1 Ono Nsabata niyakainda, buzuba bwakutaanguna Maliya waku Magadalena a Maliya umwi bakaunka mukulanga ku chuumbwe. 2 Kwakaba muzuzumo unene wanyika nkambo mungile wa Mwami wakaseluka anshi kuzwa ku julu, akukunkulusha libwe ku mulyango wachuumbwe amane wakakalawo. 3 Wakaboneka mbuli kalabo alimwi zhisani zhakwe zhakalinga kutuba buu. 4 Balindi bakatija, amane bakaba mbuli bantu bafile. 5 Pesi mungele wakaambila ba makaintu ati, "Mutatiji nkambo ndizhi kwaamba mutokulangaula Jesu wakagagailwa achichingano. 6 Taako kuno, wabuka bweenke mbuli mbwakaamba. Kamuza mubone mpalinga kuleede. 7 Ono kamuunka kufambana mwaambile bashichiiya bakwe ati. ‘Wabuka kuzwa kubafu alimwi waunka kumpela lyanu ku Galilaya, uko mulamubona, ono ndamwambila."

8 Ono ba makaintu bakabalika kuzwa ku chuumbwe chakutija pesi kabakomene, bakaunka akwaambila bashichiiya bakwe.

9 Peenka penka Jesu wakabaswanganya amane wakaamba ati, "lumuno lube andimwe." Amane bakaza kuli nguwe akumujata kumyeendo akumukomba. 10 Amane Jesu wakabaambila ati, "Mutatiji, kamunka alimwi mukabaambile bamakwesu kwaamba waunke ku Galilaya, uko balakumbona."

11 Ono mbuli bamakaintu mbubakalikunka, bamwi balindizhi bakaunka mumunzhi akwaambila bapaizhi banen zhoonse zhakachitika. 12 Bapaizhi banene nibakaswangana atomwi aba maalu bakapanga muzezo wakupa maali aanji ku balindizhi, 13 Alimwi wakaamba ati, "Mukabaambile ati bashichiiya bakwe baza mashiku alimwi bawibba mubili iswe katoona. 14 Naa mwendelezhi munene anve makani aya, tulamwimikanina imwe kwaamba tamuchite mulandu."

15 Amane balindi bakabweza maali akuchita nchibakaambilwa, makani aya akaambwa koonse aba Juuda kushikila sunu.

16 Ono bashichiiya bali kkumi aomwi bakaunka ku Galilaya ku mulundu Jesu nkwakabaambila kuunka. 17 Nibakamubona bakamukomba pesi bamwi taaku bakashoma. 18 Ono Jesu wakaza kuli mbabo akwaamba ati, "Nguzu zhoonse zha ku julu a zha anshi zhapengwa kuli ndime. 19 Kamuunka ono mupange bashichiiya munyika yoonse, mubabbizhe mu liina lya Taata a lya Mwaana a lya Muuya Usalala, 20 alimwi mubaiishe kuchilila zhoonse nzhinda kamulailila. Amulange ndanokuli andimwe lyoonse kushikila kumamanino anyika."