Mateus 26

Jesu wakapaila mumunda wa Getesemani

36 Jesu wakaunka abashichiiya bakwe kubusena bwa Getesemani, alimwi wakakabaambila ati, "Amukkale ano ime ndaunka mukupaila ampela." 37 Wakabweza Petulo, a bana Zebediya, amana wakapenzhegwa akuusa mu moyo. 38 Amane wakabaambila ati, "Moyo wangu ulizwile kuusa kushika ku lufu. Amukkale ano akulangila andime."

39 Ono nakeenda boo ashoonto kuunka kumpela, wakawa chakuvuntama a kupaila waamba ati, "Taata nakachikonzheka amugushe nkaapu iyi kuli ndime, pesi kutaashi kuyanda kwangu pesi kuyanda kwako."

40 Ono nakajokela ku bashichiiya bakwe wakajana baloona. Wakabuzha Petulo ati, "Nkambo nzhi mwaalilwa kulangila andime kwaola boo lyomwi? 41 "Amulangile akukomba kwaamba mutanjili mu masunko. Moyo ulayandisha pesi mubili wabula nguzu."

42 Amane wakaunka chiindi chabili akupaila ati, "Taata, natachikonzheki kwaamba nkaapu iyi igushigwe kuli ndime pesi njinwe, luyando lwako aluchitwe." 43 Nakajokela alimwi wakabajana bashichiiya bakwe baloona nkambo bakali kufile tulo.

44 Wakabashiiya akuunka mukupaila chiindi chatatu kaamba mazwi enka. 45 Amane wakajokela ku bashichiiya akubambila ati, "Saa muchoona akupumuna? Amulange! Chiindi chashika chakwaamba Mwana a Muntu aabwe mumaza abashizhibi. 46 Amunyamuke tweende shikungaba ngoyu!"