1 Ono nikwakainda mazuba ali chisambomwi Jesu wakabweza Petulo a Jemusi a Joni mukwabo Jemusi, a kubatola a mulundu ulaafu uko nkubakaba boo beenka 2 Uko nkwakachinchululwa chiwa Jesu chakaboneka mbuli lizuba, a zhalo zhakusama zhakwe zhakaboneka kutuba anga mumuni. 3 Kabachilangilila bashichiiya, bakabona Elija alimwi a Mozesi kababandika a Jesu. 4 Amane Petulo wakaambila Jesu ati, "Mwami, nchibotu iswe kuba kuno. Naa koyanda, inga ndabika zhivuka zhotatwe chomwi chaako chomwi cha Mozesi alimwi chomwi cha Elija."

5 Ono kachaamba boo, likumbi limweka lyakabavumba, alimwi lizwi lyakaamba kuzwa mulikumbi, "Uyu ngu Mwanangu musankwa walo uyo ngu nyanda, muli nguwe ndakomana. kamu munviila!"

6 Ono bashichiiya nibakanva ichi, bakawa anshi chakuvuntama. 7 Pesi Jesu wakaza a kubajata. Wakabaambila ati, "Amunyamuke," "Mutatiji." 8 Ono nibakalungumana taaku ngubakabona kunze kwa Jesu boo eenka.

9 Nibakalinga kuselemuka kuzwa a mulundu, Jesu wakabaambila bashichiiya bakwe ati, "Mutaambili uli oonse nchimwabona, kushikila Mwana a Muntu a kabushigwe kuzwa kubafu." 10 Bashichiiya bakwe bakamubuzha Jesu ati, "Nkambo nzhi ba maii ba mulawo balaamba ati Elija ulyelele kutaanguna kuza?"

11 Jesu wakabanviila ati, "Nchachobeni Elija ulakutaanguna kuza alimwi ulakubamba zhintu zhoonse. 12 Pesi ndamwambila, Elija wazakale alimwi tabana kumuzhiba bantu, pesi bakachita kuli nguwe zhoonse zhibayanda. Munzhila yeenka Mwana a Muntu balakumupenzha."

13 Amane bashichiiya bakanva kwaamba Jesu wakalinga kubaambila makani a Joni mubbizhi.

14 Ono nibakaza ku mbunga ya bantu, umwi Muntu wakaza kuli Jesu a kufungama. 15 "Alimwi wakaamba ati, "Muii, munviile luzhalo mwanaangu! Ngu shikashiita alimwi ulapenzhegwa maningi, zhimwi zhiindi ulawila mumulilo naa mumanzhi. 16 Ndakamuleta ku bashichiiya bako pesi bakalilwa kumuponya." 17 Jesu wakanviila ati, "Imwe nubayumu myoyo alimwi nimutashomi! Ndakkala chiindi chilaafu buti andimwe? Alimwi ndamupengela chiindi chilaafu buti? Amumuleta Mwana musankwa uyo kuli ndime." 18 Amane Jesu wakautanda muuya ubiibi, peenka peenka mwaana musankwa wakaponezhegwa.

19 Bamane bashichiiya bakwe bakaza chakuyubilila a kumubuzha ati, "Nkambo nzhi twakaalilwa kugusha myuuya ibiibi?"

20 Jesu wakabanviila ati, "Nkambo mulichite lushomo lushoonto. Kashimpe ndamwambila, nakamuchite lushomo mbuli lwa nseke yamasitadi, inga mwaambila mulundu uyu ati, ‘Zwa zhuka awa uunke kuya,’ alimwi inga weenda akumunvila. Taaku ncheshi mukaalilwe imwe." 21 Pesi nkupaila boo akuliimya kwiinga kwagusha myuuya ibiibi iyi, taaku chimbi.

22 Ono chiindi nibakaza antomwi mu Galilaya, wakabaambila ati, "Mwana a Muntu ula kwaabwa mumanza a Bantu. 23 Bala kumujaya, alimwi mubuzuba bwatatu ulakubushigwa kuzwa kubafu." Amane bashichiiya bakwe bakakalala maningi.

24 Ono Jesu a bashichiiya bakwe nibakashika mu Kapenaumu, bashi mitelo ba tempele bakaza kuli Petulo a kubuzha ati, "Saa muii wanu ulapa mitelo ya tempele?" 25 "Eeye Wakanviila Petulo. Chiindi Petulo kachili mu ng'anda Jesu wakamubuzha kutanguna ati, "Ino wayeeya buti Saimoni? Ino nkuli bamii ba nyika nkubabweza mitelo? Saa nkubana babo naa ku bantu boo?" 26 Petulo wakanviila ati, "Kuli bamwi," "Nkukwaamba baana tabapi mitelo," Jesu wakamwaambila ati. 27 "Nkambo tatuyandi kuba a mulandu ku bantu aba, kounka ku mulonga uwaale kanzabwe kako mu maanzhi. Inswi njeshi ujate kutaaguna, waijalula mulomo ulajana maali a kabulo, waabweze uunke ukape mutelo wako a waangu."