Lébechuni Natán Dawidi
1 Aba lóunahani Wabureme profeta Natán arihei Dawidi. Dan lachülürünbei Natán lumoun, aba lariñagun lun:
—Ñéinñanu bián wügüriña lidan aban uburugu, rísiti aban hádangiñe, le aban, gudemeti. 2 Le rísibei, galügüniñati saragu mudún hama bágasu, 3 ánheinti le gudemebei, ábanrügüñoun tiraüraü mudún lilügün, lagañeihan. Ligía guánarügü agüriahabarun, aba taweiridun tiraüraü mudún tuguya luma hau lirahüñü, le leigin ligía téigibei, lidan likopun tata, laniguagu tarumuga. Hínsiñetu lun kei aban liráü! 4 Luagu aban weyu, aba lachülürün aba chülüdügüti lúbiñoun le rísibei, gama lumoun máhati rísiti ligía láfarun ni aban hádangiñe lilügüniña mudún o bágasu lun laranserun éigini lun chülüdügüti ligía, barürügülóun lilügün le gudemebei mudún luéi, aba láfarunu lun leigin le achülürübei.
5 Aba lagañidun Dawidi saragu lun wügüri ligía, aba lariñagun lun Natán:
—Fiñutina bun luagu Wabungiute, luagu le lan adügübalin katei le, lunti lan lounwen. 6 Lunti giñe lafayeiruni tebegi tiraüraü mudún tuguya gádürü wéiyaasu lugundun magudemenihabuti!
7 Ábati lariñagun Natán lun:
—Buguya wügüri ligía! Ani anihán lererun Wabureme le Lubungiute Ísüraeli: "Anúadira numutibu lurúeiteme Ísüraeli, ani sefu numutibu luéi lubafu Saulu; 8 ru numutu lani Wabureme palasiu bun hau lúmarigu, runéi arúeihani Ísüraeli luma Hudá bun. Lun hamuga lougua lan sun lira, níchuguña hamuga saragu amu katei bun. 9 Ka uagu bíchiga mebereseni lau nererun, aba badügüni le aubei magundan nan? Áfaraba Uríasi le Étüna, lau báfaragüdüni houn Amonna, aba banügünu lúmari. 10 Keiti rúhadibu lubéi mebereseni nau, lau banügünu lúmari Uríasi lun búmarime, magumuchadibei lanarime igañi búbiñegiñe. 11 Nariñahare, au Aburemei: Nadügüba lun liabin wuribani buagun hámagiñe guánarügü biduheñu, ábame nanügüniña búmarigu, ábame níchuguniña lun aban hádangiñe biduheñu, ábame lagamariduniña wéyuagu. 12 Aramudaguarügü badügei le badügübei, ánheinti au, nadügübei wéyuagu, ligibugiñe sun Ísüraeli".
13 Aba lariñagun Dawidi ligibugiñe Natán:
—Afigouhaadina ligibugiñe Wabureme.
Lariñaga Natán lun:
—Mabeichun lubadibu Wabureme luéigiñe bifigoun, ani móunwenbadibu giñe luéigiñe.