1 Ono Jesu wakaambila mbunga ya bantu a bashichiiya bakwe ati, 2 "Bamai ba mulawo a ba Faliisi mbubakazumizhigwa kupandulula mulawo wa Mozesi. 3 Ono mulyelele kuchilila akuchita zhoonse nzhibamwaambila, pesi mutachilili nzhibachita nkambo tabachiti nzhibakambauka 4 Balanyamuzha bantu amawezo katundu ilemu, pesi balo balaalilwa kubagwasha kunyamuna nakuba kusebenzha kanwe komwe kubagwasha kunyamuna katuundu. 5 Balachita zhintu zhoonse kwaamba babonwe a bantu. Amulange balasama zhintu zhichite malembo abuleza ankumo akumaaza, azhisani zhilaafu. 6 Balayanda kukkala azhuno zhabulemu mu sinagogo, alimwi amisena yabulemu kuma pobwe. 7 Balayanda kugwazhigwa cha bulemu mumasena akuuzhila a kwiitwa ati ‘Muii’ ku bantu. 8 Alimwi tamwelele kwiitwa ati, ‘Muii,’ nkambo noonse muli bantu bomwi alimwi mulichite boo muii omwi. 9 Alimwi mutaiti muntu naba omwi anyika ano ati, ‘Taata,’ nkambo mulichite boo Ishi wanu omwi ku julu. 10 Nakuba kwiitwa ati, ‘Musololi’ nkambo musololi wanu ngu Mesiya. 11 Munene akati kanu ulyelele kuba muzhika wanu. 12 Boonse abo balisupula balakucheshegwa alimwi boonse abo balicheesha balakusumpulwa.

13 "Mawe kuli ndimwi ba maii ba mulawo aba Faliisi! imwe nobashi kuupaupa amenso! Mulajalila bwami bwaku Julu kumenso a bantu, Pesi imwe nubene tamuyandi kunjila mo na kuzumizha abo bayanda kujilamo. 14 "Mawe kuli ndimwe nuba maii ba mulawo aba Faliisi! Nuba shikuupaupa amenso! Nkambo mulabweza lubono lwabamukabafu a kubeja kupaila mipailo ilaamfu, ono mulakutambula bulumbu bunene bwakunyonyoka.

15 "Mawe kuli ndimwi nuba maii ba mulawo a nuba ma Faliisi, noba shikuupaupa amenso! Mulenda a nyika a kuzubuka milonga kusandula muntu omwe, amane mwamusandula mulamupanga kuba zhindi zhobilo mbuli mwaana mushoonto waku gehena mbuli ndimwe.

16 "Mawe kuli ndimwe nuba sololi ba boofu! Mulaamba ati, ‘Mfumwa ulumbila a tempele taaku nchichaamba, pesi ati mfumbwa ulumbila a ngolide yamu tempele ulichite mulandu ku chishomyo icho." 17 Imwe nuba sololi bayonzhi boofu! Nchili chinene, Ngolide naa tempele ipa ngolide ku salala? 18 Alimwi mulaamba ati, ‘Mfumbwa ulumbila a chipaililo, tachite mulandu, pesi ati mfumbwa ulumbila a chipo chili a chipaililo ulichite mulandu.’ 19 Imwe nubantu boofu! Nchili chinene, chiipo naa chipaililo chipa chipo kusalala? 20 Mfumbwa ulumbila a chipaililo, ulalumbila a zhoonse zhili achipaililo. 21 Alimwi mfumbwa ulumbila a tempele, ulalumbila aujanika mo alimwi, ukkala mumo. 22 Alimwi mfumbwa ulumbila ku julu, walumbila a chuno cha Leza uyo ushiite mpao.

23 "Mawe kuli ndimwe nuba ba maii ba mulawo a nuba ma Faliisi, nuba shikuupaupa amenso! nkambo mulapa kwakkumi kwa tununkilizho a koliyanda a galiki a papulika. Pesi mulasulaika makani anene a mulawo, mbuli mashimpe, a luzhalo a kushomeka. Izhi nzhizhelele kuchitwa kwakubula kusulaika zhakutaanguna. 24 Imwe nubasololi boofu! Mulagusha nzhinini mumunwina pesi mulamina Nkamela!

25 "Mawe kuli ndimwe nuba maii ba mulawo aba Faliisi, nuba shikuupaupa amenso! Mulasanzha nkapu a mbale asengwa, pesi mukati zhilizwile kuliyanda a bulyato. 26 Imwe nuba Faliisi boofu! Amutangune musanzhe nkapu a mbale mukati, kwaamba asengwe aalo alasalale.

27 "Mawe kuli ndimwe ba maii ba mulawo aba Faliisi, nuba shikuupaupa amenso! muli mbuli zhuumbwe zhituba, zhiboneka kabotu ansengwe pesi mukati zhili zwile mafuwa a bantu bafile. 28 Munzhila yeenka iyi, mulaboneka kusalala ansengwe ku bantu, pesi mukati mwanu mulizwile bushikuupaupa amenso abubiibi.

29 "Mawe kuli ndimwi nuba maii ba mulawo aba Faliisi, nuba shikuupaupa amenso! Mulayaka zhumbwe zha bashinshimi akubamba kabotu zhumbwe zhababo bakapona bumii busalala. 30 Alimwi mulaamba ati iswe nitwakapona mu mazuba a kapona basshikale besu, niinga tatutoli lubazu mukutila malowa a bashinshimi. 31 Ono mulazumina a kwaamba muli bana babo bakajaya bashinshimi! 32 Kamuzumanana akumanizha zhakatalika bashikale banu! 33 "Nonzoka imwe alimwi bana achipili! Ino mulaakuleya buti kuzwa ku gehena? 34 Ono ndamwaambila kwaamba, ndamutumina bashinshimi a basongo aba maii, balo abo bamwi babo mulakubajaya a kubapenzha alimwi bamwi mulakubakwipa muzhipaililo akubatadanya kuzwa mu munzhi omwi a kuunka kumbi. 35 Nkambo kaako bulowa bwabasalali boonse bwakatilwa anshi anyika, buli amitwi yanu, kutalikila kuli mululami Abelo akushikila kuli Zakaliya mwana Belekiya, walo uyo ngumwakajaya akati ka tempele a chipaililo. 36 Chanchobeni ndamwaambila kwaamba, zhintu zhoonse izhi zhilakuza ku musela uyu.

37 "O Jelusalema Jelusalema, wajaya bashinshimi a kubauma mabwe abo Leza mbakatumwa kuli ndiwe, zhiindi zhongaye zhindakalinga kuyanda kubika maanza angu oonse ku bantu bako, bwenka mbuli inkuku mbwifukatila twana twanjiyo, pesi imwe tamuna kunzumina ime. 38 Langa ono Ng'anda yanko yachaala mu matongo. 39 Ono ndamwaabila, kuzwa ono tamukamboni alimwi ime, kushikila mukaambe ati,

‘Leza aleleke uyo uza mu liina lya Mwami.’ "