Lucas 15

Cikozyano ca Isi Uulekelela

11 Kuzwaawo Jesu wakazwida anembo kateeti, "Kwali mwaalumi wajesi bana basyimani bobile. 12 Mpoonyina muniini wakateeti kuliisi, ‘Tata, ndipe caabilo cangu colubono.’ Mpoonyina mwaalumi ooyu wakaabanya lubono lwakwe akati kabana bakwe bobile. 13 Nikwakainda feela mazuba maniini, ooyu muniini wakauzya lubono ndwaakapedwe okubweza mali oonse amane waya kunyika iili kule kwaakaakutatoola mali mukucita zyobufuba-fuba. 14 Wakalumana lubono ndwaajesi, kuzwaawo mucisi oomo mwakanjila nzala ilunda kasuko, mpoonyina wakatalika kupenga. 15 Kuzwaawo wakatalika kubeleka kuluumwi muntu womucisoomo, wakamutuma mumyuunda yakwe kuyoosanina ngulube*15:15 Mulawo wama Juda walikwaamba kuteeti ngulube zinyama zisofweede. Kweendelana omulawo ooyu, ma Juda tibalikweelede kulya nyama yengulube. Balevi 11:7. Mpoonyina ma Juda balikubisyaanya ngulube abantu balikuzilela.. 16 Musyimani ooyu walikufwa nzala cokuteeti walikunyomenena kulya zyokulya zye ngulube kono taakwe walikumupa cili coonse. 17 Kono kumamanino naakaliyeeya wakateeti, ‘Boonse babelesi ba tata balalya mbobayandila, iino mebo kuno ndaandoofwa enzala! 18 Ndilapiluka kuli tata okuyoomwaambila kuteeti, "Tata, ndakabisya kuli Leza okuli yebo. 19 Tandiceelede kwiitwa kuteeti mwana wako, ndibweze feela mbuli umwi wababelesi bako."’ 20 Mpoonyina wakanyamuka okupiluka kuliisi. Kono kacili kule omuunzi, isi wakabona mwana wakwe. Moyo wakwe wakazula mangʼeke, mpoonyina wakamuzuzila, okuyoomukumbata okumumyoonta.

21 "Mpoonyina we wakateeti, ‘Tata, ndakabisya kuli Leza okuli yebo. Tandiceelede kwiitwa kuteeti mwana wako.’ 22 Kono bo baisi bakaita babelesi babo, kabateeti, ‘Amufwambaane! Amweete jansi liinda kubota, mumuzwaatike. Mumubike nwenwe kumunwe, mwamana mumuzwatike ezikatulu. 23 Mpoonyina mweete munamani uneneede*15:23 Mikwasyi yeci Juda yakali kujesi mali manji yakali kusanina munamani cokulya cinji kuteegwa aneneye. Mikwasyi eeyi yayanda kuba omukiti, yakali kulibambila kujaya okulya munamani ooyu., mujaye kuteegwa tupange mukiti tusekelele, 24 kaambo ooyu mwaanangu musyimani walifwide kono iino wabuka, waliswekede, kono iino wajanwa.’ Mpoonyina mukiti wakatalika.

25 "Aleeyo nako mwana wakwe mupati taaliwo, walikumuunda. Iino naalikuyoobupiluka, naakaswenaafwiifwi omuunzi wakamvwa kwiimba okuzyana. 26 Kumane wakaita umwi wababelesi okumubuzya kuteeti, ‘Ino niinzi cicitika?’ 27 Mubelesi wakateeti, ‘Mweencaako wapiluka mpoonyina bauso bajaya munamani uneneede, kaambo bamutambula kali muumi ape kalikabotu.’ 28 Kono mupati wakanyema loko mane wakakaka okunjila mungʼanda. Mpoonyina isi wakazwaanze okumukombelezya kuteeti anjile. 29 Kono wakataba isi kuteeti, ‘Kolanga, myaaka yoonse eeyi ndakubelekela mbuli muzike, ape lyoonse ndalikucilila malailile aako. Ino wakandipedeenzi? Taakwe naanga mpongo feela kuteeti ndisekelele abeenzuma! 30 Kono ooyu mwana wako, wakatatoola lubono lwako kumahuule, we ucisika feela wamujaila munamani uneneede!’ 31 Isi wakataba kuteeti, ‘Mwanaangu, yebo ukalaandime lyoonse, ape zyendijesi zyoonse zizyako. 32 Kono twacita kabotu kusekelela kaambo ooyu mweencaako walifwide, iino wabuka, walisweekede, iino wajanwa.’"