1 Ono bamwi bama Faliise aba maii ba mulawo, bakaza kuli Jesu kuzwa ku Jelusalema a kumubuzha ati, 2 "Nkambo nzhi bashichiiya bako balatyola njiisho zhabashikale besu? Tabasambi kumaza chiindi nibayanda kulya!"

3 Jesu wakanviila ati, "Nkambo nzhi nchimutyola mulawo wa Leza a ku chilila milawo yanu?" 4 Leza wakaamba ati, ‘Lemeka baiso a banyoko, alimwi oonse uyo ushinganya baishi abanyina ulyelele kufa.’ 5 Pesi imwe mulaamba ati, mfumbwa uyo waambilizha kwaamba nchakalikweelele kugwasha baishi abanyina ncha Leza,’ 6 Taelele kulemaka baishi a banyina anchicho. Nchichecho mulakaka ijwi lya Leza ankambo ka njiisho zhanu. 7 Imwe nu bashikupaupa ameso! Anu Izaya wakalinga kululeme naa kashinshima kujatikizha ndimwe,

8 ‘Aba bantu balandemeka a milomo yabo

pesi myoyo yabo ili kulaale andime.

9 Balankomba chabuyo, alimwi injiisho zhabo nzha milawo ya buntu.’

10 Jesu wakaita mbunga ya bantu kuyaambila ati, "Amunve a kunvisha. 11 Chinjila mukanwa mwa muntu ta chimusofanzhi pesi chita chizwa mumoyo wakwe chichimusofazha."

12 Alimwi bashichiiya bakwe bakaza kuli nguwe a kumubuzha ati, "Saa mulizhi kwaamba ati, bama Faliisi bakakalala nibakanva ichi?"

13 Jesu wakabanviila ati, mfumbwa chisamu chitana kushangwa a Taata waku julu, chila kuzhulwa kushikila ku miyaanda. 14 A mubaleke mbasololi boofu, Naa mooofu wasololela moofu nyiina bonse balawila mu chilindi."

15 Petulo wakaamba ati, "Tupandulwile kaambyo aka nchikaamba." 16 Jesu wakababuzha ati, "Saa tamuchichite lushomo. 17 "Saa tamubwene kwaamba choonse chinjila mukanwa chilaya mumala amana chilazwa mumubili. 18 Pesi zhintu zhizwa mukanwa mwa muntu, zhila zwa mu moyo alimwi nzhi zhisofanya muntu. 19 Nkambo kuzwa mu mumoyo mumuzwa mizezo ibibi, itola ku kujaya, kuchita bumambe, bwaamu, alimwi a zhintu zhitasalali, kubba a kubeja alimwi a kujayana mazhina. 20 Zhintu izhi nzhizhisofanya muntu, Pesi kulya kwakubula kusamba kumaza takusofanyi muntu."

21 Ono Jesu nakazwa kubusena ubo, wakaunka kuchishi cha Teli a Sidoni 22 Ono mukaintu wa mukenani wakalinga kukkala mu munzhi umo, wakaza kuli Jesu, kaalila ati, "Mwami, "Mwana Devedi!" Wakalila a kwaamba ati, "Nviile luzhalo ime, mwanagu mukaintu wanjilwa myuuya ibiibi alimwi uli muchimo chibiibi."

23 Pesi Jesu taaku nakamunviila naliba lizwi lyomwi, amane bashichiiya bakwe bakaza kuli nguwe a kulomba Jesu ati, "Amwaambile kuunka mukaintu, nkambo utotuyobekela a kutuchilila."

24 Wakabanviila ati, "Ndakatumwabo ku mbelele nzhi sowekele, zha mu Izilaili."

25 Mukaintu wakaza a kufugama kuli Jesu, wakaamba ati, "Mwami mvune ime!"

26 Wakanviila ati, "Tachili kabotu kubweza chinkwa chabaana a kusowela babwa."

27 "Nchachobeni Mwami," Wakanviila mukaintu, "Pesi abalo babwa balalya tulokaila kuzwa atebule yaba shimalelo abo."

28 Amane Jesu wakaamba kulinguwe ati, "Uli mukaintu walushomo lunene! Kuyanda kwako kwapengwa." Alimwi a chiindi awo mukaintu mwana akwe wakaponeshegwa.

29 Jesu nakazwa uko, wakaunka kumbali a lweenge lwa Galilaya, amane wakatanta atala a mulundu a kukkala anshi. 30 Mbunga ya bantu yakaza kuli nguwe akuletelezha balema a boofu, ba teendi, bachibuulu alimwi aba mwi balwazhi baanji a kubabika ku myeendo yaa Jesu, alimwi wakabaponya boonse. 31 Bantu bakakankamana nibakabona ba chibuulu kabaamba a batakali kweenda baponeshegwa, a balema kweenda alimwi a boofu kubona. Alimwi bakalumbaizha Leza wa Izilaili.

32 Jesu wakaita bashichiiya bakwe alimwi akwaamba, "Ndabanvila nkumbu bantu aba, nkambo bali adime kwamazuba otatwe ono, alimwi tabachite chakulya. Nshiyandi kubaleke ati baunke anzala boo, nkambo bamwi inga bawa kunzala banokujokela mu nzhila."

33 Bashichiiya bakwe bakamubuzha ati, "Nkuli nkweshi tuule zhakulya zhakwaamba bantu aba balye muno munkanda?"

34 Jesu wakababuzha ati, "Ino mulichite zhinkwa zhongaye?" bakanviila ati, "zhili chiloba a tuswi tumwi tushoonto."

35 Amane Jesu wakaambila mbunga ya bantu kukkala anshi. 36 Ono wakabweza zhinkwa zhili chiloba atuswi, A kupa kulumba kuli Leza. Amane wazhikomaunakomauna a kupa bashichiiya, balo bakapa bantu. 37 Bakalya bonse akukuta, amane bashichiiya bakanyamuna mitaanga izwile yazhakulya zhakashala ili chiloba. 38 Ono basankwa bakalya, bakalinga zhuulu zhone, kutabalilizha a bamakaintu a baana.

39 Ono Jesu nakamana kulazhana a mbunga ya bantu, Wakanjiila mu bwaato a kunka kuchishi cha Magadala.