1 Yeti bɛwale Derbi, na yesi ne, bɛhɔle Listra. Né suaniɛ bie bɔ bɛfrɛ ye Timoteo wɔ berɛ, né ye maame te Yudaniɛ gyidiniɛ, nakoso ye baba de, né ɔte Greekniɛ. 2 Né aliemaa mɔ bɔ bɛwɔ Listra ne Ikoniom namukoraati ka ye nwo dwirɛ pa. 3 Né Paul pena kyɛ ɔne Timoteo kɔ, nakoso Yudafoɛ bɔ bɛwɔ berɛ nati, ɔfale ye pɛle ye toa; ofikyɛ ne bɛ mukoraati bɛse kyɛ ye baba te Greekniɛ. 4 Na kuro biala bɔ bɛkɔhɔ nu ne, bɛfa mmeraa ne gyinayɛ bɔ asomafoɛ ne mbanyi bɔ bɛwɔ Yerusalem ne asi ne bɛma bɛ. 5 Ɛhe maa asafo nemɔ yɛle se wɔ gyidie nanu, na daa biala, né bɛ dodoɔ né kɔ anyunu.

6 Afei koso, bɛɛfale Frigia ne Galatia maen nanu, ofikyɛ honhom krongron né amma bɛ atee maa banga nzɛmba ne wɔ Asia mandam nanu. 7 Na bɛwale Misia ne, né bɛpena kyɛ bɛkɔ Bitinia, nakoso Yesu honhom né amma bɛ atee. 8 Yeti bɛpɛle nu wɔ Misia bɛwale Troa. 9 Na kɔngɔen ne, Paul nyane anisoadehu bie, né biaa bie gyi Makedonia ɔka kyire ye kyɛ: "Bra Makedonia na baboka yɛ." 10 Onyane sɔ anisoadehu nala pɛ, yɛyɛle y’adwene kyɛ yɛkɔ Makedonia, ofikyɛ yɛnwuni ye kyɛ Nyameɛ yeɛ wafrɛ yɛ kyɛ yɛɛha nzɛmba ne wɔ berɛ ɔ.

11 Yeti yɛfole hyep wɔ Troa yɛhɔle yɛ nyunu tee yɛɛdwuli Samotrake, na aleɛ hene ne, yɛhɔle Neapoli. 12 Na yɛfili berɛ yɛhɔle Filipi, né ɔte kuro piri wɔ Makedonia mandam nanu. Na yɛlili ngyẽa kaa wɔ sɔ kuro naso. 13 Na Homeda ne, yɛfili kuro nanu yɛhɔle nzue bie nwo, nekaa bɔ né y’adwene yɛ yɛ kyɛ bɛbɔ mbaeɛ ne. Yɛtenane berɛ, na mmrasua bɔ né bayia nu berɛ ne, yɛne bɛ bɔle ngɔmmɔ. 14 Né brasua bie bɔ bɛfrɛ ye Lidia wɔ berɛ otie; ofi Tiatira, na né ɔtɔne ndadeɛ valent. Né ɔsõ Nyameɛ, ná Awurade bukyele ye ahone nu maa ɔyɛle asoɛ tiele bɔ Paul ka ne. 15 Mmerɛ bɔ bɛbɔle ɔne ye awurofoɛ asu ne, ɔsrɛle yɛ kyɛ: "Sɛ ɛmɔ anwu kyɛ, medi nahorɛ mema Awurade de a, ɛmɔbra bɛɛtena m’awuro." Na ɔhane alaa maa yɛhɔle.

16 Ɛlɛho bie, né yɛnate atee so yɛkɔ nekaa bɔ bɛbɔ mbaeɛ ne, ná abayaa bie yiale yɛ. Né ole sunzummɔne bɔ ɔmaa ɔkora ka bɔ okosi kyẽabie ɔ. 17 Sɔ abayaa he lili yɛne Paul si, na ne ɔteɛteanu kyɛ: "Sɔ mmenia hemɔ te Anwuro-Anwuro Nyameɛ ne ngoaa, na bɛka atee bɔ ɔkɔmaa ɛmɔ konya ngoa nanwo dwirɛ bɛkyire ɛmɔ." 18 Ɔyɛle sɔ ngyẽa pee, afei de né ɔyɛ Paul ahomete, na ɔkakyile ye nwo ha hyirele honhom ne kyɛ: "Mehyɛ wɔ wɔ Yesu Kristo dumaa nu kyɛ, fi ye nu kɔ." Na sɔ mmerɛ nala, ofili ye nu.

19 Mmerɛ bɔ ye wura nemɔ nwuni kyɛ, anidasoɛ bɔ bɛle ye kyɛ bekonya sikaa ne abɔ bɛ ne, bɛhyele Paul ne Silas, na bɛhwene bɛ bɛhɔle atumvoɛ bɔ bɛwɔ dwaa nanu ne berɛ. 20 Na bɛfale bɛ bɛwale maen nanu mbanyi ne berɛ, yeɛ bɛhane kyɛ; "Sɔ mmenia hemɔ te Yudafoɛ, na bɛha yɛ kuro ne paa. 21 Bɛka amanne biemɔ bɔ mmeraa mma atee kyɛ Romanfoɛ suesua anaa yɛyɛ ɔ." 22 Ɛberɛ ala, mmeni lɔen namukoraati tuli bɛ noa guale bɛ so. Ná maen nanu mbanyi ne tetele Paul ne Silas ndadeɛ nu, yeɛ bɛha bɛhyirele mmenia ne kyɛ, bɛfa mmakaa bɛbo bɛ. 23 Bɛgwale bɛ pa, beyiele ne, bɛfale bɛ bɛguale prizin, yeɛ bɛha bɛhyirele bɔ ɔnea prizin berɛ ne kyɛ, ɔnea bɛ so yé. 24 Yeti, ɔfale bɛ guale prizin sua bɔ ɔwɔ ye kunu dɔ paa nanu, na ɔkyekyele bɛ gya bɔle mmakaa nu.

25 Kɔngɔen ne, Paul ne Silas bɔle mbaeɛ, na bɛtole edwein bɛyele Nyameɛ ayɛ, né bɛ bɔ bɛla prizin berɛ ne tie. 26 Komapɛ, aseɛ wosolɛ kandinga bie sili maa prizin ne fapem ne wosole. Afei, anoa nemɔ bukye-bukyele, na ebiala kyenyi sangyele. 27 Mmerɛ bɔ sona bɔ ɔnea prizin berɛ ne dwɔsole, na onwuni kyɛ anoa nemɔ abukye ne, ɔhwene dadeɛ kyɛ oku ye nwo, ofikyɛ né ye adwene yɛ ye kyɛ, prizinfoɛ ne anwati. 28 Nakoso Paul teane nu kyɛ: "Nnɛku wɔ nwo, ofikyɛ yɛ mukoraati yɛwɔ wa." 29 Yeti olɛle kanea, na ɔfale mirika wurale prizin sua nanu, yeɛ ɔfale ahopere bule ndwerɛ wɔ Paul ne Silas nyunu. 30 Na ɔyele bɛ fitele, yeɛ ɔhane kyɛ: "Me wura mɔ, nzu yeɛ odikyɛ meyɛ, ná manya ngoa ɔ?" 31 Bɛha bɛhyirele ye kyɛ: "Nya gyidie wɔ Awurade Yesu nu, ná ɛne w’awurofoɛ mukoraati konya ngoa." 32 Na Paul ne Silas hane Awurade dwirɛ ne hyirele ye, ɔne ebiala bɔ ɔwɔ ye awuro berɛ ne. 33 Na sɔ kɔngɔen nala, ɔfale bɛ hɔle, na onwunzini bɛ kena nemɔ aso, na bɛbɔle ɔne ye awurofoɛ mukoraati asu. 34 Ná ɔfale bɛ wale ye awuro, yeɛ ɔmane bɛ aleɛ maa bɛlili. Ná ɔne ye awurofoɛ mukoraati gyele bɛ nye kyɛ, kesaalae de, banya gyidie wɔ Nyameɛ nu.

35 Aleɛ hene ne, maen nanu mbanyi nemɔ somane polisifoɛ maa bɛɛha bɛhyirele bɔ ɔnea prizin berɛ ne kyɛ: "Ye sɔ mmrienzua nemɔ." 36 Bɔ ɔnea prizin berɛ ne hane bɛ dwirɛ ne hyirele Paul kyɛ: "Maen nanu mbanyi ne asoma mmenia awa kyɛ, yɛ ye ɛmɔ. Yeti ɛmɔbra, na ɛmɔfa asomdwie bɛhɔ." 37 Nakoso Paul hane kyɛ: "Yɛte Romanfoɛ, nakoso bɛgwale yɛ wɔ badwanu, yeɛ bɛfale yɛ bɛguale prizin aberɛ bɔ né bɛlili yɛ dwirɛ. Nakoso kesaalae de, bɛbaaye yɛ kodɛɛ? Ɛhe de, ɔngɔyɛ ye! Maa bɛ bɔbɔ bɛbra, na bɛɛfa yɛ bɛfite." 38 Polisifoɛ nemɔ hane sɔ dwirɛ ne hyirele maen nanu mbanyi ne. Mmerɛ bɔ bɛtele kyɛ bɛte Romanfoɛ ne, esuronyi hane bɛ paa. 39 Yeti bɛwale bɛɛpale bɛ kyerɛ, na bɛyele bɛ beyiele ne, bɛsrɛle bɛ kyɛ, bɛfi kuro nanu bɛhɔ. 40 Nakoso bɛfili prizin berɛ ne, bɛhɔle Lidia awuro; na mmerɛ bɔ bɛnwuni aliemaa nemɔ ne, bɛhyɛle bɛ nguraen, yeɛ bɛfili berɛ bɛhɔle ɔ.