1 Ono kuseni seni boonse bapaizhi banene aba maalu bakapangana bwaku mujaya Jesu. 2 Bakamwanga a kumutola kuli Pilato mwendelezhi wachi Looma.

3 Ono Judasi wakazhiba, kwaamba Jesu wapegwa mulandu wakujaigwa, wakasanduka akujola maali asiliva ali makkumi otatwe ku bapaizhi a bamaalu. 4 Wakaamba ati, "Ndabisha kwaaba muntu utachite mulandu."

Bakanviila ati "Ino chilichite pindu nzhi icho kuli ndiswe?" nchiindi chako icho!"

5 Judasi wakasowa maali anshi mu tempele akuzwa waunka mukulishina.

6 Amane bapaizhi banene bakabweza maali asiliva akwaamba ati, "Tachili mu mulawo kwaamba tubike maali aya muchibikilo nkambo maali abulowa." 7 Ono nibakamana kuzuminizhana maali bakauula muunda wamubumbi kwaamba kabazhikilako bantu beenzu. 8 Nkukambo ako ulaiitwa Muunda wa Bulowa kushikila sunu.

9 Icho chakaambwa amushinshimi Jelemiya chakazuzikizhigwa, "Bakabweza maali asiliva makkumi otatwe, mbuli mbubakazuminizhana a bantu baku Izilaili, 10 alimwi maali bakaasebenzha kuula Muunda wamubumbi mbuli Leza mbwakandailila."

11 Bakaimika Jesu kumpela lya mwendelezhi Pilato waku Looma, amane mwendelezhi wakamubuzha ati, "Saa ndiwe Mwami wa ba Juuda?"

Jesu wakanviila ati, "Waamba," 12 Pesi chiindi bapaizhi aba maalu nibakamutamikizha twaambo akumubuzha, Jesu taaku nakanviila.

13 Amane Pilato wakamubuzha kwaamba ati, "Saa tonviile twaambo ntubatokwaamba ali ndiwe?"

14 Pesi Jesu taaku nakanviila lizwi naliba lyomwi, amane mwendelezhi wakakankamana.

15 Ono chakalinga nchilengwa kwaamba naa pasika yashika, mwendelezhi wakali kwangulula mwaange omwi ngubakasala bantu. 16 Kuchindi icho kwakalinga mwange wakali kuzhibikilwe maningi Banabbasi. 17 Ono mbunga ya bantu niyakabungana Pilato wakaibuzha ati, "Nguni ngumuyanda kwaamba mwangulwile? Banabbasi naa Jesu Mesiya?" 18 Wakazhiba kwaamba bakapa Jesu mu maanza akwe nkambo kamunyono. 19 Mbuli Pilato mbwakalinga kushite a chuuno chabubeteshi, mukaintu wakwe wakatuma mulumbe kwaamba, "Utamuchiti chili choonse muntu uyo nkambo tachite mulandu, mashiku muchiloto ndapengana maningi nkambo kanguwe." 20 Pesi bapaizhi banene aba maalu bakakombelezha mbunga ya bantu kwaamba ilombe Banabbasi kwangululwa amane Jesu walo ajaigwe. 21 Pesi Pilato wakabuzha mbunga ya bantu ati, "Nguni ngumuyanda akati ka bantu bobilo kwaamba mwangulwile?"

Bakanviila ati, "Banabbasi!"

22 Amane Pilato wakababuzha ati, "Ino ndachita buti a Jesu Mesiya?"

Boonse bakanviila ati, "Agagailwe!"

23 Pesi Pilato wakabuzha ati, "Ino mulandu nzhi ngwa chita?"

Bamane boonse bakaoolobezha akwaamba ati, "Agagailwe!"

24 Pilato nakabona kwaamba taaku chishi chichitike, kunze kwakuleta kunyongana, wakabweza maanzhi a kusamba kumaanza kumpela kwa mbunga ya bantu akwaamba ati, "Nshichite mulandu ku bulowa bwa muntu uyu," kamuchita nchimuyanda nubene!" 25 Mbunga yoonse ya bantu yakanviila kwaamba ati, "Bulowa bwakwe bube alindiswe a bana besu!" 26 Amane Pilato wakaangulula Banabbasi, alimwi Jesu nakamana kukwipwa wakamwaaba kwaamba agagailwe achichingano.

27 Bashikalumamba ba Pilato bakatola Jesu mulubaanza lwa ng'anda yamwendelezhi, bakaita bashikalumamba benzhinyina boonse bakalingako. 28 Bakamuuma akumusamika chisani chisalala, 29 bakapanga mushini wamanva akumubika kumutwi Jesu alimwi bakamubika kasamu mulyanza lyakwe lyalulyo akufungama kumpela lyakwe akutalika kumusabauzha, "Pona lyoonse O Mwami waba Juuda!" 30 Bakamushipila mate a kubweza kasamu a kumuuma ku mutwi. 31 Alimwi nibakamana kumusampaula, bakamufuula chikobela amana bamusamika zhisani zhakwe. Amana bakamutola mukumugagaila achichingano.

32 Mbuli mbubakali kuzwa, bakaswanganya musankwa wakalikuzwa ku Sailini Saimoni, amane bashikalumamba bakamushinikizha musankwa kunyamuna chichingano cha Jeau. 33 Ono bakashika kubusena bwiitwa ati Gologota, chaamba ati, "Busena bwa chifuwa chakumutwi." 34 Bamane bakamupa Jesu waiini wakalinga kusangene a indulwe, pesi nakaunva mbuwakalikulula wakaka ku unwa. 35 Nibakamana kumugagaila achinchingano bakakwamuna chinsani chakwe bakachabana akuminao nsolo. 36 Amane bakakkala anshi akutalika kwebela Jesu. 37 Ono a julu a mutwi wakwe bakabika chitondezho chamalembe chakalinga kwaamba ati, "uyu ngu Mwami wama Juuda." 38 Amane tupoondo tobilo twakagagailwa atomwi a Jesu, komwi kulyanza lyakululyo alimwi kamwi kulyanza lya kulumwenshi.

39 Ono bantu bakalinga kwiinda bakalinga kupukumuna mitwi yabo akutukana Jesu, 40 alimwi akwaamba ati, "Iwewakalinga kwaamba ati ulakonzha kamwaya tempele akwiyaka mu mazuba otatwe, "Lifutule umwiine nauli Mwana a Leza, alimwi useluke achinchingano."

41 Munzhila yeenka abalo bapaizhi banene aba maii ba mulawo atomwi aba maalu bakamusampaula Jesu.

42 "Wakafutula bamwi, pesi takonzhi kulifutula! Tee ngu Mwami wa Izilaili? kaaliselusha kuzwa achinchingano amana tulashoma muli nguwe! 43 Ulashoma muli Leza amuleke Leza a mufutule naa ulamuyanda, nkambo wakaamba ati, ngu Mwaana a Leza!"

44 Ono munzhila yeenka atwalo tupoondo ntubakagagailwa atomwi twakamutukana.

45 Chiindi cha malumwi (12 koloko) chishi choonse chakavumbwa amushinzhe kwa maola otatwe (3 koloko). 46 Kwamaoola otatwe chiindi chamalumwi Jesu wakalila chakoolobezha, Eli, Eli lama sabakatani?" chaamba ati "Leza wangu, Leza wangu, Leza wangu ino wanshilanzhi?"

47 Ono bamwi bantu bakalinga kwinvi nibakanva, bakaamba ati, "Ulaita Elija." 48 Peenka penka umwi wabo wakabalika wabweza nsinsa, wanyika mu waiini usasile, waitunga kukasako kalaamfu, akumupa kwaamba anwe.

49 Ono bamwi bantu bakaamba ati, "Amulindile, tubone naa ulaza mukumuvuna Elija."

50 Jesu alimwi wakalila alizwi lyakoolobezha amane wakafa. 51 A chiindi icho chisani cha mu tempele chakakwamuka muzhipanzha zhobilo kutalikila ajulu kushika anshi, nyika ayalo yakazungana amana mabwe akandaana 52 alimwi zhuumbwe zhakajaluka amana mibili ya bantu basalala baanji yakabushigwa kuzwa ku bafu. 53 Bakazhishiya zhuumbwe Jesu nakamana kubuka kuzwa kubafu, bakaunka mu munzhi Usalala alimwi akulitondezha kubantu baanji.

54 Ono munene wabashikalumamba alimwi ababo mbakalikulindilila Jesu anguwe, bakabona muzuzumo alimwi azhoonse zhakachitika, bakatija alimwi akwaamba, "Nchachobeni wakalinga Mwaana Leza!"

55 Kwakalinga bamakaintu baanji bakalinga kulangilila alaamfu, bakalinga kuchilila Jesu kuzwa Galilaya bakalinga kumugwashilizha nzhakalinga kuyanda. 56 Ono akati kabo kwakalinga Maliya waku Magadalena, a Maliya banyina Jemusi a Josefa a muka Zebediya.

57 Ono chiindi cha ku mangolezha, kwakaza musankwa muvubi kuzwa ku Alimataya Josefa, walo uyo wakalinga shichiiya wa Jesu. 58 Wakaunka kuli Pilato akulomba mubili wa Jesu. Amane Pilato wakamuzumizha. 59 Josefa wakaubweza mubili wa Jesu a kuvungaila muchisani chituba, 60 a kuubika mu chuumbwe chakwe chipya, chalo nchakakolola libwe. Amane wakakunkulusha libwe linene washinka ku mulyango wa chuumbwe akuunka. 61 Maliya Magadalena a Maliya umwi bakalinga kushite kulubazu lumwi lwa chuumbwe.

62 Ono buzuba bwakachilila bwakalinga bwakulibambila, bapaizhi banene a bama Faliise bakaunka kuli Pilato. 63 Akwaamba ati, "O Muii, "Tulayeeya kwaamba mubeshi ulya kachipona wakaamba ati, ‘Kwakwiinda mazuba otatwe ndakubuka alimwi.’ 64 Ono kopa malailile kwaamba chuumbwe chakwe chilindililwe kushikila buzuba bwatatwu. Nkambo bashichiiya bakwe inga baakuza akwibba mubili wakwe amane akwaambila bantu ati Jesu wabushigwa kuzwa ku bafu. Nkambo uku kubeja kulakwiinda kwakutaanguna." 65 Pilato wakaamba ati, "Amubweze mulindi eshi alindilile chumbwe. "Amunke, mukachilindilile chuumbwe bweenka mbuli mbumuzhi bwakuchita." 66 Amana bakaunka ku chuumbwe bashinka libwe amana bakashiya shikulindilila.