25 ✝ 10:25 Mateyo 22:35-40; Maako 12:28-34. Imwi nako mwiiyi wo Mulawo wakeza kuli Jesu okusola kumuca kateeti, "Omwiiyi mubotu, ino ndeelede kucita nzi kuteegwa nditambule buumi butamani?"

26 Jesu wakamutaba kuteeti, "Ino Malembo aamba kuteeti nzi? Ino waapandulula buti?"

27 ✝ 10:27 Detilonomo 6:5; Levitiko 19:18. Mpoonyina mwaalumi wakateeti, "‘Yanda Mwami Leza wako omoyo wako woonse, omuuya wako woonse, enguzu zyako zyoonse, emizeezo yako yoonse’ ape yanda muntunyoko mboonyina mboliyanda."

28 ✝ 10:28 Levitiko 18:5. Jesu wakamutaba kuteeti, "Waamba kabotu. Cita mboonyina namu, uyooboo buumi."

29 Kono mwiiyi wo Mulawo mukuyanda kulisalazya, wakabuzya Jesu kuteeti, "Ino ngwani muntuma ngondeelede kuyanda?"

30 Mpoonyina Jesu wakataba kuteeti, "Imwi nako kwali umwi mwaalumi wali mumusinzo kuzwa ku Jelusalemu kaya ku Jeliko. Munzila bafumpi bakamulwana, kumutubula, okumuuma okumusiya kayuminide. 31 Kuzwaawo, kwakeza mupaizi umwi kayoobweenda munzila njoonyeeyo, kono naakabona mwaalumi ooyu, wakamuleya. 32 Awe mu Levi naakasika acibaka eeco wakamubona mpoonyina wakamuleya. 33 ✝10:33 2 Makani 28:15.Kono mu Samaliya walimumusinzo wakasika aali mwaalumi ooyu. Naakamubona wakamufwida mangʼeke. 34 Mpoonyina wakamwiinkila okutila waini azilonda zyakwe okumunanika mafuta mpoonyina okumuzambaila zisila. Amane wamutansika ambongolo yakwe okumutola kungʼanda yabeenzu, ooko kwaakakumubabalela. 35 Buzuba bwakacilila mu Samaliya wakapa mwini ngʼanda yabeenzu mali omuwaya-waya we nsiliva obile okumwaambila kuteeti, ‘Umubabalele kabotu, nakuteeti ubelesye ainda aawa, ndaakupiluka ndizookubbadela.’"

36 Mpoonyina Jesu wakamaninizya kateeti, "Ino mumuzeezo wako, ngwani aalaaba bamaalumi botatwe wakaba muntunyina mubotu kulooyu mwaalumi wakalwanwa abafumpi?"

37 Mwiiyi wo Mulawo wakataba kuteeti, "Ngooyo wakamufwida mangʼeke."

Mpoonyina Jesu wakamutaba kuteeti, "Mbombubo, iino koya ukacite mboonyina namu."