1 Jesu wakanjila mu bwaato alimwi wakazubuka mulonga wakajokela kumuzhaabo. 2 Uko bantu bamwi nkubakamuletela muntu umwi wakalinga kuyuminine mubili, kawonene ampasa. Jesu nakabona lushomo lwabo, wakaambila muntu wakalinga kuyuminine mubili ati, "lya moyo mwanaangu, zhinyonyono zhako zhalekelelwa."

3 Bamwi ba maii ba mulawo bakaamba mulwabo ati, "Uyu muntu uku nkusampaula nkwa tekuchita!" 4 Jesu nakazhiba nchibakalikuyeya, wakabaambila ati, "Nkambo nzhi chimuyeya zhibiibi mu myoyo yanu? 5 Nchili chuubu kwaamba ati, ‘Zhinyonyono zhako zhalekelelwa, naa kwaamba ati, ‘Nyamuka weende?’ 6 Ono pesi ndanda muzhibe kwaamba ati, Mwana a Muntu ulichite nguzu a nyika ano zhakulekelela zhinyonyono." Ono wakaambila muntu wakalinga kuyuminine mubuli ati, "Nyamuka, bweza mpasa yako, kounka ku ng'anda."

7 Peenka penka wakanyamuka a kuunka ku ng'anda. 8 Ono imbunga ya bantu niyakabona chakachitika, bakatija, alimwi bakalumbaizha Mwami kupa nguzu zha bobu ku muntu.

9 Mbuli Jesu mbwakali kweenda, wakabona muntu wa liina lya Mateyo, shimutelo kashiite akavuka mpubakali kubbadalila mitelo, wakamwaabila, nchilile, alimwi Mateyo wakanyamuka akumunchilila.

10 Jesu kaachilya mu ng'anda ya Mateyo, bashimutelo baanji a bazhizhibi bakaza mukulya atomwi a Jesu a bashichiiya. 11 Alimwi bama Faliisi nibakabona, bakabuzha bashichiiya ba Jesu ati, "Nkambo nzhi muii wanu ulalya atomwi a bashimutelo alimwi a bazhizhibi?" 12 Jesu nakanva wakaamba ati, "Bantu balikabotu tabayandiki mushilishi, Pesi balwazhi mbu bayandika boo mushilishi. 13 Pesi kamunka mubuzhe malembe aya nchaamba. ‘Ndanda luse kutaashi zhituuzho,’ Nshina kuza kwiita baluleme pesi bashizhibi."

14 Bamane bashichiiya ba Joni bakaza kuli Jesu a kubuzha ati, "Nkambo nzhi iswe a bama Falisi zhiindi zhinji tulaliimya kulya, pesi bashichiiya bako tabaliimyi?"

15 Jesu wakanviila ati, "Mbuti beenzu bali abwiinga mbwiinga bakkala kabatalyi naa shibwiinga kachili a mbabo? Ubo tabushi! Pesi chilakushika chiindi shibwinga neshi a kabwezegwe akati kabo, amana balakuliimya.

16 Taaku naba omwi wiinga wa gambika chisani chipya achakaindi, nkambo chigamba chipya tachikajati pesi chilakukwamuna boo chilyango chinene achisani. 17 Taaku muntu wiinga watila wiini mupya muchipaya chakaindi, nawachita ubo, chipaya chilakonzha kupasuka wiini inga watika alimwi chipaya chilakonzha kunyonyoka. Taaku wiini upya uubikwa mu chipaya chipya kwaamba ukkale zhoonse zhobilo zhitanyonyoki.

18 Ono Jesu kachaamba boo, musololi wa sinagogo wakaza a kufugama kuli Jesu, a kwaamba ati, "Mwanangu wafa ono ono. Ono koza ubike maanza ako a mwanangu amana ulaba kabotu,"

19 Jesu wakanyamuka antomwi a bashichiiya bakwe akumuchilila.

20 Ono umwi Mukaintu wakalikuchiswa bulwazhi bwa kalobola kwamyaka ikkumi ayobilo wakaza kunze kuli Jesu a kukumya kweela a chisani chakwe. 21 Wakaamba mumoyo wakwe ati, "Nanjate boo chisani chakwe ndaba kabotu."

22 Jesu nakachenguluka wakamubona mukaintu. "Wakamwaambila kati, "Lya moyo mwanangu! Lushomo lwako lwakuponya." Peenka penka mukaintu wakapona.

23 Jesu nakanjila mu ng'anda ya musololi wa sinagogo, imbunga ya bantu kaiyobeka akulizha mitolilo, 24 wakabaambila ati, "Amuzwile ansengwe noonse, nkambo mwaana tafile uloona boo." Bamane boonse bakamuseka. 25 Pesi imbunga ya bantu mbubakazwila boo ansengwe, Jesu wakanjiila mu ng'anda akujata mwaana kulyanza awalo mwaana wakabubuka.

26 Mulumbe uyu wakamwaika muchishi choonse.

27 Mbuli Jesu mbwakalikweenda, basankwa bobilo boofu bakatalika kumuchilila, akolobezha kuli nguwe ati, "Mwana Devedi tunvile luzhalo!" 28 Chiindi Jesu nakanjila mu ng'anda, boofu bakaza kuli nguwe, alimwi Jesu wakababuzha ati, "Saa mulashoma kwaamba inga ndamuponya?"

bakanviila ati, "Tulashoma O Mwami!"

29 Amane Jesu wakajata menso abo, akwaamba ati, "A kuchitike anu bweenka mbuli mbumwashoma!" 30 Alimwi menso abo a kabona. Alimwi Jesu wakabachenjezha kwaamba, "Mutaambili naba omwi chachitika ichi!"

31 Pesi balo bakajokela alimwi a kumwaya mulumbe wa Jesu kuminzhii yoonse.

32 Ono mbuli mbubakali kuzwa, bantu bakamuletela Jesu muntu wakalikuchite myuya ubibi alimwi kaali chibuulu. 33 Alimwi ono muya ubibi niwakazwa muntu wakatalika kwaamba peenka penka, amana Imbunga ya bantu yoonse yakakankamana akwaamba ati, "Tatuna kubona ko chintu chabobu mu Izilaili."

34 Pesi bama Faliisi bakaamba ati, "Ngu musololi wa myuuya ibiibi umupa nguzu Jesu zha kugusha myuuya ibiibi."

35 Jesu wakaunka mu minzhi inene a ishoonto yoonse a kuiisha muma sinagogo, a kukambauka Mulumbe Mubotu a bwami, a kuponya malwazhi a machise oonse. 36 Nakabona mbunga ya bantu, moyo wakwe wakanva nkumbu nkambo bakalikupengekene a kubula lugwasho mbuli mbelele zhitachite mweembezhi. 37 Ono Jesu wakambila bashichiiya bakwe, "Butebuzhi bwakomena pesi basebenzhi mbashoonto. 38 Amulombe Mwami mwiine wa butebuzhi atume batebuzhi mumunda wakwe."