1 Ono nibakashika kufaafi a Jelusalema, alimwi ku Betefage ku muluundu wa Oliva, Jesu wakatuma bashichiiya bakwe bobilo, 2 wakabaambila ati, "Kamuunka ku munzhi uli kumpela lyanu, alimwi mulajana mbongolo akana mbongolo kayangilwe, muzhangulule a kuzhileta kuli ndime 3 Alimwi mfumbwa eshi amubuzhe, mumwambile kwaamba, ‘Mwami ulazhinyanda, alimwi ulazhileke peenka penka."

4 Ichi chakachitika kuzuzikizha chakaambwa kwiinda mu mushinshimi,

5 "Ambila munzhi wa Ziyoni,

‘langa, Mwami wako waza kuli ndiwe,

walibombya alimwi wakwela akambongolo,

alimwi akambongolo, akana ambongolo.

6 Ono bashichiiya bakaunka a kuchita bweenka bwakabalailila Jesu. 7 Bakaileta mbongolo a mwana njiyo, a kutalika kuwaala zhikobela zhabo alinzhizho kwaamba akkalewo Jesu. 8 Mabunga abantu a kayala zhikobela zhabo munzhila alimwi bamwi bakalinga kuyala tusaanzu munzhila. 9 Abo bakalinga kweenda kumpela lyakwe ababo bakalinga kumuchilila muunshi, bakatalika koolobezha akulumbaizha ati,

"Alumbaizhigwe Mwana Devedi! "Ulilelekelwe uyo uza mu liina lya Mwami!" Alumbaizhigwe uli ku julu!"

10 Ono Jesu nakanjila mu Jelusalema, onse munzhi wakakankamana a kubuzha ati, "Ino nguni uyu?"

11 Mbunga ya bantu yakanviila, ngu Jesu mushinshimi kuzwa ku Nazaleti mu munzhi wa Galilaya."

12 Ono Jesu wakanjila mu lubaanza lwa tempele a kutanda boonse bakalinga kuula a kuuzha. Wakatingamuna matebulu a bakalinga kuchinchishana maali azhuna zhababo bakalinga kuuzha nkwilimba. 13 Wakabaambila ati, "Chililembelwe," Leza wakaamba ati, ‘Ng'anda yangu ilakwitwa kwaamba nii ng'anda yakupailila,’ Pesi imwe mwachita kuba ‘Chiyubilo chabakabwala!"

14 Alimwi boofu a balema bakaza kuli nguwe mu Tempele, amane wakabaponya. 15 Pesi ba paizhi banene alimwi a ba maii bamulawo nibakabona zhintu zhibotu Jesu nzhakachita, a bana mbuli mbubakalinga koolobezha mu lubaanza lwa tempele akwaamba ati, "Alumbaizhigwe Mwana Devedi," balo chakabachima.

16 Jesu bakamubuzha ati "Saa ulinvile bana bashoonto nchibate kwaamba?" Jesu wakabanviila ati, "Mbumbubo," Saa tamunakubala ko malembe aya?

‘Kuzwa ku milomo ya baana aya twana tuchinyonka, iwe o Leza waita kutembaulwa kwako?"

17 Amane Jesu wakabashiya a kuunka ku munzhi wa Betani nkwakaunka koona.

18 Chiindi chakuseni seni mbuli Jesu mbwakali kujokela ku munzhi wakanva nzala. 19 Nakabona chisamu chamukuyu kumbali a nzhila, amane wakaunka kulinchicho pesi taaku nchakajana kunze boo kwamateu. Amane wakaamba kuli nchicho, "Tokazhali michelo alimwi!" Peenka penka chisamu chakayuma.

20 Bashichiiya nibakabona icho, bakakankama akubuzha, "Nkambo nzhi chisamu cha mukuyu ichi chayuma kufambana?"

21 Jesu wakabanviila ati, "Kashimpe ndamwaambila, nakamuchite lushomo lwakutajoka muunshi, inga mwachita chiinda chachitika ku chisamu cha mukuyu uyu. Pesi kutaashi boo ubo, inga mwachikonzha kwaambila mulundu uyu kwaamba, ‘Kounka, ‘Liwaale mu lweenge,’ alimwi chilakonzha kuchitika. 22 Naa kamushoma mulakonzha kutambula mfumbwa nchimwalomba mu mupailo."

23 Jesu wakanjila mu lubaanza lwa tempele, mbuli mbwakalinga kuiisha ba paizhi banene a bamaalu bakaza kuli nguwe a kubuzha, "Twaambile ninguzu nzhi nzhochite zhakuchita zhintu zhoonse izhi? "Alimwi nguni wakakupa nguzu zhakuchita zhintu izhi?"

24 Jesu wakanviila, "Andime ndamubuzha boo mubuzho omwi. Naa munviile, ndamwambila wakampa nguzu zhakuchita zhintu izhi. 25 Ono kubbizha kwa Joni kwakazwa ku Julu naa ku muntu?

Alimwi bakatalika kulyambuzha kwaamba, "Naa twaambe, "Kwakazwa ku julu,’ ulaamba ati, ‘Ino nkambo nzhi taaku mwakamushoma Joni?’ 26 Pesi naa twaambe ati, "Ku muntu?’ Bakatija bantu, nkambo boonse bakalinga kushoma kwaamba Joni wakalinga mushinshimi."

27 Ono bakamunviila Jesu ati, "Tatuzhi."

Amane wakabaambilanati, "Andime teshi mwaambile umpa nguzu zhakuchite zhintu izhi.

28 "Ino, mulayeeya buti? Kwakalinga muntu wakalinga kuchite baana basankwa bobilo. Wakaunka ku wakataanguna a kumwaambaila ati, ‘Mwanangu, kounka ukasebenze mu muunda wangu sunu. 29 Mwaana wakaamba ati, nshaandi,’ pesi nikwakainda chiindi wakayeeya bumbi wakaunka mukusebenza. 30 Amane baishi bakaunka ku mwaana umbi akumwaambila bweenka mbuli wakutaanguna. Wakanviila ati ndaunka, ‘mwami, pesi tanakauunka. 31 "Nguni a bantu bobilo aba wakachita chakalinga kuyanda baishi?" bakanviila kwaamba,

"Wakutaanguna," Amane Jesu wakabaambila ati, "Kashimpe ndamwaabila, bashimitelo a bamavuule bala kunjila mu bwami bwaku julu kumpela kwanu. 32 Abobo Joni wakaza kumutondezha nzhila yabululami pesi tamuna kumushoma, balo bamavuule a bashimitelo bakamushoma. Alimwi nakuba kwaamba mwakabona ubo, takunimwakasanduka a kumushoma.

33 Amunve ku kaambyo akamwi, kwakalinga mulimi wakalima muunda wamasansa akuyakila lukwakwa, washa chiliindi chakutyanina masansa, amane wakayaka a ng'anda yashikulindilila. Wakaupa bashikulindila, amane wakaunka kuchishi chimbi. 34 Chiindi nichakashika chakutebula masansa, wakatuma basebenzhi bakwe ku balimi kwaamba atambule chimpazha chakwe chamasansa.

35 Pesi balindilili bamasansa bakamujata musebenzhi a kumuuma, awalo umwi bakamuuma kumujaya amane watatu bakamuuma mabwe. 36 Alimwi wakatuma basebenzhi bamwi banji kwiinda bakutanguna pesi abalo bakabachita bweenka. mubabashita kubenzhinyina. 37 Nkumamanino wakatuma mwana akwe waamba ati, ‘Kashimpe balamulemeka mwanaangu.’ 38 Pesi balimi bakaambilana kwaamba, ‘Uyu ngushikulya liina. Amuze, tumujaye, amana muunda ulaba wesu, 39 Penka awo bakamujata akumujaya, amana bakamusowela kunze amuunda.

40 Amane Jesu wakabuzha ati, "Ino mwiine muunda akuza ula kubachita buti balimi?"

41 "Kashimpe ulakubajaya balimi babiibi aba," bakanviila ati, "Alimwi ula kuupa balimi bambi muundu abo beshi bakamupe masansa a chiindi chakutebula."

42 Jesu wakabaambila ati, "Saa tamuna kubala malembe aamba ati,

"Libwe lyakakakwa abayaki

lyakaba libwe lishomwa kwiinda onse.

Ichi chakachitwa a Mwami,

alimwi nchibotu mumenso esu!’

43 "Alimwi ndamwaambila kwaamba bwami bwa Leza bulakubwezegwa kuli ndimwe a kupegwa ku bantu beshi bakazhale michelo." 44 Uyo oonse uwila alibwe awa, ulakupasauka alimwi oonse ngweshi likalokele lilakumupasaula."

45 Ono bama Faliisi a ba paizhi nibakanva twaambyo twa Jesu, bakazhiba kwaamba wakalinga kwaamba mbabo 46 Bakalinga kulangaula nzhila yakumwangilamo, pesi tabana kuchikonzha nkambo bakalikutija mbunga ya bantu yakalinga kuzhi kwaamba ngu mushinshimi.