1 Ono Jesu nakamana kwaamba zhintu izhi, wakazwa ku Galilaya akuunka ku chishi cha Judaya kuzubuka lumwi lubazu lwa Jodani. 2 Imbunga ya bantu yakamuchilila, alimwi wakabaponya kuya.

3 Ono Bamwi bama Faliisi bakaza kuli Jesu mukumusola kwiinda mu mubuzho ati, "Saa chili mu mulawo musankwa kuleka mukaintu wakwe nkambo katwambo tuli toonse?"

4 Ono Jesu wakanviila ati, "Saa tamuna kubala malembe amba ati, kumatalikilo mulengi wakalenga musankwe a mukaintu? 5 Alimwi wakaamba ati, ‘A nkambo kachechi musankwa ulakushiya baishi a banyina akukakatila mukaintu wakwe alimwi bobilo aba ilakuba nyama yomwi.’ 6 Tabachili bobilo pesi nyama yomwi. Taaku muntu welele kwandanya incho Leza nchakabika atomwi."

7 Jesu bakamubuzha ba Faliisi ati, "Nkambo nzhi, Mozesi wakapa mulawo musankwa wakupa mukaintu wakwe chipepa chakulekana, amana a kumutanda?"

8 Jesu wakabambila ati, "Mozesi wakamuzumizha kuleka ba makaintu banu, nkambo myoyo yanu njiyumu. Pesi tabushi mbuchakalinga kuzwa kumatalikilo. 9 Ndamwaabila uyo oonse uleka mukaintu wakwe, kunze kwa bwaamu, alimwi naa wakwata mukaintu umbi nkukwaamba wachita chimaambe."

10 Bashichiiya bakamwambila Jesu ati, "Ono anu naa mbuchibele ubo nchibotu musankwa a mukaintu kutakwata,"

11 Jesu wakabanviila ati, "Tabashi boonse biinga bazumina makani aya, pesi chita boo abo mbulya kapegwa. 12 Kuli twaambo tupusene pusene bamasankwa nchibatakwatili, bamwi mbubakazhalwa alimwi nkambo bamwi bakazibwa abantu, alimwi bamwi tabakwati nkambo ka Bwami bwa ku julu. Anu uyo onse wiinga wakonzha kuchilila njiisho iyi achite bweenka."

13 Bamwi bantu bakaleta baana bashoonto kuli Jesu kwaamba abajate maanza akwe akuba pailila, pesi balo bashichiiya bakababwekela. 14 Jesu wakabaambila ati, "Amubaleke baana bashoonto baze kuli ndime alimwi mutabakashi nkambo Bwami bwaku julu mbubwabo."

15 Ono nakamana kubika maanza alimbabo, wakazwa ko.

16 Ono chiindi icho umwi musankwa wakaza kuli Jesu a kubuzha ati, "O Muii, nchizhi chibotu nchiinga ndachita kwaamba tambule buumi butamani?"

17 "Nkambo nzhi mulambuzha kujatikizha chili kabotu?" Jesu wakanviila ati. "Kuli boo omwi ulikabotu. Naulanda kunjila buumi butamani, baamba milawo.

18 Wakabuzha ati, "Ili milawo?" Jesu wakanviila ati, "Utajayi, Utachiti chimambe, utabbi, utapi bukamboni bwakubeja, 19 lemeka baiso a banyoko alimwi yanda mwenzhinyoko mbuli mboli yanda."

20 musankwa muvubi wakaamba ati, "Yoonse iyi milawo ndakaibamba," "Nchinzhi chimbi nchingelele kuchita?"

21 Jesu wakanviila ati, "Nakoyanda kululama, kounka uuzhe lubono lwako loonse, wamana upe kubachete, ulakuba a buvube ku julu, amane uze unchilile."

22 Musankwa muvubi nakanva makani aya, wakaunka kausile nkambo wakalinga kuvubile maningi.

23 Amane Jesu wakaambila bashichiiya bakwe ati, "Kashimpe ndamwaabila, nchiyumu muntu muvubi kunjila mu Bwami bwa ku julu. 24 Alimwi ndamwaabila, nchuubu ku nkamela kunjila mukalyango ka Nyeleti kwiinda muntu muvubi kunjila mu bwami bwa ku ulu bwa Leza."

25 Ono bashichiiya nibakanva ichi, bakakankamana alimwi a kubuzha ati, "Anu ono nguni wiinga wafutuka?"

26 Jesu wakabalanga amane waamba ati, "Ku muntu tachikonzheki, pesi kuli Leza zhintu zhoonse zhila konzheka."

27 Petulo wakamunviila ati, "Kolanga," waakamba ati, "Twakashiya zhintu zhoonse a kukuchilila, ino ulakutupa nzhi iswe?"

28 Jesu wakabaambila ati, "Kashimpe ndamwaabila, chiindi zhintu zhoonse zhakubambululwa kuba zhipya, chiindi Mwana a Muntu a kukkala achuna chakwe chabulemu, andimwe nuba chilili bangu mulakukkala a zhuna zhili kkumi azhobilo, a kubeteka mishobo ilikkumi a yobili ya bana ba Izilaili. 29 Alimwi onse uyo washiya maanda naa mukwabo naa mukwabo mukaintu naa banyina naa baishi naa baana, naa bakaintu bakwe amyunda nkambo kangu, ulakutambula bulumbu buli myaanda buunji a kupegwa buumi butamani. 30 Pesi banji bali kumpela balakuba muunshi, alimwi bali muunshi blakuba kumpela.