Atos 3

Petulo angumuponetsa chiteve kwa Litawa lya Yesu

1 Siku yimwe satisa ya mumihe, Petulo na Yohana vavaga vam’bita kusala ha Nyumba ya Mulungu. 2 Ihyo kwavaga na munu yumwe yo avaga chiteve luhuma kuleleka kwake. Munu uyo ategulwaga na vanu chila siku, na vamuvikaga ha lwitsi lwa Nyumba ya Mulungu lo lwachemwaga, "Lwitsi Lunofu," ili asuche magobole kwa vanu wo vinjilaga ha Nyumba ya Mulungu. 3 Munu uyo ho avaga kuvawona Petulo na Yohana vankwinjila ha Nyumba ya Mulungu, akavasukaje vamupele magobole. 4 Petulo na Yohana vakamukangatsilaje miho, nayo Petulo akamulonjelaje "Utulave hetwe!" 5 Mwene yula chiteve akavapituchilaje kuno ana luhuvi lwa kupata chinu chochive kuhuma kwawo. 6 Kahi Petulo akamulonjelaje, "Heni ntsilihela magobole, lechelelo chila cho ntsinacho ngukupela. Kwa Litawa lya Yesu Chilisito va ku Natsaleti, wime na ujende!" 7 Petulo akamubataje liwoko lililo na kumwinula, luvala lulo fikasa fyake na mafugamilo gake gakapataje ludali. 8 Akadibukaje na kwima kwa magulu gake na kwantsa kujenda. Kahi akinjilaje hamwe na Petulo na Yohana ha Nyumba ya Mulungu, kuno an’jenda na kudibukadibuka na kumutsumitsa Mulungu. 9 Vanu veka wo vavaga hono hala vakamuwonaje fyo an’jenda na kumutsumitsa Mulungu. 10 Nawo vakatselaje kuta yo yula yo avaga angikala hivala ha Nyumba ya Mulungu ha lwitsi lo lwachemwaga, "Lwitsi Lunofu," kuno ansuka finu, nawo vakapomokaje na kiwutsa kuta luveye ndawuli lulongwa luno.