1 Bama Faliisi a ba Sadukki bakaza kuli Jesu kwaamba bamusole. kubatondezha chitondezho kuzwa ku julu. 2 Pesi Jesu wakabanviila ati, "Chiindi chamangolezha mulaamba ati, ‘Bulacha kabotu, nkambo ku julu kulasalala.’ 3 Alimwi kuseeni mulaamba ati, ‘Sunu kuli muwo nkambo ku julu takusalali kulashiya mbi.’ Mulizhi kupandulula mbonekelo ya ku julu, Pesi mulalilwa kupandulula zhitondezho zha chiindi chasunu. 4 Musela ubiibi uyu a bumambe, ulalomba chitondezho, pesi taaku chitondezho ncheshi mukapengwe, kunze boo kwachitondezho cha Joona," Amana Jesu wakaunka akubashiya.

5 Bashichiiya nibakazubukila kutala a lweenge lwa Galilaya, bakaluba kubweza chinkwa. 6 Jesu wakaabambila ati, "Amuchenjele a mamena aba Faliisi aba Sadukki."

7 Bakatalika kwaamba mu lwabo lwabo ati, "Nkambo taaku twaleta chinkwa chili choonse."

8 Ono mukuzhiba nchibakalinga kwaamba, Jesu wakababuzha ati, "Imwe nu bantu balushomo lushoonto, nkambo nzhi mulalyambouzha mulwanu lwanu kwaamba tamuchite chinkwa? 9 Saa ambuli sunu tamunvishi? Saa tamuyeeyi kwaamba zhinkwa zhosanwe ndakasanina bantu bakalinga zhuulu zhosanwe alimwi bakazuzha mitaanga ili chiloba ya manyonvelele? 10 Naa kuzwa muzhinkwa zhili chiloba ndakasanina bantu bali zhuulu zhone, alimwi mwakabwezelela mitaanga yongaye? 11 Ino mbuti mbumutazhi kwaamba nshindali kwaamba achinkwa kulindimwe? Pesi amuchenjele a mimena yaba Faliisi alimwi a Basadukki!" 12 Ono bakanva kwaamba taakali kubachenjezha a mimena isebenzhegwa mu chinkwa, Pesi wakali kwaamba njiisho zha ba Falisi aba Sadukki.

13 Ono Jesu nakashika muchishi cha Sizaliya Filipi, wakabuzha bashichiiya bakwe ati, "Ino bantu balaamba Mwana a Muntu nguni?"

14 Bakanviila ati, "Bamwi balaamba Joni mubbizhi, bamwi balaamba Elija. Alimwi bamwi balaamba nduwe Jelemiya naa umwi waba shinshimi."

15 Wakabuzha ati, "Ino imwe mulaamba ndime nii?"

16 Saimoni Petulo wakanviila ati, "Ndiwe Mesiya Mwana a Leza upona." 17 Jesu wakanviila ati, "Ulilelekelwe iwe Saimoni Mwana Joona!" Nkambo taaku nii chakazubululwa kulindiwe mu buntu pesi kwiinda muli Taata wa ku julu. 18 Alimwi ndakwaambila kwaamba ndiwe Petulo, alimwi alibwe ili ndakuyaka chikombelo changu alimwi lufu talukachikonzhi kuchizunda. 19 Ndaakukupa makki a bwami bwa ku Julu. mfumbwa chimwanga anshi a ku Julu changwa, alimwi mfumbwa chimwangulula anshi a ku julu changululwa,"

20 Amane Jesu wakaambila bashichiya bakwe ati, bataambili Muntu uli oonse kwaamba ngu Messiya.

21 Kuzwa ku chiindi incho Jesu wakatalika kupandulwila bashichiiya bakwe, Kwaamba ulyelele kunka ku Jelusalema a kupenzhegwa ku zhintu zhiinji mumaanza a bamaalu, aba paizhi banene a bamaii ba mulawo, alimwi ulyelele kujaigwa alimwi buzuba bwatatu ulakubuzhigwa kuzwa kubafu.

22 Amane Petulo wakamutola Jesu ambali a kutalika kumubwekela, "Tachikachitiki inchi kuli ndiwe Mwami!"

23 Jesu wakasanduluka a kumwambila Petulo ati, "Zwa kulindime Satani! Nkambo uli chilebyo kuli ndime, alimwi mizeezo yako taizwi kuli Leza pesi nja buntu."

24 Amane Jesu wakaambila bashichiiya bakwe ati, "Mfumbwa uyanda kuba shichiiya wangu ulyelele kushiya milimo yakwe, akubweza chichingano chakwe a kuchinchilila. 25 Nkambo mfumbwa uyandishisha mbuumi bwakwe, ulakubusowekelwa, pesi uyo usowekelwa buumi bwakwe a nkambo kandime, ulakubujana. 26 Ino mbulumbu nzhi bujanika naa Muntu wavuba nyika yoonse amane wasowekelwa buumi bakwe? Taaku nchinga wapa kujola buumi bwakwe. 27 Nkambo Mwana Muntu ulakuza mubulemu bwa baishi alimwi abangele bakwe, alimwi a kupa bulumbu ku Muntu oonse kwendelana a milimo yakwe njakachita. 28 Kashimpe ndamwabila, bamwi bainvi ano tabakafi kushikila bakabone Mwana Muntu kaza mu Bwami bwakwe."