ବିନ୍ ଲକ୍ମନର୍ ପାଇ ନିଇମିଆର୍ ଚିନ୍ତା
14 ଆରି, ମୁଇ ଜିଉଦା ଦେସେ ସେମନର୍ ମୁକିଆ ବାଚି ଅଇରଇଲା ବେଲେଅନି, କଇବାକେ ଗାଲେ, ଅର୍ତକସ୍ତ ରାଜାର୍ ସାସନ୍ କର୍ବାବେଲର୍ କଡେ ବରସ୍ ତେଇଅନି ତିରିସ୍ ଦୁଇ ବରସ୍ ଜାକ ବାର ବରସ୍ ପତେକ୍ ମୁଇ ମର୍ ବାଇମନର୍ ମୁକିଆ କାଦି କାଉ ନାଇ । 15 ମାତର୍ ମର୍ ଆଗ୍ତୁ ରଇଲା ମୁକିଆମନର୍ କାମ୍ଦାମ୍ ମୁଇ ଲକ୍ମନ୍କେ ବଇବାକେ ପଡ୍ଲା, ସେମନ୍ ଚାଲିସ୍ ସେକଲ୍ ରୁପା ଆରି ବିନ୍ ଲକର୍ ଲଗେଅନି କାଦି ଆରି ଅଙ୍ଗୁର୍ ରସ୍ ନେଲାଇ; ଅବ୍କା ସେତ୍କିସେ ନାଇ ସେମନର୍ ଉପ୍ରେ ସାସନ୍ ମିସା କଲାଇ; ମୁଇ ପର୍ମେସର୍କେ ଡରିକରି ସେନ୍ତାର୍ କାମ୍ କଲି ନାଇ । 16 ଆରି ମୁଇ ଏ ପାଚୁରି କାମ୍ କର୍ବାକେ ଲାଗିସେ ରଇଲି ଆରି ଆମେ କାଇମିସା ଜାଗା ଗେନୁ ନାଇ; ଆରି, ମର୍ ଦାଙ୍ଗ୍ଡାମନ୍ ସେ କାମେସେ ଲାଗିକରି ରଇଲାଇ । 17 ଅଇଲେମିସା ଆମର୍ ଚାରିବେଟ୍ତିର୍ ବିନ୍ବିନ୍ ଦେସ୍ମନର୍ ଆଇଲା ଲକ୍ମନ୍କେ ଚାଡିଦେଲେ ଜିଉଦି ଆରି ମୁକିଆମନ୍ ସଏ ପଚାସ୍ ଲକ୍ କାଇଲାଇ । 18 ସେ ବେଲେ ଦିନ୍କେ ଗଟେକ୍ ପସୁ ଆରି ଚଅଟା ମେଣ୍ଡା ମାରି ରାନ୍ଦ୍ତେ ରଇଲାଇ; ଆରି ମର୍ ପାଇ କେତେକ୍ ଚଡଇ ମାଉଁସ୍ ରାନ୍ଦ୍ତେ ରଇଲାଇ ଆରି ଦସ୍ ଦିନ୍କେ ତରେକ୍ ଅଙ୍ଗୁର୍ ରସ୍ ଦିଆ ଅଇତେ ରଇଲା; ଅଇଲେମିସା ମୁଇ ଏ ଦେସର୍ ଲକ୍ମନ୍କେ କାଦିକଣ୍ଡା ମାଙ୍ଗି ନାଇ, କାଇକେବଇଲେ ଏ ଲକର୍ ଉପ୍ରେ ଏ ସର୍ତେ କାମ୍ ବଜ୍ ଚାପାଇ ଅଇରଇଲା । 19 ଏ ମର୍ ପର୍ମେସର୍, ମୁଇ ଏ ଲକ୍ମନ୍କେ ଜାଇ ଜାଇ କାମ୍ କରି ଅଚି, ମର୍ ମଙ୍ଗ୍ଲର୍ ପାଇ ସେଟା ଏତାଉ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)