1 Jesu nakamana kupa malailile ku bashichiiya bakwe bali ikkumi abobilo, wakaunka akutalika kuiisha a kukambauka mu minzhi inene yaku Galilaya.

2 Ono Joni mumbbizhi kali muntolongo nakanva zhintu nzhakalinga kuchita Kilisitu, wakatuma bashichiiya bwakwe kulinguwe. 3 "Twaambile," bakamubuzha Jesu, "Saa ndiwe utekuza? Naa tuchilangila umbi?"

4 Jesu wakanviila ati, "Kamunka mu mwaambile Joni nchimwanva a nchimwabona. 5 Boofu babona, balema beenda, bashimankuntu basalazhigwa, batanvi banva bafile babushigwa, alimwi Mulumbe Mubotu wakambaukwa ku bachete 6 Ulilelekelwe uyo utaleki kushoma mulindime.

7 Ono batumwa ba Joni nibakaunka, Jesu wakatalika kwambila mbunga kujatikizha Joni "Nimwakaunka kuli Joni mukanda, nchinzhi nchimwalikulangila kubona? Saa mwakabona bwiizu kabunyanyala a muwo? 8 Naa tabushi, ina mwakaya mukubona nzhi? Saa Muntu walikusamine zhisani zhibotu? Taaku, abo basama zhisani zhidula balakala mumasena aba Mamii. 9 Ino mwalinga mwaunka mukubona nzhi? Saa Mushishimi? Kashimpe ndamwaabila, mwakabona wiinda a mushinshimi. 10 Joni nguwakalembwa mu malembe ati, ‘Ndakutumina mutumwa kumpela kwako, eshi akakubambile nzhila.’ 11 Ndamwambila kwaamba ati, akati kababo bakazhalwa kumukaintu taaku naba omwi unga waiinda Joni mubbizhi, kakuli uyo mushoonto mu bwami bwa ku julu munene kumwiinda. 12 Kuzwa kumazuba a Joni mubbizhi kushikila sunu, bwami bwa ku julu bwabwezwa changuzu nkambo bantu banyongene mbubabu bweza cha nguzu. 13 Bashinshimi boonse a milawo ya Mozesi bakalinga kushinshima a zha bwami kushikila Joni naakaza. 14 Alimwi naa mulazumina kutambula makani abo, Joni ngu Elija, wakashinshimwa ati ulaakuza. 15 Oonse uchite matwi anvishe!

16 "Ino ono, bantu basunu inga ndabakozhanisha anzhi? Bali mbuli baana bashite mu masena akuuzhila kabaita benzhinyina ati, 17 ‘Twakamulizhila nyimbo, taaku nimwakazhana twakaimba nyimbo zhapamalila, taaku mwakalila!’ 18 Joni nakaza takali kulya naa kunwa, alimwi bakaamba ati, ‘Ulichite muya ubiibi.’ 19 Ono Mwana a Muntu naakaza wakalinga kulya akunwa, alimwi bakaamba ati, ‘Amubone uuyu muntu ngu mulyato alimwi nguchakolwa, mweenzhinyina abashimitelo abashizhinyonyono!’ Michito ya muntu ilatondezha naa musongo."

20 Ono Jesu wakatalika kukalalila bantu bamuminzhi iyo mwakachitila malele nkambo taaku bakasanduka. 21 "Maawe kulindimwe numinzhi ya ku Kolazini mawe kuli ndimwe Betisaida! Nkambo maleele akachitilwa muli ndimwe nakachitilwa mu Teli a sidoni, ninga bantu bakasanduka kaiindi akusama zhisani zhamasaka akunana milota. 22 Pesi ndamwaambila, mubuzuba bwalubeta, chisubulo chanu chilakwiinda cha Teli a Sidoni. 23 Andiwe Kapenaumu, saa ulayeeya kwaamba balakukulumbaizha kujulu? Taaku, ulakuwaalwa mu gehena. Nkambo ka kwaamba maleele akachitwa muli ndimwe nakachitilwa mu Sodoma, ninga asunu munzhi uuyu kauchiliko! 24 Pesi ndamwaambila ati, mubuzuba bwalubeta, chisubulo chanu chila kwiinda cha Sodoma!"

25 Peenka penka Jesu wakapaila ati, "Ndakulumba Tata, Mwami wa julu a nyika, nkambo wakasisa zhintu izhi kubasongo a abaiile alimwi wakazhizubulula kubana bashoonto. 26 Mbumbubo Taata, mbuchakukomanisha kwaamba chibe.

27 "Taata nguwakaampa zhintu zhoonse. Taaku naba omwi uumuzhi Mwaana chita boo Taata. Alimwi taaku muntu naba omwi uuzhi Taata chita boo Mwaana, akuli baabo Mwaana mbakasala kuzubulwila.

28 "Amuze kuli ndime, noonse nimwalemenwa kunyamuna mikuli ilemu, alimwi ndakumupa kupumuna, ndime nshi mulemunune. 29 Amubweze lijoko lyangu, mwiiye kulindime. Nkambo ime ndimubombu alimwi ndimubotu moyo, nchichecho mulakujana kupumuna mumyoyo yanu. 30 Joko lyangu Ndyubu alimwi mukuli wangu nguubu."