi."

13 Kɛkɛ nɛ Yesu si Galilea kɛ ba Yordan Pa a nya konɛ Yohane nɛ baptisi lɛ. 14 Se Yohane sume nɛ e baptisi lɛ nɛ e de lɛ ke, "Enɛ ɔ dɛ blɔ, ami mohu nɛ e he hia kaa o baptisi mi."

15 Yesu ha Yohane heto ke, "Moo baptisi mi kɛkɛ. E sa nɛ ma pee nɔ́ tsuaa nɔ ngɛ e blɔ nɔ." Kɛkɛ nɛ Yohane kplɛɛ nɛ e baptisi lɛ.

16 Benɛ Yohane baptisi Yesu ta nɛ e je kpo ngɛ nyu ɔ mi pɛ nɛ a bli hiɔwe nya ha lɛ, nɛ e na Mumi Klɔuklɔu ɔ nɛ ngɛ si kplee kaa obleku lahuɛ. 17 Nɛ gbi ko pɛ kɛ je hiɔwe de ke, "Nɔ nɛ ɔ ji ye suɔmi Bi nɛ i naa e he bua jɔmi babauu ɔ nɛ."