Gênesis 18

23 Reve Ibrahim ta̱wa̱ zuzu na̱ a̱yi reve we ece yi, <<Na amayun a ɗa voo kototo a̱za̱ a̱ a̱ɓula̱ oɓolo na aza a avama? 24 Lyawa a damma a̱ ta̱ tsura̱ ama kupoton a̱za̱ a̱ a̱ɓula̱ a̱tsuma̱ a̱ lyuci gbai’in, vu ta̱ kototo uba̱ta̱’a̱ suru suru? Vaa yuwaan le ankuri adama a ama a̱ a̱ɓula̱ kupoton o ndolo aza a na a̱ ri pe na̱ nden shi? 25 Amayun, voo una a̱za̱ a̱ a̱ɓula̱ na̱ a̱za̱ o unusu shi. Ili i ndolo i ri n yuwan ne shi! Vaa yuwan tsundolo shi. Na̱ vu yuwan ne, vu to foro a̱za̱ a̱ a̱ɓula̱ na̱ a̱za̱ o unusu. Ili i ndolo i ri n yuwan shi. Za na a yuwaan uvaɗi ma̱ɓula̱ uge’etosu u ta yuwusan ili i mejege.>> 26 Reve A̱sulazuva a damma, <<Nna̱ n tsura̱ ama kupoton a̱za̱ a̱ a̱ɓula̱ a̱tsuma̱ a̱ lyuci gbai’in, n ta yuwaan uba̱ta̱ suru ankuri adama e le.>> 27 Reve Ibrahim yuwisan adanshi, <<Yuwan ankuri yuwaan mu gafura va adanshi a na maa yuwusan babu wovon a yuwusan na̱ a̱vu Zagbain. A̱mu ma̱buta̱ ma ɗa no okomo goon. 28 Na a lamba ama o ton a̱tsuma̱ a kupoton o ndolo a̱za̱ a̱ a̱ɓula̱, vu to kototo lyuci’i adama a na a lambai ama o ton o ndolo?>> Reve u damma, <<Adama a ama amunga no ozo o ton a̱ a̱ɓula̱ o ndolo mo kototo yi shi.>> 29 Reve u da̱shi yuwisan adanshi na̱ a̱yi, u damma, <<Na̱ a̱ tsura̱ ama amunga gba?>> Reve u damma yi, <<Adama a ama amunga o ndolo moo kototo yi shi.>>

30 Reve u damma <<She Zagbain yuwan upan na̱ a̱mu wan na̱ n yuwisan adanshi. Na̱ a̱ tsura̱ ama a̱ a̱ɓula̱ mata’atsu, gba?>> Reve u damma, <<Na̱ a̱ tsura̱ ama mata’atsu, moo kototo yi shi adama a ama mata’atsu o ndolo.>> 31 Reve Ibrahim yuwisan adanshi, <<Yuwan ankuri yuwaan mu gafura va adanshi a na maa yuwusan babu wovon a yuwusan na̱ a̱vu Zagbain. A damma a̱ tsura̱ ta̱ ama ushin gba?>> Reve u usu, <<Adama a ama ushin o ndolo, moo kototo yi shi.>> 32 Reve u damma, <<She Zagbain yuwan upan na̱ a̱mu wan na̱ n da̱shi yuwan adanshi na̱ a̱vu u ta̱ goon. A damma a̱ tsura̱ ta̱ ama kupa gba?>> Reve Zagbain usu, <<Adama a ama kupa o ndolo moo kototo yi shi.>> 33 Ana A̱sulazuva o kotoi adanshi na̱ Ibrahim reve u yuwan uka̱ru wa̱ yi, reve gba Ibrahim ka̱ra̱ a̱ ka̱mba̱ o u’wa wa̱ yi.