1 Ku chiindi icho Helodi mwendelezhi nakanva makani a Jesu, 2 alimwi wakaamba kubasebenzhi ati, "Ngu Joni mubbizhi wabuka kuzwa kubafu! Nkukambo kako maleele akankamika anguzu alasebenza muli nguwe."

3 Ono Helodi wakajata akwanga Joni akumubika muntolongo nkambo ka Helodiyasi, muka mukwambo Filipo, 4 Nkambo Joni wakalinga kwaamba kuli nguwe ati, "Tachili mu mulawo kuba anguwe." 5 Ono Helodi wakalinga kuyanda kujaya Joni, pesi wakalikutija bantu, nkambo boonse bakalinga kwaamba ati Joni ngu mushinshimi.

6 Ono buzuba bwakuyeeya kuzhalwa kwa Helodi, Mwana mushimbi wa Helodiyasi wakazhana kumpela kwa beenzu, alimwi Helodi wakakomana maningi 7 wakashomezha a chishomyo kwaamba mfumbwa ncheshi alombe ulamupa.

8 Ono banyina bakamwambila cha kulomba chelele, wakaamba ati, "Amumpe mutwi wa Joni mubbizhi ambale."

9 Mwami Helodi wakausa, Pesi nkambo kachishomyo nchakaamba kumpela kwa beenzu boonse, Wakapa malailile kwaamba ati mwana mushimbi apegwe nchakalomba 10 alimwi mutwi wa Joni wakazutulwa kali muntolongo. 11 Amane mutwi wa Joni wakaletwa ambale akupengwa ku mwana mushimbi walo wakautola kuli banyina. 12 Ono bashichiiya ba Joni bakaza a kubweza mubili akutola mukuuzhika, Amane bakaunka alimwi baka akwaambila Jesu.

13 Ono Jesu nakanva chakachitika, Wakayubilila akuunka abwaato kubusena bumwiine. Amane imbunga ya bantu nibakanva, bakaishiya minzhi yabo a kweenda kuchilila Jesu nkwakalinga. 14 Ono Jesu nakazwa mu bwaato wakabona mbunga ya bantu, alimwi moyo wakwe wakanva nkumbu amane wakaponya machise aabo.

15 Ono nakaba mangolezha bashichiiya bakwe bakaza kuli nguwe a kwaamba, "Kuno nkuushokwe amana kuluumwine, Bambile bantu baunke balyulile zhakulya zhabo mu minzhi."

16 Jesu wakabanviila ati, "Tabelele kuunka imwe a mubape chakulya,"

17 Bakanviila ati, "Tuli chite boo zhinkwa zhosanwe a tuswi tobilo.

18 Jesu wakabaambila ati, "Amuzhilete kuno,’ 19 Amane wakaambila bantu kukkala anshi abwiizu, wakabweza zhinkwa zhili zhosanwe a tuswi tobilo amana wakalanga ku julu a kupa kulumba ku Mwami, amane wakakomonakomona zhinkwa a kupa bashichiiya kwaamba babanye bantu. 20 Bakalya boonse a kukuta, alimwi bashichiiya bakabwezelela Mitaanga yazhakulya zhakashala ili Kkumi atobilo. 21 Basankwa bakalya bakalinga zhuulu zhosanwe, kutabalizha a bamakaintu a baana.

22 Peenka penka Jesu wakaambila bashichiiya bakwe kunjila mu bwaato akuunka kulubazu lumwi, Pesi walo wakashaala kaambila mbunga ya bantu ati iunke. 23 Ono nakamana kutanda mbunga ya bantu, Jesu wakaunka ku chilundu mukupaila eenka, alimwi nikwakainda chiindi mashiku Jesu kaali eenka, 24 alimwi kwa chiindi icho bwaato kabulikale akati kuzwa ku nyika, a nkambo ka kupenzhegwa amayuwe, muwo wakalinga kuuma ku bwaato.

25 Kuseniseni nibwakacha Jesu wakaza kuli mbabo kaeenda mu chizhiba, 26 Bashichiiya nibakamubona kaeenda a chizhiba, bakaamba ati, "Nchibaanda," alimwi bakatija a kulila.

27 Peenka penka Jesu wakabaambila ati, "Amuyume yume! ndime, "Mutatiji." 28 "Mwami, nadiwe, Petulo wakanviila ati, "Ngambile nyeende a maanzhi nze kuli ndiwe." 29 Jesu wakanviila ati, "Koza." Amane Petulo wakaseluka kuzwa mu bwaato, a kweenda a manzhi kuchilila Jesu nkwakalinga. 30 Pesi nakabona muwo wakatija, alimwi nakabona ati wakatalika kubbila wakalila, "Mwami mvune!"

31 Peenka peenka Jesu wakamujata. "Iwe nuuchite lushomo lushonto," Wakamwaambila ati, "Nkambo nzhi toshomi?"

32 Alimwi nibakanjila mu bwaato awalo muwo wakaumuna. 33 Alimwi bonse bakalinga mu bwato, bakamukomba a kwaamba, "Nchachobeni uli Mwana a Leza!"

34 Ono nibakamana ku zubukila kutala, bakashika mu munzhi wa Jenesaleti. 35 Alimwi bantu ba mu munzhi uyo, nibakamuzhiba Jesu, bakatuma bwaambilizhi kuminzhi yoonse izhingulukile. Amane bantu bakaleta balwazhi bonse kuli Jesu, 36 alimwi bakamulomba kwaamba a zumizhe balwazhi ku jata kumbali a chikobela chakwe, alimwi oonse uyo wakachijata wakaponeshegwe.