João 14

16 Naheni ngumusuka Dada vangu, nayo akuvapela Mutantsi yunji yo akikala na henye siku tseka bila wudugo. 17 Uyo yo Muhe va wukweli. Vanu va mu inyi tseka sivafuluche vamwanuchile kwasawuli sinambe vamuwone na sivamutsele. Lechelelo henye mumutsele kwasawuli alihamwe na henye, nayo angikala mugati mwenyu. 18 "Singuvaleka henye muve vachiva, nguwuya kaha kikala na henye. 19 Lung’ali luvala ludodo hela vanu va inyi sivakumbona kaha, lechelelo henye mukumbona, kwasawuli heni nguva mumi kaha, na henye mukuva na wumi wa kweli. 20 Siku yila hoyikuva kufika mukutsela kuta heni ntsili mugati mwa Dada, na henye muli mugati mwangu, na heni ntsili mugati mwenyu. 21 Vene wo vakugadichila malajitso gangu na kugadita, iwo wo van’ngana heni, nawo wo van’ngana heni vakuganwa na Dada vangu, na heni nguvagana na ngilajila kwa vene." 22 Ihyo Yuda, siyo yula Yuda Isikaliyote yo amupituche Yesu, akamuputsaje Yesu kuta, "Mutwa, yiveye ndawuli heve un’gana kilajila kwa hetwe, na siyo kwa vanu va inyi?" 23 Yesu akamupitulaje, vanu wo vakungana heni na kudita cho ntsinguvalonjela, vakutsidita ndongwa tsangu na Dada akuvagana, na heni na Dada vangu tukutsa kwawo na kikala hamwe nawo. 24 Munu yoyuve yosinambe angane heni, uyo yo sinambe adite chila chontsinlonga, na ndongwa tso ntsinguvapela siyo wangu, ila wunhuma kwa Dada yo anumile. 25 Ntsivadahitse ndongwa tsino hontsing’acha kuwuka. 26 Lechelelo uyo Mutantsi, yo Muhe va Mulungu, yo Dada vangu akumutuma kwenyu kukola katsi badili ya heni, akuvadahitsa ndongwa tseka na kuviwusa ndongwa tseka tsontsavalonje.