2 Mo ndambi eyo, Yoani Mubatisya abyaga niaminirwe, mwonvwa ng’oko abasɨmola ko mɨrɨmo ya Kirisito. Aho mwathʉma bagʉma b’oko bɨga bʉwe, 3 ɨya bʉtsya Yesʉ bathɨ: «Ewono ɨwe ʉlɨ yo wangahikire, kʉtse thʉlɨnde ʉndɨ?» 4 Yesʉ Mwashʉbɨtsyabo athɨ: «Mʉgende mʉyabwɨre Yoani byo monvwa na byo mʉlolako. 5 Esombumi esɨlola, ebɨrema ebɨgenda, ababenzɨ abetsɨbwa, abatsɨha abonvwa, abaholi abalubuka, n’eNgʉlʉ Mbʉya eyɨfʉlɨrwa abatsene. 6 Agashanɨrwe yo ʉthɨndawe bʉshana nangye.»
7 Abɨga ba Yoani abo babere bagenda, Yesʉ mwathanga ɨsɨmolera omuhindano bʉshana na Yoani athɨ: «Mwayaga lola ku ki mo mbwarara? Lʉsheke lo luthenganibwa na mbeho? 8 Aho, mwayaga lola ku ki? Mʉndʉ ambithe ngɨmba sikwirire? Ɨhɨ! Bo banambala ngɨmba sikwirire balɨ mo manyʉmba w’abamɨ. 9 Ewono, mwayaga lola ku ki? Kʉ mʉmɨnyeretsɨ? Ega, enyɨbabwɨra ɨye alengitsye mʉmɨnyeretsɨ. 10 Kʉshangwa ni Yoani yo bishakirweko mbʉ: "Nyathʉma omugendi aye akʉthange embere, yo wandakomya enzɨra awe." 11 Kwenene enyɨbabwɨra, mo bandʉ babʉthawa na mʉkatsɨ, kuthathangire kwahʉlʉka mʉkʉlʉ kʉ Yoani Mubatisya. Hewethuwe omʉke kʉtsɨbʉ mo Bwamɨ bw’elʉbʉla nɨ mʉkʉlʉ kw’ɨye. 12 Ɨthoka ko bɨro bya Yoani Mubatisya ihika lɨno, abandʉ abalwɨsa oBwamɨ bw’elʉbʉla, nɨ aba kagala bo batsɨmbabo. 13 Kʉshangwa abamɨnyeretsɨ boshi n’oMʉgomba wa Mʉsa mobafʉla omwatsɨ oyo, ihika ko mʉgʉlʉ wa Yoani. 14 Na mwamashondya ɨmɨnya kʉbʉya, Yoani yo Elia yo wangahikire. 15 Yo uwithe mathwi onvwe!»
16 «Ɨndɨ yo nyangalingania n’abandʉ ba munobwire? Bangalinganibwa na bana bikere handʉ ha muhindano, bo babɨrɨkɨra balikyabo bathɨ:
17 "Mothwababuhire akapʉlɨ, hewethuwe momuthashathire! Mothwimbire lwimbo lwa kɨrɨro, momuthalirire." 18 Kʉshangwa Yoani mwahika, athagenda alya n’ɨshoma, abandʉ mobanegena bathɨ: "alɨko mʉtsɨmʉ!" 19 oMʉgala w’oMʉndʉ mwahika, agenda alya n’ɨshoma abandʉ mobanegena bathɨ: "Shʉnga, omʉndʉ oyu ni wa kahehu, kandɨ nɨ mukundirya, ni mwira w’abakarani b’ekoli n’abakoli b’ebɨtsɨbʉ!" Hewethuwe obuthegekania bwa Gongo obʉshʉngɨka mo mɨrɨmo yɨwe.»