27 Jesu naakaseluka mumugolo, umwi mwaalumi wanjidwe madimona wakeza okuzomuswanganya. Ooyu mwaalumi walikuzwa mutaindi eeli kono kweciindi cilamfu taalikukala mungʼanda walikukala mumayumbelo ape taalikuzwaata. 28 Naakabona Jesu, wakoongolola okulifusa kuzituta zya Jesu okwaamba kuteeti, "Jesu Mwanaa Leza, Sijulu Wama Julu! Ino uyanda nzi kulindime? Ndakukumbila utandipi cisubulo!" 29 Wakaamba namu kaambo Jesu wakalailide kale muuya mubi kuteeti uzwe mulinguwe. Bunji bweziindi naalikupenzegwa omuuya mubi ooyu walikulindilwa kaangidwe amaceeni kumaanza okumaulu kono walikwaadunsula mpoonyina muuya mubi walikumutola musaka.
30 Jesu wakamubuzya kuteeti, "Ndiweni zina lyako?"
Wakateeti, "Ndime dwi lyabasinkondo," kaambo wanjidwe madimona manji. 31 Madimona akazumanana kukombelezya Jesu kuteegwa ataatandili mudindi litagoli.8:31 Ma Juda balikusyoma kuteeti cibaka cabafu kwali kunseenyika. Ape cali cibaka myuuya mibi koyakabikidwe kiilindila buzuba Leza mbwayoipa cisubulo.
32 Iino afwiifwi kwali tanga pati lyengulube zyalikucela acilundu, mpoonyina madimona akakumbila Jesu kuteeti aazumizye kunjila mungulube. Kumane wakaazumizya. 33 Madimona aaya akazwa mumwaalumi ooyu okuyoonjila mungulube mpoonyina tanga lyoonse lyakaselemuka kuzwa acilundu okuwida mulwizi okwiinkila.
34 Baalumi bali kweembela ngulube nibakabona namu, bakacija kabayoobusabalanganya nkaneeyi mutaindi omumiinzi yalaafwiifwi. 35 Kuzwaawo bantu bakainka kuyoobona zyakacitika, mpoonyina nibakeza kuli Jesu bakamujana mwaalumi ooyo wakagwisigwa madimona kakede kumaulu a Jesu kazweete ape kasitikide, mpoonyina bakayoowa boonse.
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)