1 Ído̱ ndi̱yo̱o̱ rí A̱ꞌdá-mógó nirakhúu timbá tsinuu i̱yi̱i̱ꞌ, a̱ꞌkhue̱n ni̱dxawuun rí nandxaꞌwá mbáa tsí akhu̱un mbo̱ nduya. Phú gakhe̱ indxaꞌwée̱, xómá nawán ído̱ rí naxpíbi. Xáꞌnii niꞌthée̱n: «¡Aya̱ jamí atiaxe̱!».*6.1 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán i̱ndo̱ó máꞌ «Aya̱». Jamí xkuaꞌnii máꞌ ka̱ma ná kíxnuu 3, 5, jamí 7 mangaa. 2 A̱ꞌkhue̱n ni̱ya̱xe̱lo̱ꞌ, ndi̱yo̱o̱ mbáa guáyo̱ miꞌxáa, jamí xa̱bo̱ tsí ríguu̱ jayá mbá xkamídá. Nijanáa̱ mbá ajwa̱nꞌ gamaku rí jndi kajngó maꞌthán-ñájwii̱n, numuu rí ni̱ꞌngo̱o̱ inúú tsí neꞌne gajmíi̱, jamí nigájnuu̱ rí ma̱ꞌngo̱o̱ xóó.

3 Ído̱ rí A̱ꞌdá-mógó nirakhúu̱ riajma̱ tsinuu i̱yi̱i̱ꞌ, a̱ꞌkhue̱n ni̱dxawuun rí nandxaꞌwá i̱mba̱a̱ꞌ tsí ndaꞌya, ikhaa tsí riajma̱a̱. Xáꞌnii iꞌthée̱n: «¡Aya̱ jamí atiaxe̱!». 4 A̱ꞌkhue̱n nigájnuu i̱mba̱a̱ꞌ guáyo̱, ikhaa tsí maña̱a̱ꞌ. Xómáꞌ xa̱bo̱ tsí ríguu̱ nijanáá mbá chíde̱ rí phú mba̱a̱, jamí nijanáa̱ tsiakhe̱ kajngó ma̱ꞌnii̱ rí ma̱ri̱gá xkujndu ná numbaa, jamí rí mu̱radí-mijná xa̱bo̱.

5 Ído̱ rí A̱ꞌdá-mógó nirakhúu̱ riatsú tsinuu i̱yi̱i̱ꞌ, a̱ꞌkhue̱n ni̱dxawuun rí nandxaꞌwá i̱mba̱a̱ꞌ tsí ndaꞌya, ikhaa tsí riatsíi. Xáꞌnii iꞌthée̱n: «¡Aya̱ jamí atiaxe̱!». Ni̱ya̱xe̱lo̱ꞌ, jamí ndi̱yo̱o̱ mbáa guáyo̱ skunii. Xómáꞌ xa̱bo̱ tsí ríguu̱ jayá mbá ajwa̱nꞌ rí na̱giewan-muu rí ji̱ñu̱u̱. 6 A̱ꞌkhue̱n ni̱dxawuunlo̱ꞌ mbá a̱ꞌwá ná majñu̱ú mbá nákhu̱un tsí nduya. Xáꞌnii niꞌthán a̱ꞌwá rúꞌkhue̱n: «I̱ndo̱ó máꞌ mbá xu̱wa̱á ixí iña ma̱ꞌne numuu mbá mbúkha̱a̱ ajwa̱nꞌ, jamí i̱ndo̱ó máꞌ atsú xu̱wa̱á ixí ma̱ꞌne numuu mbá mbúkha̱a̱ ajwa̱nꞌ,*6.6 Mbúkha̱a̱ ajwa̱nꞌ rúꞌkhue̱n mbiꞌyuu «denário̱» ná ajngáa griégo̱. Mbá mbúkha̱a̱ rúꞌkhue̱n nadaa numuu xa̱bo̱ rí nañajun mbá mbiꞌi. i̱ndo̱ó máꞌ numuu rí ma̱xáta̱xu̱xí numuu yatsi̱i xndú olíbo̱ ni máꞌ iyoo úba̱ rí ni̱ga̱yu̱u̱ꞌ».

7 Ído̱ rí A̱ꞌdá-mógó nirakhúu̱ riakho̱ tsinuu i̱yi̱i̱ꞌ, a̱ꞌkhue̱n ni̱dxawuun a̱ꞌwóo i̱mba̱a̱ꞌ tsí ndaꞌya, ikhaa tsí riakhui̱i̱. Xáꞌnii iꞌthée̱n: «¡Aya̱ jamí atiaxe̱!». 8 A̱ꞌkhue̱n ni̱ya̱xe̱lo̱ꞌ, jamí ndi̱yo̱o̱ mbáa guáyo̱ waba mu̱jmi̱i̱ꞌ. Xómáꞌ tsí rígu tsu̱du̱u̱ mbiꞌyuu «Tsiakhe̱ rí na̱gu̱díin xa̱bo̱», jamí tsí na̱ꞌkha̱ ga̱jmáa̱ mbiꞌyuu «Iñá-wajíín». Nijanúu̱ tsiakhe̱ rí mu̱radíi̱n mbóó rí akho̱ kuthuun xa̱bo̱ tsí júwa̱ꞌ ná numbaa, mu̱radíi̱n ga̱jma̱á xkujndu, ga̱jma̱á ewi, ga̱jma̱á nandii jamí gajmíí xu̱kú-xáná tsí phú namangu̱únꞌ.

9 Ído̱ rí A̱ꞌdá-mógó nirakhúu̱ tiwitsu tsinuu i̱yi̱i̱ꞌ, a̱ꞌkhue̱n ni̱ya̱xe̱lo̱ꞌ ná agoo natráma rí nakha inuu Ana̱ꞌlóꞌ, jamí ndi̱yo̱o̱lo̱ꞌ ními̱í tsí nijáñúú nene̱ xa̱bo̱ ga̱jma̱á numuu ajngáa rawuun Ana̱ꞌlóꞌ jamí ga̱jma̱á numuu nuthee̱n rí nanimbúu̱n juyáa̱. 10 Jamí phú gakhe̱ nu̱ndxa̱ꞌwe̱e̱ rí nuthee̱n: «Táta̱, tsáánꞌ xtaꞌdáá mbá xúgíí tsiakhe̱, tsáánꞌ jaꞌwíín jamí phú kuwíín, asndo nguáná gáta̱xu̱ꞌdáa awan ga̱jma̱á numúú xa̱bo̱ numbaa, jamí ma̱tha̱ne̱ rí mudaa̱ jamínu̱ꞌ ga̱jma̱á numuu rí ni̱radiáanꞌxo̱ꞌ róꞌ». 11 A̱ꞌkhue̱n nijanúu̱ xtíin miꞌxá majúwúu̱n, jamí waꞌthúu̱n rí mu̱waꞌthíi̱n i̱mbá lájwíin xóó, numuu rí ndaꞌyóo xóó ma̱ja̱ñúú a̱nguíi̱n, yumbáá gajmíi̱ tsí wéje̱ máꞌ rí ma̱ja̱ñúú xómá nijáñúu̱ ikhii̱n.

12 Ído̱ rí A̱ꞌdá-mógó nirakhúu̱ timajun tsinuu i̱yi̱i̱ꞌ, a̱ꞌkhue̱n ni̱ya̱xe̱lo̱ꞌ jamí phú gakhe̱ nixma. Neꞌne jína inuu a̱kha̱ꞌ asndo xómá xtíñúú tsí júwa̱ꞌ jínúú jaꞌnii, jamí go̱nꞌ neꞌne maña̱a̱ꞌ asndo xómá iꞌdi. 13 Xómáꞌ a̱ꞌgua̱án tsí timii mikhuíí, nifriguu̱n mbayíí, xómá rí nafrigu ruduu xndúu ixe̱ ígo̱ ído̱ rí naꞌne gakhe̱ gíñá. 14 Xómáꞌ mikhu ningudi̱i ne̱ mbá jayu, nánguá nikujma ne̱ xómá agú rí wambúxi̱i jamí ni̱gi̱xi̱i. Mbá xúgíí júba̱ nixtiꞌkhu̱u ná wájun ne̱, xúꞌkhue̱n máꞌ mbaa rí tuaꞌán ná awúun iya a̱pha̱ nixtiꞌkhu̱u ná triga̱ ne̱.

15 A̱ꞌkhue̱n mbá xúgíin xa̱bo̱ tsí júwa̱ꞌ ná numbaa ni̱rkaꞌu-mijnée̱ ná iñúu ju̱ba̱ꞌ jamí ná iñúu pátsí rí ríga̱ ná júba̱: thúngaa, xa̱bo̱ ñajun, xa̱bo̱ tsí nuthan-ñajúún tsí ku̱ra̱tuun ajwa̱nꞌ, xa̱bo̱ tsí phú guáꞌdáá mbúkha̱a̱, xa̱bo̱ tsí guáꞌdáá tsiakhe̱, xa̱bo̱ tsí nithán-ñájúún jamí xa̱bo̱ tsí nuthan-ñajun-mijná máꞌ ikhiin. 16 Mbá xúgíi̱n nu̱nda̱ꞌáa̱ júba̱ jamí pátsí: «Ga̱friguáanꞌlaꞌ ná tsu̱da̱ꞌxo̱ꞌ, jamí gu̱rkaꞌwáanꞌxo̱ꞌ inuu tsí ꞌgí ná xíli̱i thúngaa jamí inuu rí najiꞌnáa A̱ꞌdá-mógó, 17 numuu rí ni̱ga̱nú máꞌ mbiꞌi rí phú mba̱a̱ najiꞌníi̱, jamí nimbáa ma̱xáꞌngo̱o̱ ma̱we̱je̱-gúkúu ná inúu̱».