Lucas 1

Luka Walembela Tiyofilasi

1 Nomuyandwa ba Tiyofilasi:

Bantu banji bakasoleka cenguzu kulemba mundandaanda wezintu zyakacitika okuzuzikizigwa akati kesu. 2 Bakalemba zyoonyina zitwakaambilwa abakamboosi be jwi bakazibona amenso kuzwa kumatalikilo. 3 Iino nomukutekwa, mbokunga ndakazicilizya obotu-obotu zintu eezi zyoonse kuzwa kumatalikilaateni, amebo ndakayeeya kuteeti cabota ndimulembele zizyo kabotu-kabotu. 4 Ndacita namu kuteegwa muzizibe nconzyo zimwakaiisigwa.

Kwaambilizigwa Kokuzyalwa Kwa Joni Mubbabbatizi

5 ✝ 1:5 1 Makani 24:10. Nako Helodi naali mwami we cilalaanda ca Judiya, kwali mupaizi walikwiitwa kuteeti Zakaliya walikuzulilwa mukabunga kobupaizi bwa Abija. Mwanakazaakwe walikwiitwa kuteeti Lizabeti waliweciinga cobupaizi bwa Aloni awe. 6 Boonse bobile baliluleme mumenso aa Leza okucilizya milawo amalailile o Mwami oonse kabotu-kabotu. 7 Kono taakwe nibakajesi bana, mukuteeti Lizabeti taali kuzyala ape boonse bobile balicembeede.

8 Bumwi buzuba Zakaliya walikubeleka musebezi wakwe wobupaizi kuli Leza, kaambo wali muguyu wakabunga kakwe. 9 Kweendelana ecizo cobupaizi, Zakaliya wakasalwa kwiinda mukuuma cisolo*1:9 Bapaizi bakabelesyanga zintu zimbi kuteeti bazibe uuti katente lubbani. Balikubika mazina aabapaizi acintu-acintu mpoonyina okuzibika zintu eezi mucigumbuli okuciyuntaanya naanga kugwisya comwi. Balikusyoma kuteeti mupaizi uleezina lili acintu cabwezegwa nguwakasalwa o Leza kuteeti atente lubbani. kuteegwa akatente tununkilizyo acipaililo, mpoonyina wakanjila mu Ngʼanda yo Mwami. 10 Aleeyo nako, mbunga yabantu yalikukomba anze. 11 Mpoonyina mungelo wa Leza wakalibonya kuli Zakaliya, kaimvwi kululyo lwa cipaililo aali kutentelwa tununkilizyo. 12 Zakaliya naakabona mungelo ooyo wakatilimuka okuyoowa loko. 13 Kono mungelo wakateeti, "Zakaliya utayoowi kaambo Leza wamvwa kukomba kwako, mpoonyina mwanakazaako Lizabeti uyookuzyalila mwana musyimani. Ukamuuzike zina lya Joni. 14 Uyobotelwa okunonenwa antoomwi abantu banji kaambo kokuzyalwa kwakwe! 15 ✝1:15 Myeelwe 6:3. Unooli mwaalumi munkutwe mumensaa Mwami. Teelede kunonywa waini naanga cimwi cikola*1:15 Joni wapedwe ku mwami kuteeti azuzikizye musebezi mupati. Mwami wakalailila kuteeti Joni antanoonywi waini mbuli citondezyo cokuteeti walipedwe.. Katana okutumbukwa unoozwide Muuya Uusalala, 16 Ape uyoopilusya bana Izilaili banji ku Mwami Leza wabo. 17 ✝1:17 Malaki 4:5-6.Uzoozulula kunembo lyo Mwami mumuuya omunguzu mbuli musinsimi Elija kweeta antoomwi bamaisi abana ape, okusandula basicinguni kuboobusongo bwa balulami. Uyoocita zyoonse eezi kuteegwa bantu balibambile kuza ko Mwami."

18 Mpoonyina Zakaliya wakateeti ku mungelo, "Ino ndilaziba buti kuteeti kulaba namu? Mebo omwanakazaangu twacembaala."

19 ✝ 1:19 Danyele 8:16; 9:21. Kuzwaawo mungelo wakataba kuteeti, "Ndime Gabuliyeli, wiima kunembo lya Leza. Wandituma kuzaamboola ayibo okukweetela aaya makani mabotu. 20 Iino bona! Kaambo kokuteeti taakwe niwasyoma makanaangu ayoozuzikizigwa muciindi ceelede, tonookonzyi kwamboola naanga aniini kusikila eezi zikacitike."

21 Muciindeeco, bantu bali kulindila Zakaliya, kabakomokedwe kuteeti na waliyeha buti mu Ngʼanda ya Leza. 22 Nakazwaanze, talikukonzya kwaamboola, aati kutondaika amaanza akwe, mpoonyina bakaziba kuteeti wabona cilengaano mu Ngʼanda ya Leza kaambo wakazumanana kutaamboola.

23 Niwakamana muguyu wa Zakaliya mu Ngʼanda ya Leza, wakapiluka kungʼanda yakwe. 24 Nikwakainda kaindi, Lizabeti mwanakazi wa Zakaliya wakamita, mpoonyina taalikuzwa mu ngʼanda kwe myeezi yosanwe. 25 Kuzwaawo wakateeti, "Maa! Iino Mwami wandigwasya, kumamanino kale wandigwisya masampu akati kabantu."

Kwaambilizigwa Kokuzyalwa Kwa Jesu

26 Lizabeti kaleemyeezi iili cisambomwi yokumita, Leza wakatuma mungelo Gabuliyeli kuya kutaindi lye Nazaleta mucooko ca Galileya. 27 ✝1:27 Mateyo 1:18. Mungelo ooyo walikweeta makani kulinakalindu wezina lya Maliya, wakatangidwe kuli Josefa wali womukowa wo Mwami Deveti. 28 Mungelo wakeza kulinguwe okumwaambila kuteeti, "Lumela oolelekedwe! Mwami ulaayibo*1:28 Malembo amwi ayungizizya mabbala ookuteeti, "Ulilelekedwe akati kabanakazi."."

29 Maliya wakapenzegwa loko mumoyo kaambo kamakani akeetwa omungelo, okulibuzya caalikupandulula. 30 Mpoonyina mungelo wakateeti kulinguwe, "Utayoowi Maliya, Leza wakumvwida luzyalo. 31 ✝1:31 Mateyo 1:21. Bona! Uyoomita okutumbuka mwana musyimani, mpoonyina ukamuuzike kuteeti Jesu. 32 ✝1:32 2 Samuele 7:12-13, 16; Izaya 9:7. Mwanooyo uyooba mupati okwiitwa kuteeti Mwanaa Leza*1:32 Jesu Mwanaa Leza munzila iisiyene abantu susu mbobaba bana kumaisi. Bbaibbele libelesya bbala lyo mwana kutondezya kuteeti Jesu ulaabube mbuli bwa Leza ape uzwa kuli Leza. Ape citondezya cibbululu akati ka Leza o Jesu, mwana wakwe mbocikozyenye ecibbululu ca isi o mwana kubuntu susu. Sijulu Wama Julu. Mwami Leza uyoomupa cibbula cobwami bwa Deveti sikale wakwe 33 ape uyooba mwami wolunyungu lwa Jakobo mane kukabe kutamani!" Bwami bwakwe tabukamani.

34 Maliya wakateeti kumungelo, "Ndicilinakalindu. Ino eeci ciyoocitika buti?"

35 Mungelo wakamutaba kuteeti, "Muuya Uusalala uyookuselukila, mpoonyina enguzu zya Leza Sijulu Wama Julu ziyooza aliyebo. Kaambo keeco, mwana uusalala uzoitwa kuteeti Mwanaa Leza. 36 Uyeeye muzyalwanyoko Lizabeti! Kwalikwaambwa kuteeti takonzya kuboomwana, kono we uleetumbu lye myeezi iili cisambomwi, nekuba kuteeti ulicembeede, 37 ✝1:37 Matalikilo 18:14. kaambo Leza taakwe catakonzya kucita."

38 Maliya wakateeti, "Ndilimuzike wa Leza. Akube mboonya mbuli mbowaamba." Mpoonyina mungelo wakainka.

Maliya Wapotela Lizabeti

39 Mumazuba aayo, Maliya wakanyamuka okwiinka cokufwambaana mucibaka camalundu mutaindi iili mucooko ca Judiya. 40 Naakasika wakanjila mungʼanda ya Zakaliya okulumelesya Lizabeti. 41 Mpoonyina Lizabeti naakamvwa kulumelesya kwa Maliya, mwana mutumbu lyakwe wakaputooka. Muuya Uusalala wakazula muli Lizabeti. 42 Kuzwaawo Lizabeti wakoongololola kuli Maliya kateeti, "Ulilelekedwe akati kabanakazi, ape omwana uulimutumbu lyako ulilelekedwe! 43 Ino ndime ni cokuteeti banyina bo Mwami wangu bazoondipotele? 44 Iino mbundamvwinda feela kulumelesya kwako, mwana uuli mutumbu lyangu waputooka cokunonenwa. 45 Ulilelekedwe kaambo wakasyoma kuteeti caakakwaambila Mwami ciyoozuzikizigwa."

Lwiimbo Lokulumbaizya Lwa Maliya

46 Mpoonyina Maliya wakateeti,

"Muuya wangu watembaula Mwami.

47 Moyo wangu wabotelwa kaambo ka Leza Mufutuli wangu,

48 ✝ 1:48 1 Samuele 1:11. kaambo we wandiyeeya ndemuzike wakwe uubombede!

Kuzweeno mazyalano oonse aaza anoondiita kuteeti ulelekedwe,

49 kaambo kezintu zipati zyaandicitila Leza Singuzu zyoonse.

Izina lyakwe lilasalala.

50 Ulaamangʼeke kulaabo bamuyoowa,

kuzwa kumazyalani amwi kusika kulaamwi.

51 Wavungununa janza lyakwe lyenguzu okucita zintu zipati,

okumwaya baleentunda antoomwi amakanze aabo.

52 ✝ 1:52 Jobo 5:11; 12:19. Wagwisya bami basinguzu muzibbula zyabo zyobulelo,

okunyamuna basulidwe.

53 Wakusya bafwide nzala ezintu zibotu

okutanda bavubide cinkwamaanza.

54 Wagwasya Izilaili mubelesi wakwe

mukuteeti taakwe naaluba kutondezya mangʼeke

55 ✝ 1:55 Matalikilo 17:7. ✝ 1:55 1 Samuele 2:1-10. kuli Abbulahamu okulunyungu lwakwe mane kukabe kutamani,

mboonyina mbwaakasyomezya kuli basikale besu."

56 Mpoonyina Maliya wakakala o Lizabeti kwe myeezi iisika kuli yotatwe, amane wakapiluka kungʼanda yakwe.

Kuzyalwa Kwa Joni Mubbabbatizi

57 Nako yakasika yokuteeti Lizabeti aangunuke, mpoonyina wakatumbuka mwana musyimani. 58 ✝1:58 Levitiko 12:3. Basimukobonyina abecibbululu nibakamvwa Mwami Leza mbwaakafwida Lizabeti mangʼeke, bakasekelela antoomwi anguwe.

59 Mwana naakakwanisya mazuba aali lusele, bakeza kuteegwa bazoope mwana zina okumupalula.*1:59 Kupalulwa ciiminina citondezyo cokunyama citondezya cizuminano cecibbululu citamani akati ka Leza abama Juda. Balikuyanda kumupa zina lya Zakaliya isi. 60 Kono banyina bakateeti, "Nee! Weelede kwiitwa kuteeti Joni."

61 Bakateeti kulinguwe, "Ede taakwe wecibbululu uulezina lili namu?" 62 Mpoonyina bakatambaikila Zakaliya isi kuteeti abaambile zina ndyalikuyanda kuuzika mwana wakwe.

63 Zakaliya wakakumbila cilembyo, okulemba kuteeti, "Zina lyakwe ngu Joni." Mpoonyina boonse bakakomokwa loko! 64 Mpoonyinaawo Zakaliya wakakonzya kwaamboola ape, okutalika kulumbaizya Leza. 65 Boonse basimukobonyina bakayoowa loko, mpoonyina makani eezintu eezi akasabalangana mumalundu oonse aa Judiya. 66 Boonse bakamvwa bakazumanana kuyeeya mumyoyo yabo okulibuzya kuteeti, "Ino ooyu mwana uyoba ni?" Bakayeeya namu kaambo nguzu zya Leza zyakalitondezya kubaalinguwe.

Businsimi bwa Zakaliya

67 Mpoonyina Zakaliya isi Joni wakazula Muuya Uusalala okusinsima kateeti,

68 Atulumbaizye Mwami Leza wa Izilaili,

kaambo waza kuzoogwasya bantu bakwe okubanununa.

69 Watutumina Mufutuli singuzu,

wolunyungu lwa Deveti mubelesi wakwe,

70 mbuli mbwaakasyomezya kwiinda mubasinsimi bakwe basalala bensiku.

71 Watutumina ooyu Mufutuli kuteegwa azootufutule kuzwa kuli batulwana,

omumaanza aabo batatuyandi boonse.

72 Wakacita namu kuteegwa atondezye mangʼeke kuli basikale besu

okuzuzikizya cizuminano cakwe cisalala.

73,74 Acikonke cipati wakasyomezya Abbulahamu sikale wesu

kutunununa kuzwa kumaanza aabatulwana

okutuzumizya kumubelekela cokutayoowa,

75 kuteegwa tube basalede okululama anembo lyakwe,

mazuba oonse oobuumi bwesu.

76 ✝ 1:76 Malaki 3:1. Yebo, mwaanangu uyooitwa kuteeti musinsimi wa Leza Sijulu Wamajulu,

kaambo uyooinka kunembo lyo Mwami,

kuteegwa ukamubambile mugwagwa mwatazoinde,

77 okwaambila bantu bakwe kuteeti bayoofutulwa kwiinda

mukujatilwa zibi zyabo.

78 Leza wesu ulaamangʼeke ape muteteete.

Uyootumunikila lufutuko lwakwe mbuli mumuni wokubucedo,

79 ✝ 1:79 Izaya 9:2. kumunika kuzwa kujulu kumunikila aabo bantu bakede mumudima omumunzinziimwa wolufu,

okusolwedela kweenda kwesu munzila yoluumuno.

80 Mwanooyu wakakomena okubeenguzu mumuuya. Walikukala munkanda mpoonyina wakatalika kukambooka antangalala kubantu bomu Izilaili.