Lucas 24

Musinzo woku Emasi

13 Mubuzuba oobo mboonyina, basikwiiya bobile balikuyoobuya kumuunzi wiitwa kuteeti Emasi. Kuzwa ku Jelusalemu kuya ku Emasi kakali kasinzo keendwa mawoola obile. 14 Nibalikuyoobweenda, balikuyoobwaamboozyanya zyoonse zyakacitika. 15 Nibalikuyoobwaamboozyanya, Jesu lwakwe wakaswena afwiifwi okutalika kweenda abo. 16 Bakamubona kono taakwe nibakamuziba kuteeti na ngwani. 17 Mpoonyina Jesu wakababuzya kuteeti, "Ino makani nzi ngomuyobwaamboola nomuyoobweenda?"

Bakaima nji, kabauside ameenso. 18 Umwi wabo, walikwiitwa kuteeti Kilewopasi wakamubuzya kuteeti, "Ino ndiwe mweenzu olike mu Jelusalemu utezi zyalikucitika kwateni mumazuba maniini ainda?"

19 Mpoonyina Jesu wakabuzya kuteeti, "Zintuunzi eezyo?"

Bakamutaba kuteeti, "Zintu zyakacitika kuli Jesu woku Nazaleta. Ooyu mwaalumi walimusinsimi mupati ape walisinguzu loko muzintu zyaali kwaamba okucita ape walikukutekwa o Leza abantu boonse. 20 Bapaizi basilutwe abasololi besu bakamwaaba kuteeti akaatulwe kujaigwa. Mpoonyina bakamukankamina aciingano. 21 Kono twasyomede kuteeti nguutikonzye kulukulula Izilaili! Kutali feela eeci, iino oobu mbuzuba bwatatu kazicitikide eezi. 22 Mpoonyina ape bamwi banakazi bembunga yesu batukomosya. Kubucedo bainkide kucuumbwe, 23 kono taakwe nibaujana mutunta wa Jesu. Bapiluka okwaamba kuteeti babona cilengaano cabangelo babaambila kuteeti Jesu muumi. 24 Mpoonyina bamwi besu baliinkide kucuumbwe, okuyoojana nconzyo mboonyina mbubaamba banakazi, kono taakwe nibamubona."

25 Mpoonyina Jesu wakabaambila kuteeti, "Mulibafuba-fuba balibuti, mucedwa buti kusyoma zyoonse basinsimi zibakaamba! 26 Ino ticalikweelela Mesiya kupenga namu okunjile mubulemu bwakwe na?" 27 Mpoonyina Jesu wakabapandulwida zyalikwaambwa zyakwe mumalembe oonse, kutalikila kumalembe a Mozesi abasinsimi boonse.

28 Nibakasika afwiifwi omuunzi kubali kwiinka, Jesu wakacita mbuli kuteeti walikwiindilila, 29 kono bakamukumbila kabateeti, "Kala aswibo, kaambo zuba lyainka kulazwa kwasiya." Mpoonyina wakanjila kukalaabo. 30 Wakakala ansi kuteegwa alyaabo, wakabweza cinkwa okulumba, mpoonyina wakacikomoona okubapa. 31 Mpoonyinaawo menso aabo akajuka, bakamuziba, kono wakazimaana, taakwe nibakamubona ape. 32 Mpoonyina bakabuzyanya kuteeti, "Ede kwalimbuli mulilo uuyaka muzyamba zyesu naalikwaamboola aswibo munzila okutupandulwida malembe?"

33 Mpoonyinaawo bakanyamuka okupiluka ku Jelusalemu kubakaakujana basikwiiya bali kumi aomwi kababungene abamwi. 34 Aaba babungene bakaamba kuteeti, "Nconzyo Mwami wabuka! Wabonekela kuli Saimoni!"

35 Mpoonyina aaba bobile bakapandulula zyakacitika munzila yo ku Emasi ape ombubakamuziba Mwami naakakomona cinkwa.