1 Ku chiindi icho bashichiiya bakaza kuli Jesu a kubuzha ati, "Ino nguni munene mu Bwami bwaku julu?" 2 Amane Jesu wakaita mwaana akumuimika kumpela kwabo, 3 "Kashimpe ndamwaabila, namutachinchi a kuba mbuli mwaana mushoonto, tamukabuboni Bwami bwaku Julu. 4 Munene mu Bwami bwaku julu ngoyo uli cheesha a kuba mbuli mwaana mushoonto. 5 Alimwi oonse uyo utambula mwaana mushoonto uli mbuli uyu mu liina lyangu watambula ndime.

6 "Ono naa umwi walengesha kwaamba aba baana bashoonto bashoma mulindime kubisha, nchibotu uyo muntu kumwaangilila libwe linene mushingo amane akumuwaala mu mulonga ulaamfu kwaamba wanwina. 7 Mawe kunyika nkambo kazhintu zhipa bantu kusowakelwa lushomo lwabo! Zhintu inzho zhilanochitika boo lyoonse, Pesi mawe kuli uyo uchitisha kwaamba zhichitike!

8 "Ono lyaanza naa mweendo wako ulakulengesha kusowekelwa lushomo lwako, lizutule a kulisowa! Nchibotu kunjila mu buumi butamani kotashite lyaanza naa mweendo, kwiinda kuba a maanza a myeendo akuwaalwa mukalambwe ka mulilo. 9 Alimwi naa liinso lilakupa kusowekelwa lushomo lwako, ligushe a kulisowa! Nchibotu kunjila mu buumi butamani a liinso lyomwe kwiinda kusowelwa mu gehena a menso obilo.

10 "Amubone kwaamba mwatanyonganya baana bashoonto aba. Ndamwaabila bangele babo balabona bushu bwa Taata ku julu lyoonse. 11 Nkambo Mwana a Muntu wakaza kufutula basowekele 12 Ino mulayeeye buti? Naa muntu kachite mbelele zhili myaanda, amana yomwi mbelele yasoweka, saa ingatazhishiyi zhili makkumi mfuka kazhilya mu malundu, a kuunka mukulangaula yomwi isowekele 13 Alimwi naa waijana, kashimpe ndamwaabila ulakomana nkambo kambelele yomwi kwinda zhili makkumi mfuka zhitana kusoweka. 14 Munzhila yenka ishi wanu uli Mukati ka Julu tayandi kwaamba bana bashonto aba basoweke.

15 Naa mukwanu wakulubizhila, kounka kuli nguwe umutondezha chibibi chakwe, kamuli boo nobilo. Naa wakunvila nishi wamujola muzhila iluleme. 16 Pesi nawakaka kukunvila, bweza omwi naa bobilo bantu kwaamba ati, ‘Mfumbwa mazwi eshi a bandikwe anvike a bakamboni bobilo naa botatwe,’ 17 Alimwi nawakaka kunva, ono ambila makani onse ku chikombelo. Alimwi naa wakaka kunvila chikombelo, kamumuleka abe mbuli wamanshi naa shimitelo.

18 "Alimwi ndamwaabila ati, mfumbwa nchimwaanga anshi ano aku julu chaangwa, alimwi mfumbwa chimwaangulula anshi ano aku julu chaangululwa. 19 "Kashimpe ndamwaabila ati, naa bobilo bantu anshi a nyika bazumizhana chintu chimwi a kuchipailila, chilakupegwa kuli mbabo a Taata waku julu. 20 Nkambo mfumbwa uko nkubabungana bobilo naa botatwe mu liina lyangu, ndi ambabo."

21 Petulo wakaza kuli Jesu a kumubuzha ati, "Mwami, zhiindi zhongaye zhinjelele kumulekelela mukwesu naa wandubizhila? Saa zhiindi zhili chiloba?" 22 Jesu wakanviila ati, "Kashimpe ndakwaambila ati, Kutaashi zhiindi zhili chiloba boo, pesi zhiindi zhili makkumi chiloba a chiloba. 23 Nkambo Bwami bwa ku julu buli mbuli mwami wakaita basebenzhi bakwe boonse kwaamba bajole zhikwelete zhakwe. 24 Ono nakatalika boo kusesa zhikwelete, umwi wabasebenzhi wakabweza maali aanji wakaletegwa ku mwami. 25 Mbukuli takalinga kuchikonzha kujola nkongole, ba shemalelo bakwe ba kalailila kwaamba, walo a bakaintu bakwe a baana bakwe a zhoonse nzhibachite zhulishigwe kwaamba nkongole ijoke. 26 Amane nakanva musebenzhi wakafungama kumpela lya shimalelo akwe akulomba ati, ‘Ndakomba a mupeko boo chiindi chishoonto, ndakuijola nkongole yoonse!’ 27 Ono shimalelo akwe nakamulanga wakamunvila luse, amane wakamulekelela nkongole yakwe akumwaambila ati auunke.

28 "Amane musebenzhi nakaunka ansengwe wakajana musebenzhi mweenzhinyina kaeenda munzhila, wakalinga kuchite nkongole ya maali ashoonto boo. Wakamujata mweezhinyina a kutalika kumushina, ‘Kaamba ati zhola maali nguwaka kongola kuli ndime,’ 29 Musebenzhi mweezhinyina wakafungama, ‘Wakaamba ndalomba mpeko boo chiindi chishoonto ndakujolela nkongole yako.’ 30 Pesi wakakaka, wakaunka aku mubika mutolongo kushikila nkongole yoonse akaijole. 31 Ono basebenzhi beenzhinyina nibakabona chakachitika, bakakalala maningi a kuunka kwaambila shimalelo abo zhoonse zhakachitika. 32 "Amane shimalelo wakaita musebenzhi uyo akwaamba ati, ‘Iwe umusebezhi mubiibi,’ wakaamba, ‘Ndakakulekelela nkongole njiwakalinga kuchite kuli ndime yoonse, nkambo wakanoomba. 33 Wakalikwelele komunvila luzhalo mweezhinyoko bweenka mbundakunvila luzhalo.’ 34 Alimwi shemalelo wakwe wakakalala maningi, amane wakamuwaala mutolongo musebenzhi wakwe kwaamba asubulwe, kushikila akajole mweelwe wa nkongole yoonse. 35 Amane Jesu wakaamba ati, "Mbweshi akamuchite Taata waku julu, uyo oonse utalekeleli mukwabo kuzwa anshi a moyo wakwe."