1 Né biaa bie wɔ Kaesarea bɔ bɛfrɛ ye Kornelio, né ɔte sogyaniɛ panyi wɔ kue bie bɔ bɛfrɛ ye Italy sogyafoɛ nanu. 2 Né ɔne ye awurofoɛ mva bɛ som nni angorɛ, na ne bɛsuro Nyameɛ; né ɔyɛ adɔyɛ paa, na daa biala né ɔbɔ Nyameɛ mbaeɛ. 3 Ɛlɛho yia bie, mmerɛ bɔ ne wabɔ kɔyɛ 3:00* ne, onyane anisoadehu, na onwuni Nyameɛ abɔfo pefee wɔ ye berɛ, yeɛ abɔfo ne ha hyirele ye kyɛ: "Kornelio!" 4 Na Kornelio naene ye haa, né osuro, na obisale ye kyɛ: "Me wura, nzu ane?" Abɔfo ne ha hyirele ye kyɛ: "Wɔ mbaeɛ ne wɔ adɔyɛ namukoraati adwu Nyameɛ nyunu, na ɔkaye ye mukoraati. 5 Yeti soma mmenia ma bɛhɔ Yopa, ná bɛɛfrɛ Simon bɔ bɛfrɛ ye Petro ne. 6 Sɔ biaa he wɔ Simon bɔ ɔfa ngaka nwomaa yɛ nningyein ne awuro, ná ye awuro ne wɔ ɛpo ne noa." 7 Abɔfo bɔ ɔne ye dwudwole ne hɔle nala pɛ, Kornelio frɛle ye ngoaa nanu nyɔ, yeɛ sogyaniɛ kõ bɔ osuro Nyameɛ, 8 na ɔhane bɔ wasi namukoraati hyirele bɛ, yeɛ ɔsomane bɛ maa bɛhɔle Yopa.

9 Aleɛ hene ne, mmerɛ bɔ bɛnate atee so bɔ né waha kaa maa bɛdwu kuro nanu ne, Petro hɔle sua ne ti afia kyɛ ɔkwaabɔ mbaeɛ, ne wabɔ kɔyɛ eyia 12:00.* 10 Ɛhɔen huni ye, yeti né ɔpena aleɛ di. Na mmerɛ bɔ bɛguso bɛyɛ aleɛ ne, nikye tɔle ye so.* 11 Onwuni kyɛ anwuro abukye, ná onwuni nikye bie, né wayɛ kyɛ ɛtena kandinga bɔ basosɔ ye noa nná nanu, ná bɛyakyi nu maa ofi anwuro ba ase. 12 Né keka biala bie wɔ nu, aseɛ he aso ngaka bɔ bɛ gya nná, ngaka bɔ bɛkõngõ, ne ewienu nnomaa mukoraati. 13 Yeɛ konviɛ bie ha hyirele ye kyɛ: "Petro, dwɔso, na ku bie di!" 14 Nakoso Petro hane kyɛ: "Awurade, ɛhe de ongosi lle; ofikyɛ akyiwadeɛ ne nikye bɔ ye nwo nde de, nnili bie lle." 15 Yeɛ konviɛ ne sa ha hyirele ye kyɛ: "Nningyein bɔ Nyameɛ ate ye nwo ne, nnɛka kyɛ ye nwo nde." 16 Konviɛ ne sa wale ye pɛn nza so, na ɛberɛ ala, bɛfale sɔ nikye ne bɛhɔle anwuro.

17 Mmerɛ bɔ Petro gu so ɔdwene bɔ anisoadehu ne kyire nanwo ne, né mmenia bɔ Kornelio asoma bɛ ne apena Simon awuro ne alaa banwu ye, na né bɛgyi anoa ne si berɛ. 18 Ná bɛteane nu bɛbisale kyɛ, Simon bɔ bɛfrɛ ye Petro ne wɔ berɛ a. 19 Petro gu so ɔdwene anisoadehu nanwo ne, honhom ne ha hyirele ye kyɛ: "Nea, mmenia nza bie pena wɔ. 20 Yeti dwɔso, dwu ase, na ɛne bɛ hɔ; nnɛmaa w’adwene nu yɛ wɔ nnaa, ofikyɛ me yeɛ masoma bɛ ɔ." 21 Yeti Petro hɔle mmrienzua nemɔ berɛ wɔ aseɛ nwo dɔ, na ɔhane kyɛ: "Sona bɔ ɛmɔpena ye ne ɛhe. Ɛwa de, ɛmɔ amaneɛ?" 22 Bɛhane kyɛ: "Kornelio te sogyaniɛ panyi bɔ ɔtengyɛ na osuro Nyameɛ, ná Yuda maen namukoraati ka ye nwo dwirɛ pa. Ná abɔfo krongron bie fale akwankyerɛ fili Nyameɛ dɔ brɛle ye kyɛ, ɔma bɛɛfrɛ wɔ bɛbra ye awuro, ná otie bɔ ɛle ye ka ɔ." 23 Yeti, ɔmaa bɛɛtenane ye berɛ.

Na aleɛ hene ne, ɔdwɔsole, na ɔne bɛ hɔle. Ná aliemaa mɔ bɔ bɛwɔ Yopa ne bie ne ye hɔle. 24 Ná kyẽa bɔ ole berɛ ne, bɛdwuli Kaesarea. Né Kornelio nea bɛ atee, na né wafrɛ ye abusuafoɛ ne ye nnamvo mukoraati. 25 Petro dwuli berɛ nala pɛ, Kornelio yiale ye, na obuli ndwerɛ wɔ ye gya bo kotole ye. 26 Nakoso Petro sɔle ye nu mane ye so, na ɔhane kyɛ: "Dwɔso, me koso, nde sona kyɛ wɔ ala!" 27 Mmerɛ bɔ ɔne bɛbɔ ngɔmmɔ ne, owurale awuro berɛ, ná onwuni kyɛ mmenia pee ayia berɛ. 28 Na ɔha hyirele bɛ kyɛ: "Ɛmɔse ye paa kyɛ, mmeraa mma atee kyɛ Yudaniɛ kɔfa ye nwo kɔbɔ ebie bɔ ofi maen foforɛ so, anaa okopingye ye po; nakoso Nyameɛ amaa manwu ye kyɛ, nnɛmaa meka kyɛ sona bie nwo nde, anaa ye nwo agua fiɛ. 29 Yeti mmerɛ bɔ ɛmɔ frɛle me kyɛ mmra ne, mambopo me ti koraa. Ɛhene ati mepena kyɛ menwu bɔ yeti yeɛ ɛmɔ frɛle me ne."

30 Yeɛ Kornelio hane kyɛ: "Ɛlɛnna ɛhe, kɔyɛ kyɛ sɔ mmerɛ he ala, né mebɔ mbaeɛ wɔ m’awuro berɛ kɔyɛ eyia 3:00,* na brienzua bie bɔ owura atadeɛ fufue hyɛnn oogyinane me nyunu berɛ, 31 yeɛ ɔhane kyɛ: ‘Kornelio, Nyameɛ ate wɔ mbaeɛ ne, na wakaye adɔyɛ bɔ ɛyɛ ne. 32 Yeti maa bɛhɔ Yopa, ná bɛɛfrɛ Simon bɔ bɛfrɛ ye Petro ne bɛbra. Sɔ biaa he wɔ Simon bɔ ɔfa ngaka nwomaa yɛ nningyein ne awuro, na ye awuro ne wɔ ɛpo ne noa.’ 33 Na ɛberɛ ala yeɛ nzomane kyɛ bɛɛfrɛ wɔ, yeɛ wɔ koso awa ne oo. Yeti, yɛ mukoraati yayia nu wɔ Nyameɛ nyunu, kyɛ yɛbaatie bɔ Awurade afa ama wɔ kyɛ ɛha hyire yɛ ne."

34 Na Petro hyɛle yebo kyɛ odwudwo, na ɔhane kyɛ: "Bekye bɔ manwu ye paa kyɛ, Nyameɛ nyeye mmenia nu, 35 mmom maen biala nu ne, ebiala bɔ osuro ye, na ɔyɛ bɔ okuro ne, odɛ́ ye to nu. 36 Nyameɛ fale ye dwirɛ mane Israel mmaa nemɔ, na ɔhane asomdwie bɔ ɔnate Yesu Kristo so nanwo nzɛmba, sɔ Yesu he yeɛ ɔte yɛ mukoraati Awurade ne. 37 Ɛmɔ bɔbɔ ɛmɔse edwirɛ bɔ bɛhane ye wɔ Yudea mukoraati ne, bɛhyɛle yebo bɛhane sɔ dwirɛ ne wɔ Galilea, mmerɛ bɔ Yohane hane asubɔ nwo dwirɛ yiele ne. 38 Sɔ dwirɛ ne fa Yesu bɔ ofi Nazerɛt nanwo. Kyɛbɔ Nyameɛ fale honhom krongron ne tumi srale ye, ná ohyinini aseɛ naso mukoraati yɛle pa, ná ɔsale bɛ bɔ Abɔnzam hyɛ ne so ne anwonyerɛ ne, ɔyɛle sɔ nningyein ofikyɛ né Nyameɛ boka ye so. 39 Na nningyein bɔ ɔyɛle ye wɔ Yudafoɛ maen nemɔ nu, ne Yerusalem mukoraati ne, yɛte ye nwo adanzefoɛ. Nakoso bɛbɔle ye asɛnnua nu bɛhuni. 40 Na ye ɛlɛsa so ne, Nyameɛ tingyele ye, ná ɔmaa ɔyele ye nwo ali, 41 nakoso nná ebiala yeɛ ɔyele ye nwo ali hyirele ye ɔ, mmom ɔyele ye nwo ali hyirele bɛ bɔ Nyameɛ limoa yele bɛ kyɛ adanzefoɛ ne, na ɛhene yeɛ ole yɛ bɔ ye tingyele ne si ne, yɛne ye didili na yɛnone ne. 42 Na ɔhyɛle yɛ kyɛ yɛha nzɛmba ne yɛhyire ebiala, na yɛli adanzeɛ fekɔ-fekɔ kyɛ, ye yeɛ Nyameɛ aye ye kyɛ obu ateasefoɛ ne awufo atɛn ne. 43 Ye yeɛ adiifoɛ namukoraati lili ye nwo adanzeɛ kyɛ, ebiala bɔ okonya ye nu gyidie ne konya bɔne-fakyɛ wɔ ye dumaa nu ne."

44 Petro gu so odwudwo ne, honhom krongron ne wale mmenia bɔ betie ye namukoraati so. 45 Na ɔyɛle gyidifoɛ bɔ bapɛ bɛ toa bɔ bɛne Petro wale ne nwanwa kyɛ, bahwie honhom krongron akyɛdeɛ ne bagua maen-maen nanufoɛ naso ɔ. 46 Na bɛtele kyɛ bɛka dwudwolɛ foforɛ bɛye Nyameɛ ayɛ. Yeɛ Petro hane kyɛ: 47 "Sɔ mmenia hemɔ anya honhom krongron ne te kyɛ yala, yeti ebie kɔhora kosi yɛ atee kyɛ nnɛmaa yɛfa nzue yɛbɔ bɛ asu anaa?" 48 Yeti ɔmaa bɛbɔle bɛ asu wɔ Yesu Kristo dumaa nu. Ná bɛsrɛle ye kyɛ ɔtena bɛ nwo berɛ kaa.