1 Nda̱wa̱á a̱ꞌkhue̱n ni̱ya̱xe̱, jamí ndi̱yo̱o̱ rí wéje̱ A̱ꞌdá-mógó ná inuu júba̱ Sióón, gajmíi̱ tsí mbá 144 000 xa̱bo̱, tsí ka̱ma mbiꞌyuu A̱ꞌdá-mógó jamí mbiꞌyuu Anu̱u̱ ná jédúún. 2 A̱ꞌkhue̱n ni̱dxawuun mbá a̱ꞌwá ná mikhuíí xómá a̱ꞌwóo mbá xtangaya rí phú mba̱a̱, jamí xómá a̱ꞌwóo rí gakhe̱ naxpíbi. Asndo xó rí phú mbaꞌiin xa̱bo̱ tsí nudi̱í ixe̱ rí gíꞌdoo nítúu jaꞌnii. 3 Jamí nusiee̱n mbá ajmúú nuxe̱ꞌ ná inuu ꞌgí xíli̱i thúngaa, ná inúú mbá nákhu̱un tsí nduya, jamí ná inúú xa̱bo̱ buanuu. Nimbáa tsíꞌngo̱o̱ gáma̱ñuu ajmúú rí nuni̱i̱, rí i̱ndo̱ó máꞌ tsí mbá 144 000 tsí waꞌtse̱-ri̱ñi̱iꞌ ná inuu numbaa. 4 Tsíge̱ꞌ nimbá miꞌtsú túbúu̱n gajmíi̱ go̱ꞌo̱, numuu rí túni̱gui̱i̱nꞌ, jamí nagóo̱ tsu̱du̱u̱ A̱ꞌdá-mógó asndo náá máꞌ i̱ka̱. Ikhii̱n waꞌtse̱-ri̱ñii̱ꞌ ná inuu numbaa kajngó ma̱nindxúu̱n mbá tsi̱gi̱jña̱ꞌ rí ginii jayu ma̱grui̱gú Ana̱ꞌlóꞌ jamí A̱ꞌdá-mógó. 5 Jamí ni miꞌtsú tágájnuu ajngáa rí mi̱nduwa ná rawúu̱n, numuu rí nda̱a̱ nimbá rí ma̱goo mi̱ꞌthán ga̱jma̱á numúu̱ ikhii̱n ná inuu ꞌgí xíli̱i Ana̱ꞌlóꞌ.*14.5 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ná inuu ꞌgí xíli̱i Ana̱ꞌlóꞌ».

6 Nda̱wa̱á a̱ꞌkhue̱n ndi̱yo̱o̱ ngrigo̱o̱ꞌ ná inuu gíñá i̱mba̱a̱ꞌ ánje̱l ná mikhuíí. Jayée̱ ajngáa máján rí ríga̱ jámuu kajngó maꞌthán-rúꞌúu̱n ne̱ mbá xúgíin xa̱bo̱ tsí júwa̱ꞌ ná numbaa, mbá xúgíí inii xa̱bo̱, mbá xúgíí ajngáa rí nuthan xa̱bo̱ jamí mbá xúgíí xuajen. 7 Jamí phú gakhe̱ indxaꞌwée̱: «Ga̱mi̱ꞌñálaꞌ gáꞌne Ana̱ꞌlóꞌ, jamí gu̱tha̱nlaꞌ rí máján ga̱jma̱á numuu̱, numuu rí ni̱ga̱nú máꞌ mbiꞌi rí maxudaa̱ awan ga̱jma̱á numúú xa̱bo̱. Gu̱ne̱-mba̱a̱laꞌ tsí neꞌne-ku̱maa mikhu jamí numbaa, xúꞌkhue̱n máꞌ iya a̱pha̱ jamí mbá xúgíí iduu iya».

8 A̱ꞌkhue̱n ni̱ꞌkha̱ i̱mba̱a̱ꞌ ánje̱l tsí niꞌthán: «¡Wámba̱a̱ rá! ¡Wámba̱a xuajen mba̱a̱ Babilónia̱ rá! Numuu rí xómá a̱ꞌgo̱ tsí na̱ngu̱jwa̱-mina̱ꞌ jaꞌnii̱, jamí niꞌnii̱ rí mbá xúgíí xuajen numbaa ma̱ꞌne aꞌkhán ga̱jma̱á majñu̱u̱ tsirájá rí naxná-raꞌee̱».

9 A̱ꞌkhue̱n ni̱ꞌkha̱ ánje̱l tsí riatsíi, tsí phú gakhe̱ niꞌthán: «Xí mbáa naꞌne-mba̱a̱ xu̱kú xkawi̱i̱ꞌ o xtiꞌkhuu̱ mbo̱ꞌ, jamí na̱grui̱gú tsinuu̱ ná jédoo o ná ñawúu̱n mbo̱ꞌ, 10 tsúꞌkhue̱n ma̱ga̱a̱n iya miꞌkhu̱u̱n rí najiꞌnáa Ana̱ꞌlóꞌ, rí nijno̱ꞌ ga̱jma̱á mbáa jañii xu̱u̱ꞌ ná rgúxi̱ drígo̱o̱ rí najiꞌnáa Ana̱ꞌlóꞌ. Jamí tsúꞌkhue̱n mamínu̱u̱ꞌ mi̱ndaꞌkho ga̱jma̱á agu jamí asúfre̱ ná inúú ánje̱l drígo̱o̱ Ana̱ꞌlóꞌ jamí ná inuu máꞌ A̱ꞌdá-mógó mangaa. 11 Mbá jámuu mbiꞌi natsimuu gúniúu jamínu̱ꞌ rí nakhiin tsúꞌkhue̱n. Na̱nguá mbuya̱a xu̱únꞌ mbiꞌíí mbruꞌwíín tsí nune̱-mba̱a̱ xu̱kú xkawi̱i̱ꞌ jamí nune̱-mba̱a̱ xtiꞌkhuu̱, xúꞌkhue̱n máꞌ tsí nu̱drígú tsinuu̱».

12 Ge̱jyoꞌ ma̱kujmii tsí ñajúún xa̱bi̱i Ana̱ꞌlóꞌ, tsí na̱ꞌngo̱o̱ a̱kui̱ín rí mu̱míni̱í, nune̱-mbáníí ajngóo Ana̱ꞌlóꞌ jamí wéje̱ a̱kui̱ín ná inuu Jesús.

13 A̱ꞌkhue̱n ni̱dxawuun mbá a̱ꞌwá ná mikhuíí rí niꞌthínꞌ: «Aratháán ríge̱ꞌ: Phú gagi júwa̱ꞌ tsí ma̱ja̱ñúú ga̱jma̱á numuu Táta̱, asndo nákhí máꞌ xúge̱ꞌ jamí mbiꞌi rí ma̱ꞌkha̱. Jamí Xu̱u̱ꞌ Ana̱ꞌlóꞌ naꞌthán: "Gakon máꞌ rí xkuaꞌnii jaꞌnii, numuu rí ikhii̱n mbuyaa̱ xúu̱nꞌ rí ni̱ñajwii̱n gakhe̱, jamí ríga̱ mújúun ñajun rí nini̱i̱ ga̱jma̱á nindxúu̱n"».

14 Nda̱wa̱á a̱ꞌkhue̱n ndi̱yo̱o̱ mbá du̱u̱n miꞌxá, jamí ná tsu̱du̱u̱ ne̱ ꞌgí mbáa tsí xómá A̱dée Xa̱bo̱ Numbaa jaꞌnii. Ná idxu̱u̱ rígu mbá ajwa̱nꞌ gamaku rí jndi jamí mo̱jmo̱ꞌ, jamí ná ñawúu̱n jayée̱ mbá chíde̱ xngaa rí xíni mi̱ndaꞌkho. 15 A̱ꞌkhue̱n nigájnuu i̱mba̱a̱ꞌ ánje̱l ná guꞌwá dxákuiin Ana̱ꞌlóꞌ, jamí phú gakhe̱ niꞌthée̱n kajngó madxawuun tsí ꞌgí ná inuu du̱u̱n: «Ada̱a ga̱jma̱á chíde̱ xngaa dríga̱a̱ꞌ rí nijma̱a̱. Numuu rí nikhi̱i̱ máꞌ rí nijma̱a̱ ná numbaa, jamí ni̱ga̱nú máꞌ mbiꞌi rí ma̱gi̱xi̱i ne̱». 16 Ikhaa jngó tsí ꞌgí ná inuu du̱u̱n nixudaa̱ chíde̱ xngaa drígo̱o̱ ná inuu numbaa, a̱ꞌkhue̱n ni̱gi̱xi̱i rí nijma̱a̱ ná numbaa.

17 A̱ꞌkhue̱n nigájnuu i̱mba̱a̱ꞌ ánje̱l ná guꞌwá dxákuiin Ana̱ꞌlóꞌ rí ꞌgí ná mikhuíí, jamí jayée̱ mbá chíde̱ xngaa rí xíni mi̱ndaꞌkho mangaa̱. 18 Xúꞌkhue̱n máꞌ nigájnuu i̱mba̱a̱ꞌ ánje̱l ná wéje̱ ajwa̱nꞌ mo̱jmo̱ꞌ ná nakha wájya, ánje̱l tsí jayángawii agu rí nakha ikhín, jamí phú gakhe̱ niꞌthée̱n kajngó madxawuun ánje̱l tsí jayá chíde̱ xngaa rí xíni mi̱ndaꞌkho: «A̱tro̱thon jwáyúu úba̱ rí nijma̱a̱ ná tsu̱du̱u̱ numbaa ga̱jma̱á chíde̱ xngaa dríga̱a̱ꞌ, numuu rí niꞌgo̱o̱ máꞌ ne̱». 19 A̱ꞌkhue̱n rí ánje̱l nijmuu̱ chíde̱ xngaa drígo̱o̱ rí ma̱ru̱thii̱n úba̱ rí nijma̱a̱ ná tsu̱du̱u̱ numbaa. Niguu̱ ne̱ jamí nigruíye̱e̱ꞌ ne̱ ná awúun itsí mba̱a̱, ná nixúꞌduun ne̱, rí naꞌne xtiꞌkhuu rí najiꞌnáa Ana̱ꞌlóꞌ. 20 Waxúꞌduun úba̱ rúꞌkhue̱n ná awúun itsí mba̱a̱ rí ꞌgí rixa̱á, ra̱ꞌkhá ná awúun xuajen, jamí ikhín nigájnuu mbá mañuu iꞌdi me̱jno̱ꞌ. Nijráꞌáan mañuu iꞌdi rúꞌkhue̱n asndo xó mbá tsída̱ꞌ wáa rawúún guáyo̱ jamí ni̱ga̱nú ne̱ tsíngua̱ꞌ asndo xó mbá atsú siénto̱ (300) kilóme̱tro̱ wáa.*14.20 Ná i̱yi̱i̱ꞌ griégo̱ rí wayuu naꞌthán «mbá míl majun siénto̱ (1 600) estádio̱».