11 Ndawaa aꞌkhuen ndiyoo ri jamaꞌtha mikhu, jami nikujmaa mbaa guayo miꞌxaa. Xomaꞌ xabo tsi riguu guayo mbiꞌyuu «Tsi Jmbii jami Kuwiin», numuu ri phu jmbii ido ri narajweeꞌ jami ido ri naꞌnii xkujndu. 12 Ri iduu nambiꞌi-taꞌa xoma riꞌyuu agu, jami trama mbaꞌa ajwanꞌ gamaku ri jndi na idxuu. Kama waꞌthaan mbiꞌyuu ri tsiꞌne-nuwiin nimbaa, ri indoo maꞌ ikhaa iꞌyoo. 13 Xomaꞌ xtiin ri juwuun niꞌnatoꞌoo iꞌdi, jami ri mbiꞌyuu najuun: «Ajngoo Anaꞌloꞌ». 14 Naguwa gajmaa nindxuu mbaꞌiin mindaꞌkho xabo tsi kuratuun ajwanꞌ, tsi juwaꞌ na mikhuii. Tramuu guayo miꞌxiin mangiin jami juwuun xtiin lino ri phu majan, ri miꞌxa jami jaꞌwu. 15 Na rawuun nagajnuu mba chide xini kajngo maꞌne-jambiyuuꞌ mba xugii xuajen numbaa. Maꞌthan-najuun ne gajmaa nixi ajwanꞌ ri guku mindaꞌkho, jami jminaaꞌ maꞌ ikhaa maxuꞌduun xndu uba gajmaa nakhuu kajngo magajnuu iyoo ne. Ri iyoo uba naꞌne xtiꞌkhuu ri najiꞌnaa Anaꞌloꞌ tsi giꞌdoo mba xugii tsiakhe. 16 Na xtinuu jami na sndiyuuꞌ kama waꞌthaan mbiꞌyuu rigeꞌ: «Thungaa tsi naꞌthan-najuun mba xugiin thungaa jami Xabo Ede tsi jaya ikhuun mba xugiin xabo ede».