1 "Bwami bwaku julu buli mbuli mwiine muunda, wakaunka chiindi chakuseni seni kunjizha basebenzhi mu muunda wakwe. 2 Bakazumizhana kubapa siliva ya lubulo yomwi abuzuba, amane wakabatuma kunka mukusebenza mumuunda wakwe.

3 Nikwakakasala chiindi lizuba nili yasa nkuumo (muma 9 koloko) wakaunka alimwi wakabona bambi kabainvi mumasena a kusambalila kabatachite chakuchita. 4 Wakabambila ati, ‘Muunke mukasebenze mu muunda wangu andimwe, ndamupa bulumbu bwelele.’ 5 Amana bakaunka.

"Alimwi chiindi chamalumwi wakaunka alimwi mangolesha wakachita bweenka. 6 Alimwi kachiya kumangolezha chakuma (5 koloko) wakaunka, wajana bambi kabainvi kabatachite chakuchita. Wakababuzha ati, ‘Nkambo nzhi muliinvi buzuba boonse kutaku chimutekuchita?’

7 "Nkambo taaku watunjizha nchito, bakanviila. ‘Wakabaambila kamunka andimwe musebenze mu muunda wangu.’

8 "Ono chiindi nichakashika ku mangolezha, mwiine muunda wakaambila musebezhi wakwe munene, ‘Baite basebenzhi boonse ubape bulumbu bwabo, utalikile kupa bakashalizha kunjila, wamana upe bakataanguna kunjila.’

9 Basebenzhi abo bakanjizhigwa chiindi kachiya kumangolezha bakapegwa siliva ya lubulo yomwi yomwi boonse. 10 Ono abo bakajinzhigwa chiindi chakuseni seni nibakaza, balo bakayeya kwaamba balapegwa maali anji. Pesi a balo bakapegwa bulumbu bweenka bwa siliva yomwi yomwi ya lubulo. 11 Nibakamana kutambula, bakatalika kutongaukila mwiine muunda. 12 Bakaamba ati, ‘Aba banjizhigwa kumamanino alimwi basebenza boo chiindi chishoonto, alimwi bapegwa bulumbu bwelene andiswe nitwasebenza nchito inene alimwi alumwi lwatubala!’

13 Mwiine muunda wakamunviila umwi ati, ‘Nshina kukuchenga umweenzuma. Mwakazumina kusebenzela abuzuba siliva yomwi yomwi ya lubulo. 14 Bweza maali ako uunke. Ndanda kupa uyu muntu ngu ndanjizha kumamanino bulumbu bweenka mbundapa kuli ndiwe. 15 Saa nshichite nguzu zhakusebenzha maali angu mbuli mbunyanda? Naa wanva munyono nkambo ndapa chakwanguluka?"

16 "Ono bali kumpela balakuba muunshi, alimwi bali muunshi balakuba kumpela."

17 Ono Jesu nakalinga kuunka ku Jelusalema, munzhila, wakababweza bashichiiya bakwe bali kkumi abobilo ambali a kubambila ati, 18 "Tulaunka ku Jelusalema, kwalo uko Mwana a Muntu nkweshi akaabwe kubapaizhi aku ba mii ba mulawo. Balo balakumupa mulandu walufu, 19 akumwaaba mu maanza a ba Mashi balo bashi bakamusampaule, kumukwipa akumugagaila achichingano. Amana mu buzuba bwa tatu ulakubuka kuzwa kubafu."

20 Ono bamuka Zebediya bakaza kuli Jesu a banababo basankwa bobilo, amane a kufungama kuli nguwe a kumulomba lugwasho.

21 Jesu wakamubuzha ati, "Ulanda nzhi?"

Wakanviila ati, "Nshomezhe kwaamba bana bangu aba bobilo, umwi akakkale kulyanza lyako lyakululyo alimwi umwi akakkale kulyanza lyako lyakulumweshi mubulelo bwako."

22 Jesu wakabanviila ati, "Tamuzhi nchimulomba," "Saa inga mwanwa nkapu yamapenzhi njeshi nkanwe?"

bakanviila ati, "Inga twanwa,"

23 Jesu wakambambila ati, "Nchachobeni mulaakunwa ku nkapu yangu, Pesi kukkala kululyo naa kulumweshi taashi nguzu zhangu zha kusala. Aya masena nga ababo Taata mbakabambila."

24 Ono bashichiiya bakalinga kkumi nibakanva makani aya, bakatondezha kukalala kubakwabo abo bobilo. 25 Amane Jesu wakabaita boonse waamba ati, "Mulizhi kwaamba abo baitwa kuba bendelezhi babamashi balalyendelezha bene, alimwi bamasololi babo banene balilichite nguzu kubasololela. 26 Kutaashi kuli ndimwe. Anu uli oonse uyanda kuba munene akati kanu ulyelele kuba musebenzhi wanu, 27 alimwi uyo oonse uyanda kutanguna, ulyelele kuba musebenzhi wanu. 28 Bweenka mbuli Mwana a Muntu mbwatakaza mukusebenzelwa pesi kusebenza, akulipila buumi bwakwe kuba lawakwangulula lwakufutula bantu baanji."

29 Mbuli Jesu abashichiiya bwakwe nibakalinga kweenda kuzwa ku Jeliko. Alimwi a bashichiiya bakwe, imbunga ya bantu yakabachilila. 30 Ono basankwa boofu bobilo, bakali kukkala mumbali a nzhila nibakanva ati Jesu utokwiinda, bakoolobezha, "Mwami, Mwana a Devedi tunvile luzhalo iswe!"

31 Imbunga ya bantu yakababwekela a kubambila, a mumune, pesi balo bakaindilizha koolobezha, "Mwami, Mwana Devedi tunvile luzhalo iswe!"

32 Amane Jesu wakaimikana a kubaita. "Ino mulanda muchitilenzhi?" wakababuzha.

33 bakanviila ati, "Mwami," tulanda kubona."

34 Jesu wakabanvila luse amane wakajata menso abo, peenka penka bakalanga a kumuchilila.